بەشی یەکەم :

ئەندامی مەجلیسی پارتی ژیانی ئازادی كوردستان(پەژاك)، ئامەد شاهۆ لە گفتوگۆیەک لەگەڵ ANF لەسەر هەڵمەتی ئازادی جەستەیی رێبەر ئاپۆ و چارەسەری بۆ پرسی كورد و رۆژی بەرەنگاربوونەوەی جیهانی دژ بەتوندوتیژی سەر ژنان و چل و پێنجەمین ساڵیادی لەدایكبوونی پەكەكەی هەڵسەنگاند.

ئامەد شاهۆ سەبارەت بە هەڵمەتی ئازادی جەستەیی رێبەر ئاپۆ  و چارەسەری پرسی كورد وتی؛ ئەو هەڵمەتە دەتوانێ بەرپرسیارێتی ئێمە وەك گەلی كورد زیاتر بكات. واتا رۆڵ و بەرپرسیارێتیەكی مێژووی دەخاتە ئەستۆی گەلی کورد.  ئەگەر باسی دیموكراسی، ئاشتی و ئارامی بكەین و رێبەر ئاپۆش لەزینداندا بێت، ئەوا نكوڵی كردن لە حەقیقەتێکە. نكوڵی كردن لە هەبونێك لە نەتەوەیەكە كە ئەمڕۆ رووبەڕوی قڕكردنی كلتووری و قڕكردنی سیاسی دەبێتەوە. لەهێرش و داگیرکەریەکانی چەتەکانی داعشەوە بگرە تا كردەوەكانی دەوڵەتی فاشیستی تورك و رژێمی داگیركەری ئێران ئەوە دەسەلمێنێت كە مەترسیەكی جددی لەسەر گەلی كورد لەئارادایە. بۆ ئەوەی گەلی كورد دڵنیا بێ، مەرجی یەكەمی چارەسەری پرسی گەلی كورد و گەلانی ئازادیخواز ئەوەیە كە دەبێت رێبەر ئاپۆ بە جەستەیی ئازاد بێ و ببێتە لایەنێكی چارەسەری ئەو كێشەیە و بەو شێوازەیە كە دەتوانرێت چارەسەرییەكی بنەڕەتی و هەمیشەیی بۆ ئەو پرسە دەستەبەر ببێت.

ئامەد شاهۆ ئاماژەی بەرۆڵی ژنان لەسەرخستنی هەڵمەتی ئازادی جەستەیی رێبەر ئاپۆ و چارەسەری پرسی كورد كرد و وتی: ژن و جوان ئازادی خۆیان بە ئازادی رێبەر ئاپۆوە بەستوەتەوە. چون رێبەر ئاپۆ لەسەرەتای تێكۆشانی خۆیەوە تا بە ئەمڕۆش لە ئیمڕاڵیدا لە پێناو دەستەبەرکردنی ئازادی بۆ ژن و بەرقەراری ئاشتی و دیموكراسی تێكۆشان دەكات.

ئەندام ئەنجوومەنی پەژاك لەچل و پێنجەمین ساڵیادی دامەزراندنی پەكەكەدا و پەیوەست بە هەڵمەتی ئازادی جەستەیی رێبەر ئاپۆ دەڵێت: "بۆیە لە کەوتنە 46مین ساڵیادی دامەزراندنی پەكەكە پێویستە بە هەڵمەتی ئازادی جەستەیی رێبەر ئاپۆ و چارەسەری پرسی کورد بڕۆینە سەر کار و بەشداری خەبات بین. پێویستە ئامانجی سەرەکی هەر تاکێکی ئازادیخواز ئازادی جەستەیی رێبەر ئاپۆ و چارەسەری پرسی كورد بێت. ئەگەر ئامانجمان ئەوە نەبێ ئەو كاتە ناگەینە چارەسەری بنەڕەتی و داگیركەری لەسەرمان لانابردێرت و زەبری چەك و چۆڵ، لەسێدارەدان بەردەوام لەسەرمانە. بۆئەوەی كۆتایی بە؛ سیاسەتی لەسێدارەدان، گرتن، كوشتنی كۆڵبەر، ژنكوژی، گەنجكوژی، هەژاری، کۆچبەری و هەڵاتنی مێشكەكان بهێنین بە سەرکەوتنی ئەو هەڵمەتە مسۆگەر دەبێت. چون ئەو هەڵمەتە لە بنەڕەتدا ئازادی گەلی كورد و گەلانی ئازادیخواز دەستەبەر دەكات".

