ئامەد شاهۆ: "پەکەکە نەک تەنها کاریگەری لەسەر گەلی کورد هەیە بەڵکۆ کاریگەری لەسەر هەموو گەلانی جیهان دروستکردووە و بۆتە هۆکاری دروست بوونی شۆڕشیکی مرۆڤایەتی، سەلمێنەری ئەو شۆرشەش هەڵمەتی "ئازادی جەستەیی بۆ ڕێبەر ئاپۆ و چارەسەری سیاسی بۆ کێشەی کوردە".
بەشی دووەم:
* هەڵمەتی ئازادی جەستەیی رێبەر ئاپۆ و چارەسەری پرسی كورد لەلایەن دۆستانی گەلی كورد و ئەكادیمیسیەن و ئازادیخوازانەوە لە 74 ناوەندی جیهان دەستی پێكرد و تاكوو ئێستاش بەردەوامە، دەمانەوێ بزانین گرنگی ئەم هەڵمەتە چییە؟ لەكاتێكیشدا لەچوارچێوەی ئەو هەڵمەت و چالاكیانەی كەوا لە رابردوودا پێك دەهات، چی جیاوازیەك لەنێوانیاندا هەیە؟
- دەستپێكردنی ئەو هەڵمەتە لە 10ی ئۆكتۆبەر دوابەدوای ساڵڕۆژی گەلەكۆمەی نێونەتەوەیی لەسەر رێبەر ئاپۆ لەلایەن دۆستانی ئازادیخوازی گەلی كورد چالاكیەكی واتادار، مێژوویی و دانسقەیە. چون وەك باسمان كرد دیموكراسی بەبێ كردار نابێ، لەبەر کرداری پەکەکە تا دەڕوات لەئاستی جیهاندا بەربڵاو دەبێت و دەرفەتی دیمۆکراتیزاسیۆن لەناوچەکە خۆش دەکات. بۆیە بەرخۆدانێك كە پەكەكە لەناوچەكە بەڕێوەی دەبات، نەتەنیا كاریگەری لە كوردستان داناوە، بەڵکوو كاریگەری لەسەر مرۆڤایەتی کردووە. هەڵوێستی دیموکراتیخوازانەی پەکەکە بووەتە هۆکار كە ئەمڕۆ زۆر كەس بە بەرپرسیارانە مامەڵە بکەن و هەڵمەتێك لەژێر "ناوی ئازادی جەستەیی بۆ رێبەر ئاپۆ و چارەسەری پرسی كورد" رابگەیەنن؛ ئەو هەڵمەتە دەتوانێ بەرپرسیارێتی ئێمەش وەك گەلی كورد زیاتر بكات. واتا رۆڵ و بەرپرسیارێتیەكی مێژوویی دەخاتە سەرشانمان، لەهەمان کاتدا دەكەوینە 46مینی ساڵی دامەزراندنی پەكەكە و ئەو هەڵمەتەش هاوکاتە کەگەڵ ساڵی نوێی تێکۆشانی پەکەکە، بۆیە واتا و گرنگی زیاتر دەبێت. هەڵبەت بە کەڵک وەرگرتن لەئەزمونی 45مین ساڵی پەكەكە دەتوانین تێكۆشانێكی سەردەمیانە دەستپێبكەین.
دامەزراندنی پەكەكە چی لێكەوتەیەكی بۆ گەلی كورد و گەلانی ئازادیخواز هەبووە، کە رێبەر ئاپۆ لەلایەن داگیركەرانەوە كرایە ئامانج و ترس و دڵەڕاوکێی خستە ناو دڵی نەیارانی کوردەوە، کە پیلانیان داڕشت تا ئەو دەستكەوتانەی لە كوردستان بەدیهاتوون لەناوی ببەن. دیارە ئەم هزرەیە دەتوانێت چارەسەری بۆ هەموو پرسە هەڵپەسێردراوەكانی ناوچەكە دەستەبەر بكات، بەتایبەت بۆ پرسی ژن و پرسی كورد بە بیری رێبەر ئاپۆ دەتوانرێت چارەسەری بنەڕەتی بێتە ئاراوە. بۆیە ئەو گەلەكۆمەیە جارێکی دیکە بە واتای نكوڵی کردن لە هەبوونی كوردە. واتا جارێکی دیکە پاكتاوكردنی گەلی كورد لەسەر مێزی داگیركەرانە. بۆیە ئەمڕۆ پەكەكە بۆتە لایەنێك كە ئەو سیاسەتە قبووڵ ناكات و خاوەندارێتی لە پرسی كورد، ئازادی و دیموكراسی دەكات. بەپێی ئەوەش لەناوچەکەدا كرداری هەیە و تێكۆشانی بۆ دەكات. لەو پێناوەدا قوربانی مەزنی داوە، گیانبازی بۆ ئەو پرسە دەكات.
