پارتی ژیانی ئازادی کوردستان (پەژاک) لە بانگەوازێکدا داوای لەسەرجەم چین و توێژەکانی ئێران کرد کە بۆ پشتیوانی لەگەلی کورد و پارێزگاریکردن لە دەستکەوتەکانی شۆڕشی ژن، ژیان، ئازادی رۆژی ٢٤ی تشرینی دووەم بە شێوەی سەرتاسەری مانبگرن.
لە بانگەوازێکدا پەژاک بە ئاماژەدان بەوەی لە رۆژانی رابردوودا، هێزەکانی دەوڵەتی ئێران رۆژهەڵاتی کوردستانیان کردووەتە چەقی سەرکوت و کوشتاری خۆپیشاندەران و بە هۆیەوە دەیان خۆپیشاندەری کورد شەهیدبوون، داوای کردوە رۆژی پێنج شەممە ٣ی خەزەڵوەر (٢٤ی تشرینی دووەم) سەرجەمی چین و توێژەکانی ئێران بە مەبەستی پشتیوانی لەگەلی کورد و پارێزگاری لە دەستکەوتەکانی شۆڕشی ژن ژیان ئازادی بە شێوەی سەرتاسەری مانبگرن.
لە بەشێکی دیکەی بانگەوازەکەدا هاتووە: " تەنیا لەماوەی یەک هەفتەی رابردوودا زیاتر لە ٥٠ رۆڵەی قاڕەمان شەهید کراون و پلانی بۆ کۆمەڵکوژی دیکەش داناوە. بۆ پوچەڵکردنەوەی ئەو پلانە ستەمکارانە گەلی کورد پێویستی بە پاڵپستی هەمەلایەنەی گەلان، رێکخراوەکان، سەندیکا و پارتەکانی سەرتاسەری ئیران هەیە".
دەقی بانگەوازەکەی پەژاک بەم جۆرەیە:
"بانگەوازی پەژاک بۆ گەلانی ئێران بە مەبەستی مانگرتن و بانگهێشت بۆ پشتیوانی لە شۆڕشی گەلی کورد
بۆ رای گشتی!
و رێکخراو، پارت، لایەن، توێژ و کۆمەڵانی سەرتاسەری ئێران
جوڵانەوەی ژن، ژیان، ئازادی توانیویەتی گەورەترین راپەڕین لە کوردستان و سەرتاسەری ئێران بێنێتە ئاراوە. لە سایەی ریشەداربوون، ئەم شۆڕشە سەرجەم ئێرانی تەنیوەتەوە و هەموو گەلان تیایدا بەشدارن. رژێمی فاشیستی ئێران بۆ تۆڵەسەندنەوە لە گەلی کورد کە دەستپێشخەری ئەم راپەڕینەیە، لە هەوڵی تۆڵەکردنەوەدایە لە رێگەی سەرکوتی بێبەزەییانە و کوشتار. لە رۆژانی رابردوودا بینیمان کە گەلی کورد بە پێداگرییەوە درێژەی بە راپەڕینەکەیدا و فراوانتری کرد، بەڵام بەداخەوە بە شێوەی سەرتاسەری پشتیوانی لێنەکرا و تاڕادەیەک راپەڕین و شۆڕشەکە لە کوردستاندا قەتیس مایەوە. رژێمی ئێرانیش بەو پەڕی هێزەوە هێرشی کردەسەر و تاوانی دڕندانەی ئەنجامدا. تەنیا لەماوەی یەک هەفتەی رابردوودا زیاتر لە ٥٠ رۆڵەی ئازامانی شەهید کردووە و پلانی بۆ کۆمەڵکوژی دیکەش داناوە. بۆ پوچەڵکردنەوەی ئەو پلانە ستەمکارانە گەلی کورد پێویستی بە پاڵپشتی هەمەلایەنەی گەلان، رێکخراوەکان، سەندیکا و پارتەکانی سەرتاسەری ئیرانە.
پارتی ژیانی ئازادی کوردستان (پەژاک) وێڕای ئەوەی بە توندی سیاسەتی کوشتاری رژێمی ئێران شەرمەزار دەکات، تەواوی گەلان، چین و توێژەکان، سەندیکا، رەوتەکان، پارتەکان و دامەزراوە جیاجیاکان لە ناوخۆ و دەرەوەی ئێران بانگهێشت دەکات بۆ ئەوەی بە مەبەستی پشتیوانی لەگەلی کورد و پارێزگاری لە دەستکەوتەکانی سەرهەڵدانی "ژن، ژیان، ئازادی" رۆژی پێنج شەممە ٣ی سەرماوەز دەست بە مانگرتن و ناڕەزایەتی دەربڕین بکەن.
بێگومان رابوونی سەرتاسەری لە ناوخۆ و دەرەوەی ئێران لەلایەن چین و توێژەکان، کۆمەڵانی خەڵک و تەواوی ئۆپۆزسیۆنی دیموکراسیخواز و ئازادیخوازەوە دەبێتە هۆی بەهێزتربوونی شەپۆلی سەرهەڵدان و دەشبێتە بەربەستێک لەبەردەم سیاسەتی کوشتاری رژێمی ستەمکاری و دیکتاتۆر. ئەم راپەڕینە جیالە لە پشتیوانی لەگەلی کورد، پێویستییەکی سەرەکی و بێئەملاولایە بۆ تەواوی گەلانی ئێران. پێویستە کە لە پیر و گەنجە تا کرێکاران، مامۆستایان، رووناکبیران و سەرجەم توێژەکانی کۆمەڵگا، بە پێشەنگایەتی ژنان و پشتیوانی ئۆپۆزسیۆنی ئازادیخواز بڕژێنە گۆڕەپانەکان و پاڵپشتی لە شۆڕشگێڕانی کوردستان بکەن. مانگرتنی چین و توێژە جیاجیاکان و هاوپشتی و یەکڕیزی سەرتاسەری، بە شێوەیەکی بەرچاو شەپۆلی خرۆشاوی سەرهەڵدانی گەلان بەهێز دەکات.
بەبەشداری سەرجەم کۆمەڵانی خەڵک و لەسایەی یەکڕیزی سەرجەم توێژ و کۆمەڵانی گەل دەتوانرێت زنجیری دیکتاتۆری و ستەم بپسێنرێت و رێگەی بەنرخی ئازادی گەلان بکرێتەوە. بە دڵنیاییەوە سەرجەم گەلانی ئێران شان بە شانی گەلی کورد توانای هێنانەدی ئەم حیماسە سەرسوڕهێنەرەیان هەیە. چاوەڕوانیمان لە سەرجەم لایەنە ئۆپۆزسیۆنە کوردی و ئێرانییەکانە کە ئاگاداری ئەرکە مرۆیی، ئەخلاقی و سیاسییەکانیان بن و لە گۆڕەپانەکانی ناڕەزایەتی دەربڕین و رووبەڕووبوونەوە لەگەڵ هێزەکانی رژێم ببنە کۆڵەکەیک بۆ ئەوەی راپەڕیوان پشتی پێوەببەستن.
بژی سەرهەڵدان دژی دکتاتۆری و ستەمکاری
بەرز و بەڕێز بێت یاد و یرەوەری شەهیدانی رێگای ئازادی
سەربەرزن ئەو نەتەوانەی رۆڵەکانیان دەنێرنە گۆڕەپانی ئازادی خوازی."
ف.ق