ئامەد شاهۆ بۆ بەردەوامی شۆڕشی ژن ژیان ئازادی دەڵێت: "پێویستە دووهەمین ساڵڕۆژی شۆڕشی ژن ژیان ئازادی لەسەر ئەو هەڵمەتە بەڕێوە بچێت. ئەگەر بەردەوامی شۆڕش لەسەر ئەو هەڵمەتە بێت، رەوتی تێكۆشانی ژنان و گەلان بۆ گەیشتن بە هەدەف كورت مەودا دەبێت و زووتر ئامانجەکان دەستەبەر دەبن. بە هەمان شێوە جارێكی دیكە پریسكەی ئەو شۆڕشە بە گوڕەوە ببریسكێتەوە و ئەو رۆحیە سەرهەڵبداتەوە. بە کردەوەیی کردنی ئەو بابەتە ئیدی کەس ناتوانێت بڵێت شۆڕش كۆتایی پێهاتووە و سەرجەم ئەو گۆتە گۆتانەش بێ واتا و پووچەڵ دەکرێنەوە. چون شۆڕش بە رێبازێكی جیاوازترەوە دەست پێدەکات. واتا بە ئامانجێكی گەورەترەوە شۆڕش دەست پێدەكرێت. بەو ئامانجەی کە ژنان و گەلان لەڕۆژهەڵاتی کوردستان و ئێران دیاریان كردبوو نیشاندرا كە دەتوانرێت دژی عەقڵیەت و دەسەڵاتی رژێمی داگیرکەری ئێران بووەستنەوە. نیشاندرا كە دەتوانرێ یەكڕیزی دروست ببێ. نیشاندرا كە دەتواندرێ ژن ژیان ئازادی لەسەر ئەو خاكە شین ببێت و خونچە بکات و کۆتایی بە عەقڵیەتی پیاوسالاری بهێنرێت".

شاهۆ سەبارەت بە رۆژی جیهانی بەرەنگاربوونەوەی دژ بەتوندوتیژی سەر ژنانیش ووتی: "بە تێكۆشانی بزووتنەوەی ئاپۆیی و رێبەر ئاپۆ سەردەمێكی نوێی بەرخودان و تێکۆشان دەستی پێكردوە، ئەو سەردەمەش بە سەردەمی ئازادی ژن ناوزەد کراوە. تایبەت ئەو سەردەمەش بە گۆڕانکاری زیهنیەتی پیاو دەستی پێكردووە. بۆ ئەوەی ژن بگەیەت بە مافە رەوا سرووشتیەکانی خۆی وەك هەبوونێك درێژە بە ژیانی خۆی بدات و لەهەموو رەهەندەكانی ژیان بەشدار بێت، پێویستی بە گۆڕانكاری عەقڵیەت هەیە. ئەو عەقڵیەتەیش بە شۆڕشی زیهنی و شۆڕشی ویژدانی و بە دەستەبەركردنی ئازادی و دیموكراسی و بە هزرێكی سۆسیالیستی دەتوانێ دەستەبەر ببێت".

دەقی گفتوگۆ:

ژن ئەمڕۆ پێشەنگایەتی تێكۆشانێكی سەردەمیانە دەکات

* سەرەتا بەوە دەستپێبكەین نزیكین لە رۆژی بەرەنگاربونەوەی جیهانی دژ بە توندوتیژی سەر ژنان، هاوكات هەڵمەتی ئازادی جەستەیی رێبەر ئاپۆ و چارەسەری پرسی كورد، ئەمانە چی پەیوەندیەكیان لەگەڵ ئەم رۆژەدا هەیە، بەتایبەت لە چوارچێوەی ئێراندا چۆن تاوتوێی دەكەن؟

