بە گوێرەی ئەو زانیاریانەی لە دانیشتوانی کەمپی چەمشکۆوە وەرگیراون، سەرلەبەیانی ئەمڕۆ کاتژمێر نزیکەی ٠٩:٠٠ لە ئەکادیمیای سەربازی زاخۆوە کە هێزەکانی پەدەکە لەوێ راهێنانیان پێدەکرێت، تەقەیەکی زۆر کراوە و بەشێک لە گولـلەکان بەرەو ناوەوە و دەوروبەری کەمپی ئاوارەکان ئاراستەکراون.

یەک لەو گولـلانە بەر ماڵی ئاوارەیەک بە ناوی شەکر خودێدا حەسەنی تەمەن ٤٥ ساڵ کەوتووە و گولـلەکە بەر ملی ناوبرا و کەوتووە و بەهۆیەوە بەسەختی برینداربووە.

ئەو هاووڵاتییە ئێزدییە بەرلەوەی بگەیەندرێتە نەخۆشخانە بەهۆی سەختی برینەکەیەوە ژیانی لەدەستداوە.

تەرمی شەکر خودێدا رەوانەی پزیسکی دادی دهۆک کراوە و تائێستا لایەنە پەیوەندیدارەکان لەبارەی ئەو رووداوەوە هیچ زانیارییەکیان رانەگەیاندووە.

هـ . ب