بۆیە لە ساڵڕۆژی لەدایكبوونی پەكەكەدا ئەو هەڵمەتە دەتوانێ زیاتر واتادارتر ببێت، واتاكەی چیە؟ ئەمڕۆ دەبینین زۆر رۆشنبیر، ئەكادیمیسیەن، فەیلەسوف، حزبی چەپ، ئازادیخواز و پەرلەمانتار لە ئاستی جیهاندا خاوەن هەڵوێستن. ئەو هەڵوێستانەش مایەی دڵخۆشی و سەربەرزییە بۆ گەلی كورد، چونكە ئاماژە بەوە دەدەن کە ئازادی رێبەر ئاپۆ هاوكات ئازادی ئێمەیشە. بۆچی وا دەڵێن؟ چون دیموكراسی و ئازادی لەناو سیستەمی دەوڵەتیدا لەناو قەفەسدایە. واتا دیموکراسی بەردەوام هەڕەشە و گوڕەشەی لەسەرە و دەرفەتی پراکتیزەکردنی پێ نادرێت، چونكە لەجێگایەکدا عەقڵیەتی دەوڵەت سەروەر بێت، لەو جێگایەدا ئازادی و دیموكراسی بوونی نابێت. واتا تا ژن كۆیلە بێت، هیچ شتێك بەناوی ئازادی و دیموكراسی دەستەبەر نابێت. بۆیە ئەو گەلانە باش هەستیان بەو پرسە كردووە. بۆیە بە ئاشنابوون بە بیر و هزری رێبەر ئاپۆ کلیلی چارەسەری پرسەکان دەبینن. بۆیە سیستەمی نەتەوەی دیموكراتیك دەتوانێت ببێتە كلیلی چارەسەری پرسەكانی رۆژهەڵاتی ناوین. دەتوانێت ببێتە كلیلی چارەسەری پرسی فەلەستین و ئیسرائیل، پرسی كورد و دەوڵەتانی عەرەب، دەوڵەتی فارس، دەوڵەتی تورك، دەوڵەتانی سەرمایەداری. واتا بە سیستەمی نەتەوەی دیموكراتیك و بە چەسپاندنی كۆنفیدڕاڵیزمی دیموكراتیك دەتوانرێ لە ناوچەكەدا ئاشتی و ئارامی بەرقەرار ببێت. بێگومان ئەوەش بەبێ ئازادی جەستەیی رێبەر ئاپۆ مسۆگەر نابێت، چون ئێمە ئەگەر باسی دیموكراسی بكەین و باسی ئاشتی و ئارامی بكەین رێبەر ئاپۆیش لەزینداندا بێت لەبنەڕەتدا نكوڵی كردنی ئەو حەقیقەتەیە. نكوڵی كردن لە هەبونێك لە نەتەوەیەكە كە ئەمڕۆ رووبەڕوی قڕكردنی كلتووری و قڕكردنی سیاسی دەبێتەوە. لەهێرش و داگیرکەریەکانی چەتەکانی داعشەوە بگرە تا كردەوەكانی دەوڵەتی فاشیستی تورك و رژێمی داگیركەری ئێران ئەوە دەسەلمێنێت كە مەترسیەكی جددی لەسەر گەلی كورد لەئارادایە. بۆ ئەوەی گەلی كورد دڵنیا بێ، مەرجی یەكەمی چارەسەری پرسی گەلی كورد و گەلانی ئازادیخواز ئەوەیە كە دەبێت رێبەر ئاپۆ بە جەستەیی ئازاد بێ و ببێتە لایەنێكی چارەسەری ئەو كێشەیە و بەو شێوازەیە كە دەتوانرێت چارەسەرییەكی بنەڕەتی و هەمیشەیی بۆ ئەو پرسە دەستەبەر ببێت.
