کۊمیتەی ۋېڕاوەبەری پەکەکەی ئەرەیاۋناش، گەلوو کورڎی و ژەنۍ کورڎی، کە شۊڕشگێڵ و جەنگاوەری قارەمان و فەرمانڎۍ و گەریلۍ پېسە لەیلا سورخوێن-ېشا چنە هۊرکەوتەبۊ، حەجگیز شکس نمارا.

پەکەکە یاۋنەریېش بۊنەو شەهادەتو "لەیلا سورخوێن"ېوە ۋەڵاکەرڎۊ و جە یاۋنەریەکەنە ئامان:

"گرڎ ڕوۋۍ سەرو ئاستو سەرمەشقانە هامڕێکېما ملانە قافڵەو گەشمەرڎاوە. جە دماین نمونەنە ڕۊڵۍ قارەمانە و ئازاو ژەنا و خەڵکو ئامەڎی و گەلوو کورڎسانی، ئەنڎامەو کۊمیتەی ناوەنڎیی پارتەکەیما پەکەکەی، ئەنڎامەو دەسەی فەرمانڎەیی هەپەگەی و یەژا ستاری، فەرمانڎۍ مېڎان و بۆتانی هامڕا "لەیلا سورخوێن"ە گەشمەرڎۍ بیە. بە ڕێز و وەشەویسی و پنەزانایۊ یاڎو شۊڕشگێڵە و جەنگاوەرەی وېبەخشەو خەتەو فیدایی ئاپۆیی هەڤاڵە "لەیلا سورخوێن"ۍ مکەرمېوە، وەعد مڎەیمۍ، کە هەمیشە ئەرەکۊشاکەیش پۍ ئازاڎیی وەڵۍ وزمۍ و بە سەرکۊتەیش بیاۋنمۍ. گەل و ژەنۍ کورڎی، کە شۊڕشگێڵە و جەنگاوەرۍ ئازا و فەرمانڎۍ پېسە "لەیلا سورخوێن"ېش چنە هۊرکەوتەبۊ حەجگیز شکس نمارۊ، حەجگیز ژیای کۊیلایەتی قەبوڵ مەکەرا و هەمیشە سەرکۊتەی گۊرە سەرو خەتەی ئازاڎینە بەدەس مارا. جە کەسایەتیی هەڤاڵە "لەیلا سورخوێن"ېنە یاڎو گەشمەرڎە ئازاکا مانگەو ئایاری و گرڎو گەشمەرڎا کۊشیای پۍ ئازاڎیی بە ڕێز و پنەزانایۊ مکەرمېوە.

سەرو خەتەو عەگیدی و زیلانۍ بیە بە فەرمانڎۍ

هەڤاڵەما "لەیلا سورخوێن"ە جە خانەواڎېوە ۋڵاڎپارێزو مەنتیقەو بسملی جە ئامەڎ جە عمری جوۋانیشۊ پەیوەنڎیش بە ریزەکا پەکەکەیوە کەرڎ. دلۍ پەکەکەینە هەمیشە جە ڕیزەکا گەریلاینە خەتەو وەڵېوە بۍ. ئاڎە هەمیشە گەرەکشبۍ، جە مەنتیقە سەختەکانە مەنۊوە، چونکی جە کۊشیای ۋېشەنە حیچ ڕاگیری و تەنگوچەڵەمېوە نەشناسۍ. جەنگاوەرێوە فیڎاکارە و دڵسۊزە بۍ، گرڎو ئاستەکانە فەرمانڎەییش کەرڎەبۍ. پېسە ئاوۍ پاکە بۍ. جە ڕوو ئایدۊلۊجی و ڕێکوستەیۊ، ۋېش جە فەلسەفەو ڕابەرایەتینە قووڵ کەرڎەبېوە. پی تایبەتمەنڎییاشە هێز و ورە بە هەڤاڵەکاش بەخشۍ. هامڕێوە بۍ، کە هەمیشە وەشەویسەبۍ و چەمۍ شۊنیشەرە گېڵېنۍ. جە کۊشیای ئازاڎیی ژەنانە پاگیرە بۍ؛ جە کەسایەتیی ئاپۆیینە خۊتان پیمەر و ستاندارد و تایبەتمەنڎیېوە بەقوەت و سەرمەشقەبۍ.

جە گرڎو قۆناغەکا کۊشیاینە پیمەرەکا پارتیی جە کەسایەتیی ۋېشەنە نوێنەرایەتی کەرۍ، پۍ بەدیئارڎە و جابەجېکەرڎەو پیمەرەکا پارتی جە ئاستو سەرمەشقینە کۊشیا. بە کۊشیای سەرکۊتانەو ۋېش سەرو خەتەو سەرکۊتەی ئاپۆیی، یاگۍ ۋېش جە دەسەی فەرمانڎەیی یەژاستاری و هەپەگەینە گېرت. چنڎین ساڵۍ جە ئاستو ئەنڎامیەتی کۊمیتەو ناۋەنڎی پەکەکەینە خزمەتش کەرڎ. جە شێوازو جەنگینە هەمیشە خەتەو سەرکۊتەیش پۍ ۋېش بە بنەما گېرتەبۍ. سەرو خەتەو "عەگیدی و زیلان"ېنە بیە بە فەرمانڎۍ. پۍ جابەجېکەرڎە و بەدیئارڎەی ستراتیجی جەنگو گەلی شۊڕشگێڵی رەنج و حۊلېوە فرە گۊرەش دا. سەرو ئا بنەمۍ، ئا فەراغەی، کە بەمەڵامەتو گەشمەرڎەبیەو فەرمانڎۍ یەژا ستاری هامڕا "دەلال ئامەڎ"ۍ ڕوۋەشدا پەڕکەرڎۊ، جە بۆتان جەنگش کەرڎ و گەشمەرڎۍ بیە.

