کۆمسیۆنی زمان، کلتور و پەروەردەی کۆنگرەی نەتەوەیی کوردستان (کەنەکە) بە بۆنەی ڕۆژی زمانی کوردیی، پەیامێکی بڵاوکردەوە و وتی”١٥ی ئایار جەژنی زمانی کوردییە، ئەمساڵ لە دۆخێکی ناهەموار و تایبەتدا ئەم جەژنە پیرۆز دەکەین، دەوڵەتانی داگیرکەری تورکیا، ئێران و سوریا ستەمکارانە هێرش دەکەنە سەر گەلەکەمان، بەم زوڵم و زۆرییەیان نەیانتوانیوە ڕێڕەو و ئیرادەی بەرخۆدان سست بکەن، کورد و کوردستان بۆ بەدەستخستنی مافە ڕەواکانیان لەدژی ئەو دەوڵەتە داگیرکەرانە خەبات و تێکۆشانی خۆیان بەردەوامیی پێبدەن. گەلی کورد چەندین ساڵە لەپێناو بەردەوامیی هەبوونی خۆی، خەبات و تێکۆشانێکی مەزنی کردوە، لەمیانەی ئەم تێکۆشانەدا سەنگەری زمان هەموو کات ئاگرین بوە، هەربۆیە داگیرکەران لەناوبردن و لاوازکردنی گەلی کوردیان لەڕێگای تواندنەوەی زمانەوە گرێداوە، لەپێناو ئەوەدا گرنگە کورد لەسەر پرسی زمان و پەروەردەکردن بە زمانی کوردیی پیداگرن و خەباتێکی بێوچانی بۆ بکەن”.

کەنەکە، زۆر بە گرنگییەوە لە خەبات بۆ پاراستنی زمانی کوردیی دەڕوانێت و دەڵێت: ئەگەر زمانی کوردیی نەمێنێ، هەبوونی کورد وەک نەتەوەیەک نامێنێ. بە پێویستیشی دەزانین، ڕێگا لەبەردەم پەروەردە بە کوردیی ئازاد و واڵا بکرێت و پشتگیریی بکرێت، بۆ ئەم مەبەستەش لەسەروو هەمووویان حزب و هێزە سیاسییەکانی کوردستان و پاشان هەموو هاوڵاتییەکی کوردستانیی خۆیان بە بەرپرسیار ببینن و بە هەموو توانایانەوە خەبات و تێکۆشانی زمانی کوردیی مەزنتر و بەهێزتر بکەن.

کۆنگرەی نەتەوەیی کوردستان (کەنەکە) بەم شێوەیە بەردەوامی بە راگەیەنراوەکەیدا”کۆنگرەی نەتەوەیی کوردستان لەم بوارەدا هەموو کاتێک سەرنجی هێزە نەتەوەیی و نیشتیمانییەکانی ڕاکێشاوەتە سەر ئەم خەباتە و وەک پرسێکی ژیانیی بینیوە و کاری بۆ کردوە”.

کۆمسیۆنی زمان، کلتور و پەروەردەی کەنەکە، لە کۆتاییدا دەڵێت:”بەم بیردان و هزر و باوەڕەوە جەژنی زمانی کوردیی بە دروشمی ‘بۆ کورد و کوردستان، پاراستنی زمانی کوردیی ئەرکێکی نەتەوەیی و نیشتیمانییە’ پیرۆز دەکات”.

ف.ق