پەکەکە خاوەن سیستەمێكی دیموكراتیكە
* لەم هەڵمەتەدا ئەوەی كە پێش هەر چین و توێژێك خاوەندارێتی لەو هەڵمەتە بكات ژنان و گەنجانن، رۆڵ و ئەركی ژنان و گەنجان لەم هەڵمەتەدا چۆن هەڵدەسەنگێنن؟
- رێبەر ئاپۆ پێناسەیەكی وای هەیە دەڵێت: "ئێمە بە گەنجێتی دەستمان پێكرد و بە گەنجێتیش سەر دەكەوین"، بۆ ژنیش دەڵێت "تا ژن ئازاد نەبێت كۆمەڵگە ئازاد نابێت". ئەم دوو پێناسەیە پڕ بە پێستی گەوهەری ئەو هەڵمەتەیە. واتا ئەمڕۆ ژن و جوان ئازادی خۆیان بە ئازادی رێبەر ئاپۆ بەستۆتەوە. چون رێبەر ئاپۆ لەسەرەتای تێكۆشانی خۆوە تا بە ئەمڕۆش لە ئیمڕاڵیدا لە پێناو ئازادی ژن و بەرقەراری ئاشتی و دیموكراسی تێكۆشان دەكات.
رێبەر ئاپۆ لەهەر قۆناخێكدا بە پێناسە و فەلسەفەیەکی نوێوە ویستویەتی عەقڵیەتێك بگۆڕێت، بەتایبەت عەقڵیەتی پیاوسالاری بگۆڕێت و لەناو بزووتنەوەی ئاپۆییدا ئەمڕۆ لەسەر ئەوە تێكۆشانێكی بێ وچان دەكرێت. ئەم فەلسەفەیەش ئەو هیوایەی بۆ ژن گەشاندوەتەوە كە پەکەکە خاوەن سیستەمێكی دیموكراتیكە. ئەوەش دەتوانێت ببێتە مۆدێلێكی دیموكراتیك بۆ گشتی كۆمەڵگە. بۆیە ئەمڕۆ ژن لە جیهاندا روو لە پەكەكە دەكەن. چونكە رێبەر ئاپۆ دەیەوێت سیستەمێكی دیموكراتیك بە پێشەنگایەتی ژن و جوان بونیاد بنێت. ئەمڕۆ لەنێو پەكەكەدا ژنان و گەنجان بە گیانبازیەوە گیانی خۆ فیدا دەكەن تا سیستەمێكی دیموكراتیك لەناو کۆمەڵگادا بەرقەرار بکەن. بۆ گۆڕانکاری و شۆڕشی زیهنی و ویژدانی شەو و رۆژ لەنێو تێكۆشاندان.
ئەو هەڵمەتە نیشانی دا کە پرسی ژن، پرسی كورد و پرسی رێبەر ئاپۆ دابڕاو لەیەک نیین. چون هەر یەک لەوانە مژاری زیهنی، ویژدانی، ئەخلاقی و فەلسەفین. بۆیە رێبەر ئاپۆ ئەمڕۆ سیستەمی كۆنفیدڕاڵیزمی دیموكراتیكی داهێناوە. وتوویە کە پێشەنگی ئەو سیستەمەش ژن و جوانن. چون ژن و جوان لەناو ئەم سیستەمەدا دەبنە خاوەن ناسنامە و ئیرادە. واتا ژن و جوان بە رەنگی خۆیان لەو سیستەمەدا بەشداری دەکەن. بۆیە رێبەر ئاپۆ كۆنفیدڕاڵیزمی دیموكراتیكی جوان و كۆنفیدڕاڵیزمی دیموكراتیكی ژنی راگەیاند تا ژن و جوان بە رەنگ و دەنگی خۆیان لەناو ئەو سیستەمەدا جێ بگرن. بۆیە راشکاوانە دەبینین کە لە ئاستی جیهاندا ژنان و گەنجان پێشەنگایەتی ئەو هەڵمەتە دەکەن. لەو پێناوەدا كۆنفرانسی جیهانی گەنجان بۆ خاوەندارێتی لە رێبەر ئاپۆ بەڕێوە چوو؛ ئەوە مۆركی خۆی لە تێكۆشانی ئازادیخوازی لەجیهان دا. ئەوەش گەورەبوون و فراوان بوونی پەکەکە دەخاتەڕوو.