- سەرەتا وەك بزوتنەوەی ئاپۆیی لەسەر ئەم تەوەرە روانگەی جیاوازمان هەیە. چون ئەمە بابەتێكە كە ئەمڕۆ لەلایەن هێزە داگیركەر، سەردەست، هەژمونگەراكان و عەقڵیەتی پیاوسالار لەسەر مرۆڤایەتی بە پێی بەرژوەندیەکانیان چەسپاندویانە. بەتایبەت کۆمەڵگایان لە ژنان تەنگ كردووە، مافی سرووشتیان لێ زەوت كردووە، وەك هەبوونێك نكوڵیان لێ دەكرێ و رۆژانە رووبەڕوی توندوتیژی و زەخت و زۆری دەبنەوە. دەرەنجامی ئەو عەقڵیەت ئەمڕۆ وەك رەگەزێک و هەبوونێك پەراوێزخراون و نكوڵیان لێ دەكرێت. لە ئەنجامدا مێژویەك پڕ لە تێكۆشانی ژنان لەپێناوی دەستەبەركردنی مافەكانیان لەئارادایە، لە خوشكانی میرابلەوە بگرە تا ئەو قارەمانانەی كە ئەمڕۆ لە چیا سەركەشەكانی كوردستان وەكوو ژن لەپێناو دەستەبەركردنی مافی رەوای خۆیاندا تێكۆشان دەكەن، لێرەدا یادی سەرجەم ئەو قارەمان و تێكۆشەرانەی کە گیانبازانە پەیوەستی کاروانی شەهیدان بوون بەرز رادەگرم و رێز و نەوازش لەبەردەمیان دادەنوێنم.

بە تێكۆشانی بزووتنەوەی ئاپۆیی و رێبەر ئاپۆ سەردەمێكی نوێی بەرخودان و تێکۆشان دەستی پێكردوە، ئەو سەردەمەش بە سەردەمی ئازادی ژن ناوزەد کراوە. تایبەت ئەو سەردەمەش بە گۆڕانکاری زیهنیەتی پیاو دەستی پێكردووە. بۆ ئەوەی ژن بگەیەت بە مافە رەوا سرووشتیەکانی خۆی وەك هەبوونێك درێژە بە ژیانی خۆی بدات و لەهەموو رەهەندەكانی ژیان بەشدار بێت، پێویستی بە گۆڕانكاری عەقڵیەت هەیە. ئەو عەقڵیەتەیش بە شۆڕشی زیهنی و شۆڕشی ویژدانی و بە دەستەبەركردنی ئازادی و دیموكراسی و بە هزرێكی سۆسیالیستی دەتوانێ دەستەبەر ببێت. بۆیە تێكۆشانی سەرەتای رێبەر ئاپۆ و پەكەكە لەسەر ئەو بنەمایە بەڕێوەچوە و رۆژ لە دوای رۆژ ئەو تێكۆشانە بەرفراوانتر بووە و توانیویەتی ئەمڕۆ وەك بزوتنەوەیەك ببێتە بزوتنەوەی ژنان و ببێتە هیوای گەشانەوەی كۆمەڵگەیەكی دیموكراتیك، ئازادیخواز و سۆسیالیست کە بۆ گەلانی جیهان بدرەوشێتەوە.

تێكشكاندنی عەقڵیەتی پیاوسالاری كە لەسەر ژن پەیڕەو كراوە بۆ وەلاوەنانی ئەو عەقڵیەت تا بە ئەمڕۆ تێكۆشانێکی بێ پسانەوە بەڕێوە چووە. بۆ ئەوەی ئەو تێكۆشانە بگاتە ئەنجام پێویستە كە فەرهەنگی دیموكراسی و ئازادیخوازی لەناخی هەر كەسایەتێك و بەتایبەت لە پیاودا بەرجەستە ببێت تا دەرگا بۆ چارەسەری دیموکراتیکی پرسی ژن بكاتەوە. رێبەر ئاپۆ لەسەر ئەم پرسە دەڵێت:"تا ژن ئازاد نەبێت كۆمەڵگە ئازاد نابێت"، ئەگەر ئەو پرسە چارەسەر نەبێت، ئەوا دیموكراسی، ئازادی و سۆسیالیزم لەناوچەكە بەرقەرار نابێت، تەنانەت رۆژ لەدوای رۆژ پریشكی توندوتیژی، شەڕ و كاولكاری لەناوچەكەدا بەرفراوانتر دەبێت. نمونەی ئەوەش ئەمڕۆ لە جیهاندا دەبینین، كە ژن چۆن رووبەڕوی توندوتیژی دەبێتەوە و شەڕ بەربڵاو دەبێت و كاریگەری لەسەر ژن درووست دەکات. ئەوە لە چوارچێوەی ئێراندا فراوانتر و گشتگیرترە. چون عەقڵیەتی پیاوسالاری لەناوخۆی ئێراندا لەسەر  ژن و كۆمەڵگە سەروەرە. رژێمی ولایەتی موتلەقەی فەقی بە عەقڵیەتی پیاو داڕێژراوە و ژن وەكو رەگەزی دووهەم و سێهەم سەیر دەكرێت و لەهەموو سیستەمی رێوەبەرایەتی و ژیانی ناو كۆمەڵگە پەراوێز و بێ بەری کراوە و ئەو پێناسەیەی كە لەلایەن بەرپرسانی رژێمەوە لەسەر ژن دەكرێت، ئەمڕۆ بۆخۆی گەورەترین توندوتیژیە كە لەسەریان بەڕێوە دەچێت.

