لە یانزەهەمین ساڵیادی کۆمەڵکوژی ٩ی کانونی دووەمی پاریس کە تیایدا لە دامەزرێنەرانی پەکەکە سەکینە جانسز، نوێنەری کەنەکە لە پاریس فیدان دۆغان و ئەندامی بزوتنەوەی گەنجانی کورد لەیلا شایلەمەز لە بناری قەندیل و دگورێی شەنگال یادیان کرایەوە.

قەندیل

لە بناری قەندیل بە پێشەنگایەتی رێکخراوی ژنانی ئازادی کوردستان (رەژاک)، بەمەراسیمێک یادی شەهیدانی کۆمەڵکوژی ٩ی کانونی دووەمی ٢٠١٣ی پاریس هەریەک لە سەکینە جانسز، فیدان دۆغان و لەیلا شایلەمەز کرایەوە کە لەلایەن میتەوە تیرۆر کرابوون.

لە مەراسیمەکەدا ژمارەیەکی زۆر ژن بەشدارییان کردبوو، هۆڵی کۆبوونەوەکە بە وێنەی شەهیدان و رێبەری گەلی کورد عەبدوڵا ئۆجالان رازێندرابووەوە.

لە مەراسیمەکەدا باس لە کەسایەتی و تێکۆشانی ئەو سێ ژنە شۆڕشگێڕە کرا و داواکاری بۆ بە سزاگەیاندنی ئەنجامدەران و پلانداڕێژەرانی ئەو کۆمەڵکوژیە دووپاتکرایەوە.

شەنگال

بزوتنەوەی ئازادیی ژنانی ئێزدی (تاژێ) لە کۆمەڵگای دگورێی شەنگال بە بەستنی سمینارێک یادی سێ ژنی شۆڕشگێڕی کورد سەکینە جانسز، فیدان دۆغان و لەیلا شایلەمەزی بەرزڕاگرت کە ١١ ساڵ بەر لە ئێستا لە لایەن میتی تورکەوە لە پاریس تیرۆر کران.

سمینارەکە لە ئەنجومەنی دگورێی شەنگال بە بەشداری سەدان کەس و هەروەها نوێنەرانی رێکخراو و دامەزراوەکانی شەنگال بەڕێوەچوو.

لە سمینارەکەدا باس لە ڕەنج و تێکۆشانی ئەو سێ ژنە شۆڕشگێڕە کرایەوە و ریهام هجۆ وتەبێژ و ئەندامی دەستەی بەڕێوەبەریی تاژێ لە وتەیەکدا ئاماژەی بەوەکرد، کە ئەگەر ئەمڕۆ لە شەنگال توانیویانە خۆیان رێکبخەن و ببنە خاوەنی دامەزراوەی تایبەت بە خۆیان، ئەوە ئەنجامی بەرهەمی ڕەنج و تێکۆشانی ژنانی پێشەنگی وەک سەکینە جانسزە.

جەختیشی کردەوە: "کۆمەڵگەی ئێزدی لەمرۆدا لەسەر هێڵی شەهید سەکینە خۆی رێکخستووە و بووەتە خاوەن ئیرادە. ئێمە وەک ژنانی ئێزدی لەپێناو ئازادی ژنان تا کۆتایی لە سەر هێڵی سەکینەکان درێژە بە رێگەی خۆمان دەدەین."

هـ . ب