لە بانگەوازێکدا کۆمەڵگای دیموکراتیک و ئازادی رۆژهەڵاتی کوردستان (کۆدار) هێرشەکانی ئەم دواییەی دەوڵەتی تورک بۆ سەر هەرێمەکانی پاراستنی مێدیا، بە تایبەتی زاپ و بەکارهێنانی چەکی ئەتۆمی تاکتیکی بە توندی شەرمەزار کردووە و رایگەیاندووە، "ئەنجامدانی ئەو هێرشانە دوای کۆبوونەوەی ناتۆ دەرخەری پیلان و سیناریۆی نوێی دوژمنانی گەلی کوردە لە چوارچێوەی لۆزانێکی نوێ".

کۆدار ئاماژەی بەوەشکردووە کە هاوکاری و بەشداری پەدەکە لەگەڵ دەوڵەتی تورک ئاسانکاری بۆ ئەو رژێمە فاشیستە کردووە کە پلانەکانی بۆ کۆمەڵکوژی بەرەوپێش ببات.

لە بانگەوازەکەیدا کۆدار داوای لەگەلی کورد لە هەر چوارپارچەی کوردستان و دەرەوەی وڵات کردووە لە دژی ئەو پیلانگێڕییە نوێ هەڵوێست بەهێز نیشان بدەن و لەو رووە رایگەیاندووە: "بە دڵنیاییەوە  هێرشە تازەکانی دەوڵەتی تورک بە هەڵوێستوەرگرتنی گیانبازانەی گەلەکەمان پوچەڵ دەکرێنەوە".

دەقی بانگەوازەکەی کۆدار بۆ شەرمەزارکردنی لەشکرکێشی و هێرشە نوێکانی سوپای داگیرکەری تورکیا بۆ سەر هەرێمەکانی پاراستنی مێدیا و بەکارهێنانی چەکی قەدەغە بەم جۆرەیە:

"بۆ رای گشتی

کۆمەڵگای دیموکراتیک و ئازادی رۆژهەڵاتی کوردستان (کۆدار) لەشکرکێشی بەربڵاوی ئەمدواییەی دەوڵەتی تورک بۆ سەر هەرێمەکانی پاراستنی مێدیا و بەتایبەتی زاپ و بەکارهێنانی بۆمبی ئەتۆمی تاکتیکی لە دژی سەنگەرەکانی گەریلا بە توندی شەرمەزار دەکات. ئەنجامدانی ئەم هێرشە بەربڵاو و داگیرکەرییانە دوابەدوای کۆبوونەوەی ناتۆ دەرخەری سیناریۆی تازەی دوژمنانی گەلی کوردە لە چوارچێوەی لۆزانێکی نوێ و هاوکاری گەلەگڵ دەوڵەتی فاشیستی تورک و دەوڵەتە داگیرکەرەکانی چوارپارچەی کوردستان.

رەوانەکردنی هێزەکانی سوپای داگیرکەری تورک بۆ هەرێمەکانی پاراستنی مێدیا و بەتایبەتی زاپ و دوابەدوای ئەوەی بەکارهێنانی بۆمبی ئەتۆمی تاکتیکی کە بەرهەمی ناتۆیە لە دژی سەنگەرەکانی گەریلا لە نێوان رۆژانی ١١ و ١٣ی تەمووز، هەروەها هێرشەکان بە فرۆکەی بێفرۆکەوان بۆ سەر رۆژئاوا و باشوور کوردستان دەیسەلمێنێت کە لە کۆبوونەوەی سەرکردەکانی ناتۆ لە لیتڤانیا سیناریۆی لۆزانێکی نوێ  داڕێژراوە. دەوڵەتی تورک لەڕێگەی ئەم هێرشە بەربڵاو و دڕندانەیەوە لەهەوڵی ئەوەدایە هەژموونی جیهانی و ئەندامانی ناتۆ قایل بکات کە لە کۆمەڵکوژی دژ بە کورد هاوبەشی لەگەڵدا بکەن. دەوڵەتی تورک وەک دەوڵەتێکی بەکرێگیراوی هەژموونی جیهانی لە ناوچەکەدا ستراتیژی کۆمەڵکوژکردنی کوردی زیاتر لە هەمووکات بەرفراوان کردووە و بە چەندین سازش لە سەر پرسە ئابووری و داراییەکان و لە رێگەی سات و سەودای دیپلۆماتیکەوە مافەکانی گەلی کورد دەکاتە بابەتی مامەڵەی بازرگانی. هاوکاری پارتی دیموکراتی کوردستان (پەدەکە) و پاڵپشتی بارزانییەکان بۆ دەوڵەتی تورک پرۆسەی شەڕ و کۆمەڵکوژی بۆ فاشیزم ئاسانتر کردووە و گەلی کوردی کردووەتە ئامانجی هێرشە بێ بەزەییانەکان. لێنەپێچینەوە و حساب نەپرسینەوە لە دوژمن هەڵکشان و کارەساتبارتربوونی هێرشەکانی بەدواوەدەبێت.