 سەرەڕای ئەوەی كە مێژوویەكی بەرخۆدان لەناوخۆی ئێراندا هەیە و هەرە دوایی شۆڕشێك كە لەناوخۆی ئێراندا بە ئاڵاهەڵگری ژن بەرز كرایەوە كە دروشمەكەی ژن ژیان ئازادی بوو، بۆ تێكشكاندنی عەقڵیەتی پیاوسالاری بوو؛ كەواتە توندوتیژی ئیتر لەسەر ژن پەسەند ناكرێت، ئیدی بەرهەمی تێکۆشانی رۆژی جیهانی بەڕەنگاربوونەوەی توندوتیژی لەدژی ژنان دەبێتە رۆژی یەكگرتن، رۆژی گەیشتن بە ئازادی و دەستەبەركردنی مافی هەموو ژنان. بۆ ئەوەی ئەو فەلسەفەیە دەستەبەر ببێت، پێویستە هەموو پیاوان عەقڵیەتی پیاوسالاری لەناو خۆیاندا تێكبشكێنن و بگۆڕن و لەسەر بنەما و فەلسەفەی رێبەر ئاپۆ برەو بە تێکۆشان بدرێت.

٢٧ی مژدار، رۆژی سەر لەنوێ لەدایكبونەوەی گەلی كوردە 

* لە 45مین ساڵیادی لەدایكبوونی"پەكەكە"دا دامەزراندنی"پەكەكە" چۆن دەبینن و چی كاریگەریەكی لەسەر رەوتی تێكۆشانی ئازادیخوازانەی گەلی كورد هەبووە؟

- لەسەروبەندی دوو تەوەرەی گرنگداین. واتا رۆژی 25ی مژدار و 27ی مژدار کە بەتایبەت بۆ گەلی كورد و گەلانی ئازادیخواز و ژنان دوو بابەت و پرسی گرنگن. 25ی مژدار رۆژێكە كە لەئەمڕۆدا بەتایبەت لە نێو بزووتنەوەی ئاپۆیدا بایەخێكی گرنگی پێ دەدرێت؛ چونكە ئیتر بەو روانگەیە و بەو عەقڵیەتەی كە سەروەركراوە سەیری ژن ناكرێت؛ بەپێچەوانەوە ژن ئەمڕۆ پێشەنگایەتی كۆمەڵگە و تێكۆشانێكی سەردەمیانە دەكات، هاوكات ئەوەش بە تێکۆشانی بێ وچانی رێبەر ئاپۆ و لەدایكبوونی پەكەكە مسۆگەر بووە. واتا 27ی مژداریش كە وەكو 45مین ساڵیادی دامەزراندنی پەكەكەیە بەبڕوای من وەك لەدایک بوونی پارتێک سەیری بکەین، روانگەیەکی بەرتەسکە.

بۆیە لێرەدا لەبەر گرنگی و دانسقەبوونی ئەو رۆژە سەرەتا لەسەر ناوی خۆم و لەسەر ناوی پارتەكەمان پەژاك ٤٥مین ساڵیادی دامەزراندنی پەکەکە سەرەتا لە رێبەر ئاپۆ، لەهەموو گەریلاكانی ئازادیخوازی كوردستان، لەهەموو ژنانی قارەمان كە ئەمڕۆ لەناو سەنگەرەكانی تێكۆشاندا بەرخۆدان دەكەن، هەموو گیراوانی ناو بەندیخانەكان، هەموو گەلی ئێمەی وڵاتپارێز، دایكانی شەهید، دۆستی ئازادیخوازی گەلی كورد پیرۆز دەكەم.