بۆ ئەوەی رێبەر ئاپۆ ئەمڕۆ بە جەستەیی ئازاد بێت و چارەسەری پرسی كورد بێتە ئاراوە، ژن و جوان لەناو شۆڕشدا ئاڵای پێشەنگایەتیان هەڵگرتووە. تایبەت لەبەرەكانی شەڕ، لە زاپەوە تا گارێ و ئاواشین دەبینین کە ژن و جوان پێشەنگایەتی شۆڕش دەكەن و بە ئەوینەوە بەرەنگاری داگیركەران دەبنەوە و رۆژانە چالاكی بێ وێنە تۆمار دەكەن. ئەوەش بێگومان لە پێناو ئازادی جەستەیی رێبەر ئاپۆ و چارەسەری پرسی كوردە.
لە ئێران و رۆژهەڵاتی كوردستانیش بینیمان کە لەشۆڕشی ژن ژیان ئازادیدا ژن و جوان پێشەنگایەتیان كرد. تایبەت خوێندكارانی زانكۆ و دوا ناوەندیەكان ئاڵاهەڵگری شۆڕش بوون. داخۆ لەبەرچی ئەوە روویدا؟ لەوەدا گومان نییە کە ژنان و گەنجان ئەمڕۆ ئازادی رێبەر ئاپۆ بە ئازادی خۆیان دەبینن. بڵاوبونەوەی مۆدێڵی رێبەر ئاپۆ بە بڵاوبونەوەی ئازادی و دیموكراسی و بە ئیرادەبوونی خۆ لە قەڵەم دەدەن. لەو بڕوایەدام کە ئیدی چ شۆڕش و سەرهەڵدانێکی سەرتاسەری لە ناوچەكە سەرهەڵبدات، بە هزر و رامانی رێبەر ئاپۆ بڵێسەدار دەبێت. ئەوەش مەرگ و نەمان بۆ داگیركەری و زوڵم و ستەم و وەلاوەنانی عەقڵیەتی پیاوسالارییە.
هەڵمەتی ئازادی جەستەیی رێبەر ئاپۆ، شەپۆڵی شۆڕشی ژن ژیان ئازادی گەڕاندەوە کوردستان
* هەڵمەتی ئازادی رێبەر ئاپۆ و چارەسەری پرسی كورد چی پەیوەندیەكی لەگەڵ شۆڕشی ژن ژیان ئازادی هەیە؟
- هەڵمەتی ئازادی جەستەیی رێبەر ئاپۆ و چارەسەری پرسی کورد و شۆڕشی ژن ژیان ئازادی پەیوەندیداری یەکترن. چون شۆڕشی ژن ژیان ئازادی ساڵێكی خۆی تێپەڕ كرد و كەوتینە ناو دووهەمین ساڵیەوە. ئەو هەڵمەتەش بێگومان لە 10ی ئۆكتۆبەرەوە راگەیەندراوە. داخۆ لە چی بوارێكەوە دەتوانین گرێدراوی یەكیان بکەین؟ بێگومان شۆڕشی ژن ژیان ئازادی لە پڕا سەریهەڵنەداوە، بەڵکوو پاشخانێكی مێژوویی تێكۆشانی هەیە. تایبەت ژنان لەمێژووی ئێراندا بەردەوام رووبەڕوی عەقڵیەتی پیاوسالاری و دەسەڵات بوونەتەوە. هاوکات لەم نیو سەدەی دوایدا كاریگەری بزووتنەوەی كورد بە پێشەنگایەتی ژنان كاریگەری لەسەر جووڵانەوەی ژنان لەناوخۆی ئێراندا هەبووە و تا بە ئەمڕۆش بەردەوام دەبێت. تایبەت شەهید بوونی ژینا ئەمینی بووە چەخماخەی هەڵگرساندنی شۆڕشی ژن ژیان ئازادی. لە بنەڕەتدا ئەو شۆڕشە پاشخانێكی هزری و پارادیگمایەكی لە پشتە كە بە فەلسەفەی ژن ژیان ئازادی خەملێندراوە. لەم شۆڕشەدا ژنان بە پارادیگمایەك بەرەنگاری رژێمی داگیركەری ئێران بوونەوە، چون ئەو پارادیگما لە رۆژئاوا بە شۆڕشی باکوور و رۆژهەڵاتی سوریا، بە فەلسەفەی ژن ژیان ئازادی بەڕەنگاری داعش بوویەوەو داعشی تێكشكاند و كۆتایی بە عەقڵیەتی تاریكپەرستی داعش هێنا و ئەو شۆڕشەش كاریگەری لەسەر گەلانی جیهان درووست كرد و هیوای مرۆڤایەتی گەشاندەوە.
