بەپێی ئامارەکانی کۆڵبەر نیوز لە ماوەی مانگی خاکەلێوە (٢١ ئادارتا ٢٠ی نیسان) ١٠ کۆڵبەر و کاسبکار گیانیان لەدەستداوە، کە پێنج کەسیان بە تەقەی هێزەکانی دەوڵەتی ئێران کوژراون و پێنج کەسی دیکەش بە هۆکارەکانی وەک کەوتنەخوارەوە لە بەرزایی، رەقبوونەوە و وەستانی دڵ گیانیان لەدەستداوە.

ئەوەش خراوەتەڕوو کە لەو مانگەدا ٣٩ کۆڵبەر و کاسبکاریش لەسەر سنوورەکان برینداربوون، کە رێژەی لەسەدا ٦٣ی ئەو کەسانە بە تەقەی راستەوخۆی هێزەکانی دەوڵەت پێکراون.

زۆرینەی ئەو کۆڵبەرانەی کراونەتە ئامانج لە ناوچە سنوورییەکانی نەوسود، بانە و هەورامان بوون.

هەر لە ئامارەکەدا ئاماژە بەوەشکراوە، کە ١٣ کۆڵبەری خەڵکی پاوەش لەلایەن هێزەکانی پاسەوانی سنوورەوە دەستگیرکراون.

بە پێی ئامارەکانی ئەو ماڵپەڕە ساڵی رابردوو ٤٤ کۆڵبەر و کاسبکار گیانیان لەدەستداوە و کوژراون و ٤٠٠ کۆڵبەر و کاسبکاریش برینداربوون، کە زۆرینەیان بە تەقەی راستەوخۆ هێزەکانی دەوڵەت کرابوونە ئامانج و ئەو ئامارەش بەرزترین ئاماری قوربانیبوونی کۆڵبەرانە.

هـ . ب