بە بڕوای من ئەمڕۆژە تەنیا رۆژی لەدایكبوونی پەكەكە نییە. بەڵکوو رۆژی سەر لەنوێ لەدایكبونەوەی گەلی كوردە، واتا گەلێك كە نكوڵی لێ دەكرا و سەری چیمەنتۆ كرابوو، روبەڕوی قڕكردن و پاكتاوكاری دەبویەوە، زمانی قەدەخە كرابوو، گوندەكانی وێرانكرابوون و سوتێنرابوون، گەلەكەی روبەڕوی گواستنەوە و پەنابەری، گرتن و ئەشكەنجە بووەتەوە و هەتا دەرفەتی بچووكترین ژیانی لێ زەوتكرابوو؛ بەدەركەوتنی پەكەكە دەبینین رۆحێكی نوێ بە گەلی كورد بەخشرا و ئەو رۆژە بووە رۆژی ژیانەوە و بووژانەوەی گەل و کۆمەڵگایەکی نوێ.

 بۆیە ئەمڕۆ زۆر لایەن بۆ پەكەكە دەڵێن:" كوردستان وەك دارێكی وشكی لێهاتبوو، پەكەكە رۆحی بەو دارەدا بەخشی و زیندووی كردەوە" واتا نەتەوەیەك كە رووبەڕوی نكوڵی و قڕكردن ببوویەوە، ئەمڕۆ بوەتە گەلێك كە لە رۆژهەڵاتی ناوین و جیهاندا دەستپێشخەری چەسپاندنی ئازادی و دیموكراسی دەكات، ئاڵا هەڵگری بزوتنەوەی سۆسیالیستیە لە جیهاندا و لەهەر بەشێكی كوردستاندا ئاڵاهەڵگری شۆڕشێكی سەردەمیانەیە كە لەباکوور و رۆژهەڵاتی سوریا، لە رۆژهەڵاتی كوردستان و ئێراندا بینیمان. تایبەت لەناوچەكەدا ئەو هێزەی کە ئەمڕۆ بوێرانە و گیانبازانە لە دژی زوڵم و داگیركەری دەوەستێتەوە پەكەكەیە، ئەوەش بە رەنجی بێ وچانی رێبەر ئاپۆ دەستەبەر کراوە.

بۆیە لەبنەمادا لەدایكبوونی پەكەكە لەدایكبوونی ژیانێكی نوێیە بۆ گەلی كورد و مرۆڤایەتی. لەدایكبوونی فەلسەفە، مێژوو، رەوتی تێكۆشان و بەرخۆدانێكی نوێیە. لەدایکبوونی بەرخۆدان ژیانە. كەواتە هەر شتێك لە كوردستاندا دوا بە دوای پەكەكە سەرلەنوێ لەدایكبووەتەوە؛ لەبەر ئەوەیە رێبەر ئاپۆ دەڵێت:"ئێمە سەرلەنوێ مێژوو دەنووسینەوە" واتا ئەو مێژوەش بە خوێنێك كە ئەمڕۆ لە سەنگەرەكانی بەرخۆدان و ناو زیندانەكان و سەر شەقامەكان و چیا سەركەشەكانی كوردستان دەنووسرێتەوە، ئەوەش لەبەر چی دەکرێت؟ لەبەر ئەوەی كە پەكەكە بە دەستەواژەیەك تێكۆشانی خۆی دەستپێكرد، لەسەر دوو وشە لەدایك دەبێت ئەویش "كوردستان داگیركراوە" لەبەر ئەوەیە ئەمڕۆیش دوای 45 ساڵ لە تێكۆشانی خۆی بە گوڕوتینەوە لەدژی داگیركەری شەڕ دەكات، بۆ ئەوەی كە داگیركەرەكان لەسەر ئەم خاكە وەدەربنێن. چونكە داگیركەر لەهەر بەشێكی كوردستاندا گەلی كورد سەركوت دەكات، ئیعدام و دەربەدەر و تاڵانمان دەكەن، بەڵام دەبینین زۆر حەرەكەت و زۆر پارت هەیە، لەمەڕ ئەم کردەوانە بێدەنگن. چون عەقڵیەتێك كە لەسەری دامەزراوە شتێكی جیاوازە. بەڵام هی پەكەكە و بزووتنەوەی ئاپۆیی لەدژی داگیركەریە. واتا چۆن دەبێت داگیركەر لەسەر ماڵ و حاڵی خۆمان دەربەدەرمان بكەن؛ بۆ ئەوەی بەڕەنگاربینەوە بە بەرخۆدان دەتوانین ژیانێكی ئازاد لەسەر ئەم خاكە دەستەبەر بكەین. ئەوەش پەکەکە بە کراوەیی بە درووشمی (بەرخۆدان ژیانە) ئافراندوویەتی.

