بە گوێرەی هەواڵێکی تۆڕی مافەکانی مرۆڤی کوردستان بە تۆمەتی 'تێکدانی ئاسایشی گشتی' دادگای سنە سزای ساڵێک زیندان و لێدانی ٤٠ قامچی بەسەر سەیوان ئیبراهیمی مامۆستای زمانی کوردی و ئەندامی دەستەی بەڕێوەبەری ئەنجومەنی نوژیندا پەسەند کردووە و دوێنێ ئەو مامۆستایە بە مەبەستی تێپەڕاندنی سزاکەی گواسترایەوە بۆ زیندانی ئەو شارە.

لە دۆسیەیەکی دیکەدا سەیوان ئیبراهیمی سزای ١٠ ساڵ زیندانی بەسەردا سەپێندراوە و لەئەگەری پەسەند کردنی ئەو سزایەش، دەبێت ١٠ ساڵی دیکە لە زینداندا بمێنێتەوە. لەو دۆسیەدا ئیبراهیمی تۆمەتبارکراوە بە 'دروستکردنی گروپ و رێکخراو بۆ تێکدانی ئاسایشی وڵات'.

سەیوان ئیبراهیمی هاوژینی زارا محەمەدیە، کە ئەویش بە تۆمەتی وتنەوەی وانەی کوردی پێشتر سزای ٥ ساڵ زیندانی بەسەردا سەپێندرابوو، بەڵام دواتر بەر لێخۆشبوون کەوتبوو و ئازادکرابوو.

هـ . ب