ئیدارەی خۆبەڕێوەبەری شنگال ڕایگەیاند، ١٢بارهەڵگری گەورەی هاوکارییان بۆ کۆچبەرانی ڕۆژئاوا کۆکردۆتەوە، بەڵام لە ٢٠ی کانونی یەکەمەوە چاوەڕێی مۆڵەتی تێپەڕبوونی لە دەسەڵاتدارانی عێراق دەکەن.
ئیدارەی خۆبەڕێوەبەری شنگال کە لە ٨ی کانوونی یەکەمەوە دەستی بە هەڵمەتی کۆکردنەوەی هاوکارییەکان بۆ کۆچبەرانی ڕۆژئاوا کرد، لە ٢٠ی مانگەوە هاوکارییەکان ئامادەکراون و ئیدارەی خۆبەڕێوەبەری شنگال ڕایگەیاند؛ چاوەڕێی وەڵامی دەسەڵاتدارانی عێراقن بۆ گەیاندنی هاوکارییەکان کە لە١٢ بارهەڵگری گەورە پێکدێن.
ئەنجوومەنی خۆبەرێوەبەری و دیموکراتیکی شنگال لەگەڵ سەرجەم ڕێخراوەکانی و تەڤگەری ئازادی ژنانی ئێزدی (تاژێ) هەڵمەتێکیان بۆ کۆکردنەوەی هاوکاریی بۆ کۆچبەرانی تل ڕفعەت و شەهبا دەستپێکرد کە بەناچاری ڕوویان لە ناوچە ئارامەکانی ئیدارەی خۆبەڕێوەبەری دیموکراتیکی باکووری ڕۆژهەڵاتی سوریا کردووە.
هەڵمەتەکە لە سەرجەم گوند و شارۆچکەکانی شنگال بەڕێوەچوو و گەل هاوکارییەکانی خۆیان پێشکەش کرد. بەپێی ئەو زانیارییانەی لە ئیدارەی خۆبەڕێوەبەرییەوە گەیشتووە، لە ئەنجامی هەڵمەتەکەدا کە بەشێکی زۆر لەو بنەماڵانەی کە بەم دواییە گەڕاونەتەوە بۆ شنگاڵ بەشدارییان کردووە و ١٢ بارهەڵگری گەورە هاوکاری کۆکراونەتەوە. جێی ئاماژەیە لە ٢٠ی مانگەوە چاوەڕێی وەڵام و مۆڵەتی دەسەڵاتدارانی عێراق دەکەن بۆ تێپەڕبوونی هاوکارییەکان لە دەروازەی سنوورییەوە.
ئیدارەی خۆبەڕێوەبەری ڕایگەیاند، پێیان وابوو ئەگەر لە شنگاڵەوە هاوکاری بۆ باکور و ڕۆژهەڵاتی سوریا ئامادە بکرێت، دەستبەجێ دەگەیەندرێتە دەستی ئیدارەی خۆبەرێوەبەری ڕۆژئاوا.
بەڵام هەرچەندە ١٣ ڕۆژ تێپەڕیوە، هێشتا وەڵامێکی ڕوون لە لایەن بەرپرسانی حکومەتی عێراقەوە وەرنەگیراوە و لایەنە پەیوەندیدارەکان لە پەیوەندیدان بۆ ئەوەی هەرچی زووتر هاوکارییەکان بگەیەندرێتە دەستی ئیدارەی ڕۆژئاوای کوردستان. بەڵام چاوەڕین لە ماوەیەکی کەمدا هەتا کۆتایی هەفتە هۆکارەکان ڕوون ببێتەوە.