بە لەدایكبونی رێبەر ئاپۆ و لەدایكبونی پەكەكە رۆحی یەكێتی نەتەوەیی لە كوردستان دروست بوو. واتا ئەو عەقڵیەتەی كە لە رابردودا لەسەر كوردستان سەروەر بوو لە چوارچێوەی بنەماڵە و ناوچەیەكدا سنوردار مابوو، بەڵام پەكەكە بە لەدایكبوونی خۆی هەستی نەتەوایەتی لە كوردستاندا گەشاندەوە. لەناو ململانێ سیاسیەکانی ناوچەکەدا هێڵی سێهەمی بۆ خۆ بەبنەما گرت. جیا لەوەی كە یەكبونێكی لەناو كوردستان و رۆژهەڵاتی ناوین و حەرەكەتی ئازادیخوازانی جیهاندا دروستكرد، پەکەکە لە ئاستی جیهاندا بووە حەرەكەتێكی گەردونی كە هەموو هێزە ئازادیخواز، دیموكراتخواز، چەپ و سۆسیالیستی لە ژێر چەترێكدا لەدژی فاشیزم و داگیركەری كە قڕكردنی گەلان بەبنەما دەگرێ كۆكردەوە.

پەژاك هیوای گەلی كورد و تایبەت ژنان و گەنجانە

* دامەزراندنی پەكەكە چی كاریگەریەكی لە سەر گەلی کورد لەرۆژهەڵاتی كوردستان و ئێراندا هەبوە؟

- پەكەكە وەك بزووتنەوەیەكی نەتەوەیی و دیموکراتیک لە كوردستان لەدایك بووە. سەرەتای لەدایكبونی خۆی وەك گروپێكی خوێندكار پێناسە کرد. لە ئەنقەرە گرووپێکی خوێندکار دێنە لای یەك و بۆ دامەزراندنی پەکەکە ٦ بۆ ٧ ساڵ تێكۆشان دەكەن. وەك گروپێكی خوێندكاری شەیدای کۆمەڵگایەکی ئازاد و دیموکراتیکن. ئەو گرووپە دواتر دەرفەت بۆ پەرەپێدانی خەبات دەڕەخسێنن و دەگەڕێنەوە كوردستان. بە ئامادەكردنی دەرفەت بۆ پووچەڵ کردنەوەی زەخت و گوشارێك كە دەوڵەتی داگیركەری تورکیا لەسەر كوردان و هێزە ئازادیخوازەكان بەڕێوەی دەبات، پەكەكە لە ٢٧/١١/١٩٧٨دامەزراندنی خۆی رادەگەیەنێت و دواتر لەکوردستان و رۆژهەڵاتی ناویندا بەربڵاو دەبێت. تەنانەت چروسكەی خەباتی دەگەیەتە ناوخۆی ئێران و رۆژهەڵاتی كوردستانیش. واتا رێبەر ئاپۆ لەسەرەتادا بە عەقڵیەتی کوردستان یەکپارچەیە نزیكبووەتەوە. بە پەیمانی لۆزان لەلایەن داگیركەرانەوە كراوەتە چواربەش و هەر بەشێكیشی لەژێر چەپۆکی داگیركەرێكدایە. واتا جەستەیەك لەت لەت كراوە. رێبەر ئاپۆ ئەو جەستە لەت لەتكراوەی هێنایەوە لای یەك و رۆحێكی پێبەخشی. ئەو رۆحیەش رۆحیەی ئاپۆییە. دەست، سەر و لنگ و جەستەی لەت لەت کراوی هێنایە لای یەك. ئیتر ئازاری بەشێكی كوردستان بووە ئازاری ئەو بەشەی دیكەی كوردستان. سەركەوتنی بەشێکی کوردستان بووە، سەركەوتنی بەشێكی دیكەی كوردستان. بۆیە تێکۆشانی پەکەکە راستەوخۆ کاریگەری لەسەر گەلی رۆژهەڵاتی کوردستان داناوە. ئەو كاریگەریەش لەکاتی رفاندن و دیلگرتنی رێبەر ئاپۆ لە 15ی شوباتی ١٩٩٩ی زاینی دەركەوت. بینیمان لە رۆژهەڵاتی كوردستان لە 3ی رەشەممە، خۆپیشاندانێكی سەرتاسەری بۆ خاوەندارێتی لە رێبەر ئاپۆ پێکهات. ئەو خاوەنداریەش سەلماندی كە گەلی كورد لە رۆژهەڵاتی كوردستان و گەلانی ئازادیخواز لە ئێراندا بیر و هزر و فەلسەفەی رێبەر ئاپۆیان لاپەسەندە. لەبەر ئەوەیە خاوەنداریەكی بێوێنەیان کرد.