لە ئێرانیشدا هەمان رەوت دووپات بوویەوە و جارێكی تر فەلسەفەی ژن ژیان ئازادی سەریهەڵدایەوە و هەر كەس ئامێزی بۆ ئەو فەلسەفەیە كردەوە. بەتایبەت ژن رووی لەو فەلسەفە و پارادیگمایە كرد و بە عەشق و هۆگرییەوە بەشداری خۆی بۆ سەرخستنی ئەو پارادیگمایە كرد. ئەوەش عەقڵیەتی بەستەڵەك كراوی داگیركەری ئێرانی پارچەكرد و هەستی ئازادیخوازی بووژاندەوە. تایبەت دروشمێك لەدایكبوو کە هەر کەس ئەو دروشمەی بە هەبوون و ئیرادەی خۆ لەقەڵەم دا. چون لەناو ئەو فەلسەفەیەدا خەون و خەیاڵەکانی خۆی تێدا دەبینیەوە. لەبەر ئەوەیە لە قۆناخێكی كورتدا یەكبونێك لەنێوخۆی ئێران و لەنێو ژنان و پێكهاتەكانی عەرەب، بەلوچ، ئازەری، كورد، فارس، مازەنی و هەموو پێكهاتەكانی ناوخۆی ئێران درووست کرد. واتا بە عەقڵیەتێكی هاوبەش لە جوگرافیایەكی هاوبەش، هەڵوێستێکی هاوبەش لەدژی عەقڵیەتی پیاوسالاری رژێم بە فەلسەفەی ژن ژیان ئازادی درایەوە.
بۆیە ئەم یەكبوونە مۆڕاڵ و بوێری ناو کۆمەڵگە زیاتر کرد. واتا شەپۆلی ئەو یەکبوونە حەڵقە بە حەڵقە بڵاو بوویەوە. شەپۆلێك كە دەنگەكەی لەرۆژهەڵاتی ناوین و سەرتاسەری جیهان بەر بڵاو بوو. لەبەر ئەوەی شۆڕشی ژن ژیان ئازادی بووە شۆڕشێكی جیهانی و گەردونی. بۆیە جارێكی دیكە دەنگی شەپۆلی ئەو شۆڕشە گەڕایەوە رۆژهەڵاتی ناوین و كوردستان. چون كەسانی ئازادیخواز، چەپ، سۆسیالیست و دیموکراتیک و كەسانی ناوداری جیهان هۆگری بەرهەمەکانی ئەو شۆڕشە بوون. داخۆ سەرچاوەی هێز و وزەی ئەو شۆڕشە کێ و كوێیە؟ بێگومان سەرچاوەکەی لە ئیمڕاڵیە. رێبەر ئاپۆیە. بۆیە ئەو کەس و لایەنانە هاتنە لای یەك و هەڵمەتێكیان لەژێر ناوی ئازادی جەستەیی بۆ رێبەر ئاپۆ و چارەسەری پرسی كورد راگەیاند. بەو هەڵمەتە باوەڕی و پاڵپشتی خۆیان بۆ پارادیگمای کۆمەڵگای دیموکراتیک، ژینگەپارێز و ئازادی ژن راگەیاند. چون ئەم پارادیگمایە ئیدی بووەتە پارادیگمایەكی جیهانی. بەو شێوەیە دەنگ و رەنگەكەی گەڕایەوە ناو كوردستان. بۆیە ئەو هەڵمەتە بەرپرسیارێتی گەلی کورد لەبەردەوامی تێکۆشان زیاتر دەکات. واتا ئەوە نیشان دەدات کە گەلی کورد پێشەنگایەتی دیموكراتیزاسیۆنی ئێران، توركیا، عێراق، سوریا و رۆژهەڵاتی ناوین و تەنانەت دیموكراتیزاسیۆنی جیهان دەكات. ئەوەش بەدیهێنانی پڕۆژەی كۆنفیدڕاڵیزمی كوردستان، كۆنفیدڕاڵیزمی رۆژهەڵاتی ناوین و كۆنفیدڕاڵیزمی جیهانی رێبەر ئاپۆ نیشان دەدات کە پرۆژەی چارەسەری پڕ بە پێستی کێشەکانی ناوچەکە دەکات.
