سەرەتای مانگی ئاب، لە کەمپی چەمشکۆی ناوچەی زاخۆ، فاروق میرزا کۆچبەری شەنگالی و کچەکی ئاخینی تەمەن ٦ ساڵ، لەلایەن کەسێکی خەڵکی دهۆکەوە کوژران. دوای ئەوە بکوژەکە دەستگیرکرا، بەڕێوەبەرایەتی پۆلیسی دهۆک رایگەیاند، بکوژەکە دەستدرێژی کردووتە سەر ئاخینی ٦ ساڵ و دواتر کوشتوویەتی.

نارەزایی کۆمەڵگەی ئێزدی و رێکخراوەکانی ژنان لەدژی کوشتنی ئاخین و باوکی، رۆ بە رۆژ زیاتر دەبێت. لەم چوارچێوەیەدا ئەمڕۆ تەڤگەری ئازادی ژنانی ئێزدی (تاژێ) راگەیەنراوێکی بڵاوکردەوە و داوای سزادانی بکوژەکەی ئاخین و باوکی لە حکومەتی هەرێمی کوردستان کرد.

راگەیەنراوەکەدا لەلایەن وەهتا رەشۆ ئەندامی تەڤگەری ئازادی ژنانی ئێزدی خوێندرایەوە. سەرەتا سەرەخۆشی لە خانەوادەی ئاخین کرا و وترا، " ئێمە وەک گەلی شەنگال، ٧٤ جار رووبەروویی فەرمان بووینەتەوە، گەلەکەمان لە کەمپەکانی باشوری کوردستان لەبەرئەوەی لە خاکەکەیان دوورن، زوڵمیان لێدەکرێت.

دەستدرێژیکردن لەسەر ئاخینی ٦ ساڵ لە داعش جیاوازتر نییە. ئێمە وەک دایکانی شەنگال تاوەکو کۆتایی لەدژی ئەم جۆرە کردەوە قێزەونانە تێدەکۆشین و پێویستە بکوژەکە بە زوترین کات سزابدرێت.

لە بەردەوامی راگەیەنراوەکەدا بانگەوازی لە گەلی ئێزدی لە کەمپەکانی باشوری کوردستان کرا کە بگەڕێنەوە سەر زێدی خۆیان و بەم قسانە کۆتایی بە راگەیەنراوەکە هێنرا: " یەکەم جار نییە کە دەستدرێژی دەکرێتە سەر کچانی منداڵ، بە دەیان جار ئەم تاوانە قێزەونە دووبارە بووەتەوە. پێویستە ئێدی گەلەکەمان، خۆیان لە زوڵم رزگار بکەن و روو بکەنە شەنگال و ئەم خیانەتەی سەر خۆیان قبوڵ نەکەن و بگەڕێنەوە بۆ ماڵەکانی خۆیان."

ف.ق