کۆمسیۆنو ژەنا لقو ئامەدی کۆمەڵەو مافەکا مرۆڤو (ئیهەدە)ی جە بیناو کۆمەڵەکەینە گوزارشتەو ساڵێوە پاشێلکەردەی مافەکا ژەناش جە شارەکا کوردەسانینە ئاشکرا کەرد. ئەسرا ساچاکلدرە ئەندامۊو لوجنەو ڕاوەبەری لقو ئیهەدەو ئامەدی گوزارشتەکێش وەناوە و مەڵامەتو زیابییەی تنوتیژییەکا دژ بە ژەناش ئاشکرا کەرد.

وستەی ڕووەو مەڵامەتو زیابییەی تنوتیژی دژ بە ژەنا:

ساچاکلدرە جە قسەکاشەنە ئاماژەش پانەیەدا تنوتیژییەکۍ دژ بە ژەنا تەنیا جە ڕوو جەسەیوە ئەنجام نمەڎریا، جە هەمانکاتەنە بە گرد شێوێ تنوتیژی جە ڕووەو دەرونی، ڕەگەزی، ئابووری، کۆمەڵایەتیی ئەنجام مڎریۆنە. ڕۆشنشکەردۆ تنوتیژییەکۍ دلۍ بنەیانەکانە جە لایەنو گلێرگەی و دۆڵەتیوە پێسەو 'کێشەو بنەیانەی' تەماشا کریۆنە و قەرارو کیشیایۆ جە پەیمانو ئەستەنبوڵی بییەن بە مەڵامەتو پەرەسانای تنوتیژی و نایەکسانی ڕەگەزی.

ئەسرا ساچکلدرە ئەرەیاوناش، چارەسەرنەکەردەی پرسو کوردی مەڵامەتێ تەرو تنوتیژییەکان جە دژو ژەنا و پاشێلکەردەی مافەکا مرۆڤی و ئانەش وات: "سەپناو قەیومی جە دژو شارەوانییە کوردییەکا مەڵامەتو زیابییەی تنوتیژییەکان جە دژو ژەنا  بەگردی و ژەنێ زینانیکریێ بە تایبەتی."

وستەی ڕووە ئامارەکا:

دماو وەنایۆو ئەرەیاوناکەی، جە لایەنو پارێزەر بەفرین ئەلچی-یوە ڕیزبەندی و ڕێژەو تنوتیژییەکا وزیۍ ڕووە. جە گوزارشتەکێنە بە شێوێ ڕیزبەند نامی ئا شارا وزیاڕووە کە فرەتەرین ڕێژەو تنوتیژییشا چنە ئەنجام دریان؛ ڕحا (٢١)، ئامەد (١٦)، مێردین (١٣)، وان (١٠) و دیلۆک (١٠).

جە گوزارشتەکێنە ئی زانیاریێ وزیێنێ رووە:

*جە هەرێمەکەنە لاو کەمیۆ ٣٩ ژەنێ چێرو ئاژەی گوماناویینە گیانشا جەدەسدان.

*لاو کەمیۆ ٧ ژەنێ پەناشا پەی وێ کوشتەی بەردێنە.

* هەرێمەکەنە بەمەڵامەتو تنوتیژی بنەیانەی لاو کەمیۆ ٤٩ ژەنۍ گیانشا جەدەسدان و ١٢ ژەنێچ زامڎارێ بیێنێ.

*جە هەرێمەکەنە بە مەڵامەتو تنوتیژی کۆمەڵایەتیۆ لاو کەمیۆ ١٩ ژەنێ گیانشا جە دەسدان، لاو کەمیۆ ١٦ ژەنێ زامڎارێ بیێنێ و لاو کەمیۆ ژەنێ وەرەوڕو دەسدرێژی بیێنۆ.

*جە هەرێمو وەرکەوت و پانیشتوو وەرکەوتو ئەنادۆڵی لاو کەمیۆ ٦٨ ژەنێ کە ترانس جێندەرێوە (ڕەگەز فاڕیاش) چنەن جە ئەنجامو تنوتیژی خێزانی پیایا و دلێ گلێرگەینە کوشیێنێ و ٧ ژەنێ تەرێچ بە مەڵامەتو هەوڵدای پەی وێ کوشتەی ئەشکەنجە دریێنێ.

*بی جۆرە دلێ ساڵێنە لاو کەمیۆ مافو ژیوای ١١٤ ژەنا پاشێلکریان.

* لاو کەمیۆ ٥٧ ژەنێ یانەنە کوشیێنی یان بە مەردەی ئیزیێنە.

*بە گردی ژەنی جەلایەنو کەسوکار و هامژینەکاشا کوشیێنێ.

*چنین ژەنێ بە مەڵامەتو داواکەردەی جیابیەیۆ کوشیێنێ.