 دواتر بۆ ئەوەی ئەو بیر و فەلسەفەیە بگوازرێتەوە ناوخۆی رۆژهەڵاتی كوردستان گەنجان بە هۆگرییەوە روویان لەم بزوتنەوەیە كرد و بەشداری ناو ریزەکانی پەکەکە بوون. دواتر پەژاك لەسەر بیر و فەلسەفەی رێبەر ئاپۆ لە ٤ی نیسانی ساڵی ٢٠٠٤ دامەزرا و تا ئێستا لەسەر ئەو بیر و فەلسەفەیە تێكۆشانی خۆی بەردەوام دەكات. واتا لەدایکبوونی پەکەکە كاریگەری گەورەی لەسەر گەلی کورد لەرۆژهەڵاتی كوردستانیش دروستكردووە. تەنانەت لە بواری پارادیگما و ئایدیۆلۆژیەوە كاریگەری درووست كردووە كە ئەمڕۆ گەل لەناوخۆی رۆژهەڵاتی كوردستاندا لەسەر ئەو پارادیگمایە كار دەکات. بە پارادیگمای ئیكۆلۆژی بەرپەرچی زیهنیەتی کاولکاری ژینگەیی رژێمی داگیركەری ئێران دەداتەوە. لەسەر پارادیگمای ئازادی ژن و پارادیگمای کۆمەڵگای دیموكراتیک لە دژی رژێمی داگیركەری ئێران تێکۆشان دەکرێت.

لەسەر ئەو فەلسەفەیە پەژاک ئەمڕۆ گرنگی بە رێكخستن كردنی كۆمەڵگە، شۆڕشی زیهنی، پاراستنی رەوا، پەروەردەكردنی كۆمەڵگە، دامەزراندنی سیستەمێكی نوێ و مۆدێلێكی نوێ دەدات، چونکە بە عەقڵیەتی دیموكراسی خەمڵێندراوە. بۆیە پەژاك بڕوای بەوە هەیە دیموكراسی بەبێ كردار وەك مرۆڤێكی بێدەنگە. چون ئەمڕۆ كردار زمانی دیموكراسیە. لەکاتێکدا لەرۆژهەڵاتی کوردستان زۆر حزب و لایەن لەئارادان کە وتە و كرداریان نییە، بۆیە وەک مرۆڤێكی بێدەنگن و هیوا و باوەڕی کۆمەڵگا ناگەشێننەوە. بەڵام پەژاك چون پارتێکی كردارە بووەتە هیوای گەلی كورد و تایبەت ژنان و گەنجان. بۆیە دیموكراسی بەبێ كردار نابێت. لەبەر ئەوەیە کە پەژاك و پەكەكە و ئەو بزووتنەوانەی سەر بە بیر و رامانی رێبەر ئاپۆن خاوەن كردار و گوتنن. كردار و گوتنیان یەكە. لەبەر ئەوەیە هیوای مرۆڤایەتییان گەشاندوەتەوە. بۆیە ئێمەیش وەك پەژاك ئەو فەلسەفەیەی تایبەت لەناو زیندانەکان، لە چیاكان و لەنێو شەقامەکاندا گەشێنراوەتەوە بۆخۆمانی بەبنەما دەگرین. چون گەلی کوردیش لە رۆژهەڵاتی كوردستاندا سەرلەنوێ لەدایكبوەتەوە، سەرلەنوێ پارتیبون، رێكخستن بوون، هزر و رامان سەر لەنوێ گەشەی کردووەتەوە. تایبەت شۆڕشی ژن ژیان ئازادی كە لەئێران و رۆژهەڵاتی کوردستان سەریهەڵدا بەرهەمی ئەو بیر و فەلسەفەیە، تایبەت بەرهەمی دامەزراندنی پەكەكەیە كە ئەمڕۆ لە رۆژهەڵاتی كوردستاندا سەمەرەكەی دەرکەوت.