گەلی قارەمانی کورد پێویستە ئەوە بزانێت کە قۆناغی تازەی هێرشەکانی سوپای تورک و بەکارهێنانی چەکی قەدەغە و بێدەنگی کۆمەڵگەی جیهانی، هەبوونی گەلەکەمان و هەموو گەلانی چەوساوەی رۆژهەڵاتی ناوەڕاست زیاتر دەخاتە بەر مەترسییەوە. بە تایبەتی بەکارهێانی هەموو جۆرە چەکێکی ئەتۆمی تاکتیکی، کیمیایی، فسفۆڕی و ... کە لە لایەن هەژموونی جیهانییەوە مۆڵەتی بەکارهێنانی بە دەوڵەتی تورک دراوە، نەک هەر کۆمەڵگای مرۆیی، بەڵکوو ژینگەشی گەیاندووەتە لێواری لەناوچوون و ناوچەکە والێدەکات کە چیتر گونجاونەبێت بۆ ژیان. ئاساییکردنەوە بەکارهێنانی چەکی قەدەغە تاوانێکە کە هاوکات هەم ژینگە و هەم ژیانی مرۆڤەکان لەناو دەبات. هەربۆیە ئامادەبوونی هەموو کۆمەڵانی گەل لە گۆڕەپانەکانی تێکۆشان لە هەر چواربەشی کوردستان و ئەوروپا لە دژی فاشیزمی تورک و داگیرکەرانی کوردستان لە سەروبەندی کۆتایی سەد ساڵەی لۆزان، یەکجار گرنگە.

کۆمەڵگای دیموکراتیک و ئازادی رۆژهەڵاتی کوردستان (کۆدار) وێڕای شەرمەزارکردنی هێرشە داگیرکەرییەکانی دەوڵەتی تورک بۆ سەر گۆڕەپانەکانی گەریلا و بەکارهێنانی چەکی ئەتۆمی تاکتیکی و هەموو جۆرە چەکێکی قەدەغەکراو و هەروەها سەرکۆنەکردنی لەشکرکێشی نوێ بۆ سەر هەرێمی زاپ، ئەوە وەک مەترسی زیاتر تەشەنەسەندنی شەڕ لە کۆنسێپتێکی دیکە لە دژی گەلی کورد و گەلانی دیکەی ناوچەکە دادەنێت. ئەم هێرشانە نەک هەر یەک پارچەی کوردستان بەڵکوو چوارپارچەکە و نەک هەر تەنیا گەلی کورد بەڵکوو هەموو گەلانی ناوچەکە رووبەڕووی مەترسی گەورە دەکاتەوە. شەڕانگێزییەکانی دەوڵەتی تورک لەمڕۆدا کە هەندێک ناوچەی کردووەتە ئامانج، ئەگەر رێگری لێنەکرێت، سبەی رۆژ ناوچەکانی دیکە و بەشەکانی دیکەی کوردستانیش دەکاتە ئامانجی هێرشە دڕندانەکانی خۆی. هەربۆیە، وشیاری گەلەکەمان لەبەرامبەر سیناریۆکان و هێرشە کۆمەڵکوژکارییەکان وەک رابردوو لە پێناو بەرەنگاربوونەوەی دوژمن، ئەرکێکی جەماوەری و گشتییە. یەکگرتوویی گەلەکەمان لە هەموو شوێنێک وڵات و دەرەوە دەتوانێت پلانە چەپەڵەکانی دوژمن پوچەڵ بکاتەوە. دەوڵەتی تورک وەک بەکرێگیراوێکی نێودەوڵەتی سەرکێشیی فاشیزمی دژە کورد لە ناوچەکەی لە ئەستۆ گرتووە و لەم رۆژانەی دواییدا لە رێگەی بەرەوپێشبردنی دیپلۆماسی هەرێمی و نێونەتەوەیی و ئەنجامدانی هێرشی نوێی سوپا داگیرکەرەکەی، کۆنسێپت و قۆناغێکی نوێی لە پرۆسەی کۆمەڵکوژی دەستپێکردووە. هێزی گەورەی گەلەکەمان بە ئامادەبوونی لە گۆڕەپانەکانی تێکۆشان دەتوانێت بە دەربڕینی پشتیوانی لە بزوتنەوەی ئازادیخوازیی کوردستان سەرجەم دەستکەوتەکانی گەلەکەمان لە مەترسی لەناوچوون بپارێزێت و وەک رابردوو بۆ چەندەمین جار دەتوانێت لەبەرامبەر دوژمنی فاشیست سەرکەوتن مسۆگەر بکات. گەلەکەمان ئەو هێزەی تێدایە و لە گەنجانەوە بگرە تا ژنان و رۆشنبیران، رێکخراوەکان، حزبەکان و هەموو کۆمەڵانی خەڵک دەتوانن هەڵمەتی دیموکراتیک و کەمپینی بەربڵاو دەستپێبکەن و لە دژی فاشیزم لە هەر چوارپارچەی کوردستان خۆڕاگری بکەن. بە دڵنیاییەوە  هێرشە تازەکانی دەوڵەتی تورک بە هەڵوێستوەرگرتنی گیانبازانەی گەلەکەمان پوچەڵ دەکرێنەوە.

کۆمەڵگای دیموکراتیک و ئازادی رۆژهەڵاتی کوردستان (کۆدار)

١٦-٧-٢٠٢٣

هـ . ب