بەپێی ئامارەکانی کۆڵبەرنیوز، لە ماوەی ساڵی ڕابردوودا لە ڕۆژهەڵاتی کوردستان  ٥٩ کۆڵبەر کوژراون و ٢٨٦ کۆڵبەریش برینداربوون، لەو ژمارەیەدا ٢٢ کۆڵبەر تەمەنیان لە خوار تەمەنی ١٨ ساڵانەوەیە.

کۆڵبەرنیوز ئاماری کوژراو و بریندارانی کۆڵبەرانی کوردی ڕۆژهەڵاتی کوردستانی لە ساڵی ٢٠٢٤دا بڵاوکردەوە.

لە هەواڵەکەدا هاتووە، لە ساڵی ڕابردوودا ٣٤٥ کۆڵبەری کورد کوژران و بریندار بوون، کە ٥٩ کۆڵبەر کوژراون و ٢٨٦ کۆڵبەریش برینداربوون.

ئاماژە بەوەشکراوە، لەو ژمارە ٢٢ کۆڵبەر تەمەنیان لە خوار تەمەنی ١٨ ساڵیدایە و یەکێکیان بە هۆی سەرما و بەستەڵەکەوە گیانی لەدەستداوە.

هەروەها ڕاگەیەندراوە کۆڵبەران لە ڕێگەی ناوچە سنوورییەکان و پارێزگاکانی ورمێ و سنە و کرماشان بە تەقەی ڕاستەوخۆی هێزە چەکدارەکانی ڕژێمی ئێران، سەرما، کەوتنەسەر مین، کەوتنەخوارەوە لە شاخ و بەرزایی و ڕووداوی دیکە ژیانیان لەدەستداوە و بریندار بوون.