دەورېوە گرنگش پۍ ۋەڵابیەیۊ ئاخېزو 'ژەنۍ، ژیای، ئازاڎیی' جەهانەنە گېڵنا

ڕابەر ئاپۆ ۋاتش، 'پەکەکە پارتو ژەنان'. جمیەرو ئازاڎیی ئێمە پۍ ژەنا پا تەماشەکەرڎە و فەلسەفۊ بی بە گەریلا، بی بە پارتو سیستەمو ژەنېش خوڵقنا. بە کۊشیای ئازایانە و قارەمانانەو ۋېش بی بە هێزێوە سەرمەشق. سەرو بنەماو ئایدۊلۊجیای ئازاڎیی ژەنا، هەرمانەش کەرڎە، کە ژەنی ئازاڎۍ با، با بە خۊتان ئیراڎە. چی چوارچێوەنە ژنۊلۆژیی ڕابەر ئاپۆی ئارۊ گرڎو کورڎسانی و جەهانینە ۋەڵاو بیەنۊ. جە ڕوو ئایدۊلۊجی، ڕێکوستەی و سیاسییوە ئاخېزو ئازاڎیی ژەنا یاۋان بە ئاستێوە گرنگ. هامڕا "لەیلا سورخوێن"ە یۊبۍ جە شۊڕشگێڵە سەرمەشقەکا ئی کۊشیایە و وەڵېکۊتە تاریخیە. دەورېوە گرنگش جە ۋەڵاکەرڎەیۊ ئاخېزو 'ژەنۍ، ژیای، ئازاڎیی' سەرانسەرو جەهانینە گېڵنا.

هامڕا "لەیلا سورخوێن"ە چی قۊناغ و پرۊسە قورسەو کۊشیاینە وەرپرسیاری، فیداکاری و ئازایی ئاپۆییش جە بەرزتەرین ئاستەنە نیشانە دا. جە دژوو سیستمو ئەشکەنجە و گۊشەگیری ئیمراڵی، جە ریزەکا وەڵېوە بەشڎاریش جە کۆشیای پۍ ئازاڎیی جەستەیی ڕابەر ئاپۆی کەرڎ. ساڵەهای ساڵ فەرمانڎۍ مدرامانی تاریخی بۊتانی بۍ. پېسە فەرمانڎۍ "دەلال ئامەڎ"ۍ، جە ئامەڎۊ بەشڎارەو کۊشیای بیە و چنی بۊتانی ئامېتۍ بیە و بیۍ بە یۊ، ۋڵاڎپارێزی و نیشتمانپەروەری و مدرامانو گەلی و ژەنا کورڎیش یاۋنا بە بەرزتەرین ئاست. وەرو ئانەیچ پۍ وڕناو فاشیزمی ئاکەپە-مەهەپەی و برەودای بە ئامای دی کورڎسانی ئازاڎی و تورکیای دیموکراتیکی، ڕەنجێوە فرەش دا و کۊشیا و دەورېوە سەرەکییش گێڵنا.

بە دڵنیاییوە، ئی ڕاسییە و ڕەنجە گۊرەکە و فەرمانڎە نەمرەکا بۊتانی و هامڕا "لەیلا سورخوێن"ۍ حەجگیز ۋیر مەکەرمۍ. هامڕا "لەیلا سورخوێن"ە بە هەڵۋێسو ۋېش، بەشڎاریکەرڎەی ۋېش، دڵسۊزییەکەش پۍ ڕاسیی ڕابەر ئاپۆی و تایبەڎمەنڎیی ۋېش، کە ملش بە حیچ سەختی و زەحمەتیېوە نەڎا و ۋیەرنێشا، هەمیشە ڕا نیشاندەرەما بۍ. سەرەتا ژەنی و جوۋانۍ ئامەڎی و بۊتانی، جوۋانۍ و گەلوو کورڎسانی بە دڵنیایوە بە تەمامی چی فەرمانڎە نەمرۍ میاۋانە، زیاتەر مەیانە دلۍ ڕیزەکا گەریلای، کۊشیای مکەرا و سەرکۊتەی بەدەس مارا. سەرو خەتەو ڕابەرایەتی و گەشمەرڎاوە وەرگری و مدرامان مکەرا، سیستەمو ئەشکەنجەو ئیمراڵی دلېنەبەرا و  ئازاڎیی جەستەیی ڕابەر ئاپۊی مسۊگەر کەرا. چی کۊششە مبارەکەنە پۍ ئازاڎیی و بیەیی، گەشمەرڎە ئازاکېما هەمیشە شۊڵەچراوەو ئازاڎیی با، کە ڕاکۍ وەرو دەمیما پۍ ڕۊشن مکەراوە.

سەرو ئی بنەمۍ، ئێمە جارێوەتەر بە ڕێز و پنەزانایۊ یاڎو فەرمانڎۍ نەمرەو ژەنا و گەلوو کورڎی هامڕا "لەیلا سورخوێن"ۍ مکەرمېوە و داوا جە ژەنا و جوۋانا مکەرمۍ، کە سەرو راو رېبازەکەو هامڕا لەیلۍ بە بەقوەتی بەشڎاری جە کۊشیای ئازاڎینە کەرا!."

هـ .ش