لە کامپی پەنابەرانی شەهید رۆستەم جودی (مەخمور) بە پێشەنگایەتیی بزووتنەوەى ژنانی گەنجی مەخمور  (تەژەجەمە - TJCM)  دەست بە پیرۆزبایی نەورۆز کرا.

پیرۆزبایی نەورۆز هەموو شەوێک لە لایەکی کامپەکەدا بەڕێوەدەچێت. لەو چوارچێوەیەشدا دوێنێ شەو یەکەم ئاگری نەورۆز لە بەشی شەهید رووباردا کرایەوە. شوێنی چالاکییەکە بە وێنە و پۆستەرەکانی عەبدوڵا ئۆجالان رێبەری گەلی ورد و ئاڵاکانی پەکەکە رازێنرابوونەوە.

پیرۆزباییەکە بە خولەکێک رێزگرتن بۆ گیانی پاکی شەهیدان دەستیپێکرد. دوای رێزگرتنەکە مزگین کارا بە ناوی بزووتنەوەى ژنانی گەنجی مەخمور  (تەژەجەمە - TJCM)  وتەیەکی پێشکەشکرد و باسی لە ئاگری نەورۆز کرد، کە لەلایەن کاوەی ئاسنگەرەوە هەڵکراوە و سیمبولی سەرکەوتنە بۆ گەلی کورد.

 کارا راشیگەیاند، نەورۆز لە عەبدوڵا ئۆجالان رێبەری گەلی کورد، لە گەریلاکان، لە گەلی کورد و هەموو بەشداربوانی مەراسیمەکە پیرۆز دەکەم.

دوای پێشکەشکردنی وتەکان، ئاگری نەورۆز لە ٣ شوێندا کرایەوە و لەگەڵ بەرزبوونەوەى بڵێسەى ئاگرەکان دەنگی هەلهەلە و هاواری دروشمەکانی "بژی سەرۆک ئاپۆ" و "نەورۆز پیرۆز" لە گۆڕەپانەکە دەنگیدایەوە.

دوای کردنەوەى ئاگرەکە، بەشداربوان بە دەم وتنەوەى سرود و گۆرانیەوە گۆڤەند و شاییان گێڕا.

بەشداربوان لە ناو ئەو جۆش و خرۆشەى پیرۆزبایی نەورۆزدا بۆچوون و هەستی خۆیان لەبارەی نەورۆزەوە بۆ ئاژانسی هەواڵی فورات (ANF) خستەڕوو. دانیشتوان بە دڵخۆشییەوە نەورۆزیان پیرۆز کرد و داوایان لە گەلی کورد کرد ئەمساڵ بە جۆش و خرۆشێکی گەورەوە بەشداری لە پیرۆزباییەکانی نەورۆزدا بکەن.

ژ.ت