تا گۆشەگیری لەسەر رێبەر ئاپۆ نەشكێنرێت، گۆشەگیری لەسەر شۆڕشی ژن ژیان ئازادی هەڵناگیردرێت
* بۆ ئەوەی هەڵمەتی ئازادی جەستەیی رێبەر ئاپۆ و چارەسەری پرسی كورد بگاتە ئامانجی خۆی رۆڵی گەلی كورد لە رۆژهەڵاتی كوردستاندا چۆن هەڵدەسەنگێنن؟
- بە بڕوای من لە ئاین و باوەڕیەکاندا بابەت و تەوەرەی گرنگ دەورژێندرێن. بۆ ئەوەی تاک ئەرك و بەرپرسیاری سەرشانی خۆی بە جێ بهێنێت. بۆ ئەوەی تاک بگاتە مەعشوق و ئامانجی خۆی، دەبێ بێ ناوبەر لەپێناو ئامانجیدا خزمەت بکات و هەوڵ و تەقاڵا بدات. واتا رەنج بدات و كردەوەی چاك بکات. گەلی كوردیش بۆ ئەوەی بگەیەتە مەرام و ئامانج و هیوای خۆی، دەبێ شەو و رۆژ رەنج بدات. چون ئەو هەڵمەتەش واتای چوونە سەر کارە. بۆیە لە کەوتنە 46مین ساڵیادی دامەزراندنی پەكەكە پێویستە بە هەڵمەتی ئازادی جەستەیی رێبەر ئاپۆ و چارەسەری پرسی کورد بڕۆینە سەر کار و بەشداری خەبات بین. پێویستە ئامانجی سەرەکی هەر تاکێکی ئازادیخواز ئازادی جەستەیی رێبەر ئاپۆ و چارەسەری پرسی كورد بێت. ئەگەر ئامانجمان ئەوە نەبێ ئەو كاتە ناگەینە چارەسەری بنەڕەتی و داگیركەری لەسەرمان لانابرێت و زەبری چەك و چۆڵ، لەسێدارەدان بەردەوام لەسەرمانە. بۆئەوەی كۆتایی بە؛ سیاسەتی لەسێدارەدان، گرتن، كوشتنی كۆڵبەر، ژنكوژی، گەنجكوژی، هەژاری، کۆچبەری و هەڵاتنی مێشكەكان بهێنین بە سەرکەوتنی ئەو هەڵمەتە مسۆگەر دەبێت. چون ئەو هەڵمەتە لە بنەڕەتدا ئازادی گەلی كورد و گەلانی ئازادیخواز دەستەبەر دەكات. بۆ ئەم هەڵمەتەش بڕوا دەكەم ژن، جوان، ئەكادیمیسیەن، پەرلەمانتار، مافناس، كرێكار، رێكخراوە مەدەنیەكان، رێكخراوەكانی مافی مرۆڤ ئەركی مێژوویی، ئەخلاقی و ویژدانی خۆیان بە جێ دێنن و بە پێی دەرفەتی خۆیان بە رێ و ڕێبازی دیموكراتیك بەشداری هەڵمەتەكە دەکەن. ئیدی گرنگی قۆناخەکە ئەوە بەسەر هەر تاکێکی کورد و ئازادیخواز فەرز دەکات کە ژیانی رۆژانەی خۆی بەو هەڵمەتەوە دەست پێبكات، چون ئیتر ئەو هەڵمەتە دەبێتە رۆحی ناو جەستەی هەر تاک و کۆمەڵگەیەک.
ئەگەر ئەو هەڵمەت سەربكەوێت ئەوا رۆح دەکەوێتە كۆنتڕۆڵی خۆمان. واتا سیستەمی بەڕێوەبەرایەتی وڵات لە كۆنتڕۆڵی کۆمەڵگا بەخۆیدایە. ئابوری، پەروەردە، پاراستن و هەموو رەهەندەکانی ژیان دەكەوێتە ژێر كۆنتڕۆڵی خودی كۆمەڵگە. هیوادارین كە گەلی كورد لە رۆژهەڵاتی كوردستاندا بۆ خاوەندارێتی لەدەستكەوتەكانی شۆڕشی ژن ژیان ئازادی بەو رۆحیەوە كە خوڵقێندراوە، هەڵمەتی ئازادی جەستەیی بۆ رێبەر ئاپۆ و چارەسەری پرسی کورد دەستپێبكەن. خاوەندارێتی لەو جۆش و مۆڕاڵەی گەلانی جیهان بكرێت و وەڵام بدرێتەوە.
گرنگە کە گەلی کورد بەرپرسیارێتی مێژووی خۆی بە جێ بهێنێت. تا بەو شێوازە كاریگەری لەسەر گەلانی دیكەی ئێران درووست بکات. پێویستە دووهەمین ساڵڕۆژی شۆڕشی ژن ژیان ئازادی لەسەر ئەو هەڵمەتە بەڕێوە بچێت. ئەگەر بەردەوامی شۆڕش لەسەر ئەو هەڵمەتە بێت، رەوتی تێكۆشانی ژنان و گەلان بۆ گەیشتن بە هەدەف كورت مەودا دەبێت و زووتر ئامانجەکان دەستەبەر دەبن. بە هەمان شێوە جارێكی دیكە پریسكەی ئەو شۆڕشە بە گوڕەوە ببریسكێتەوە و ئەو رۆحیە سەرهەڵبداتەوە. بە کردەوەیی کردنی ئەو بابەتە ئیدی کەس ناتوانێت بڵێت شۆڕش كۆتایی پێهاتووە و سەرجەم ئەو گۆتە گۆتانەش بێ واتا و پووچەڵ دەکرێنەوە. چون شۆڕش بە رێبازێكی جیاوازترەوە دەست پێدەکات. واتا بە ئامانجێكی گەورەترەوە شۆڕش دەست پێدەكرێت.
بەو ئامانجەی کە ژنان و گەلان لەڕۆژهەڵاتی کوردستان و ئێران دیاریان كردبوو نیشاندرا كە دەتوانرێت دژی عەقڵیەت و دەسەڵاتی رژێمی داگیرکەری ئێران بووەستنەوە. نیشاندرا كە دەتوانرێ یەكڕیزی دروست ببێ. نیشاندرا كە دەتواندرێ ژن ژیان ئازادی لەسەر ئەو خاكە شین ببێت و خونچە بکات و کۆتایی بە عەقڵیەتی پیاوسالاری بهێنرێت. بەو شۆڕشە ئیدی عەقڵیەتی پیاوسالاری لەسەر ئەو خاك و جۆگرافیایە ماوەی بەسەرچووە. بە شەکاندنەوەی فەلسەفەی ژن ژیان ئازادی، ژنان و گەلان ئادرەسی نوێی ژیان و تێکۆشانیان بۆ خۆیان دیار کردووە. لێرەدا خاوەنی ئەو فەلسەفەیە كێیە؟ بێگومان رێبەر ئاپۆیە. بۆیە دەبێت ئیتر خاوەنی ئەوە فەلسەفەیە بە بوێرییەوە ببێتە رۆژەڤی گەلی ئێمە. چون تا گۆشەگیری لەسەر رێبەر ئاپۆ نەشكێنین و ئازادی جەستەیی رێبەر ئاپۆ مسۆگەر نەبێت، گۆشەگیری لەسەر شۆڕشی ژن ژیان ئازادی هەڵناگیردرێت. بۆیە گۆشەگیری لەسەر رێبەر ئاپۆ، گۆشەگیریشە لەسەر شۆڕشی ژن ژیان ئازادی. واتا زەخت و گوشار لەسەر ئیمڕاڵی و شۆڕشی ژن ژیان ئازادی گرێدراوی یەكن. چون لەهەر دوو جێگادا یەك پارادیگما دەدرەوشێتەوە. بۆیە تێكشكاندنی كۆت و بەندەكانی سەر ئیمڕاڵی، تێكشكاندنی كۆت و بەندەكانی سەر شۆڕشی ژن ژیان ئازادیشە. دەستەبەر کردنی ئەو بابەتە دەتوانێ ئەو هیوایەی كە گەلان لەسەری هەڵیانچنیوە و تێكۆشانی لەپێناودا دەکەن بە دی بێت. لە كۆتایدا لەکەسایەتی شەهید مامۆستا ژیروان رۆژدار، دەلیل عەفرین و سەربەست سنە كە لە ٢٧ی مژداری ٢٠١٧ لەچیای ئاسۆس لەلایەن فڕۆكە جەنگیەكانی دەوڵەتی فاشیستی تورك كرانە ئامانج و شەهید بوون، یادی هەموو شەهیدانی رێگەی ئازادی بەرز و پیرۆز رادەگرم.
*کۆتایی
