بەبۆنەی دووبارە سزادانەوەی ڕۆژنامەوان شێروان شێروانی، مەکتەبی ڕاگەیاندنی یەکێتیی نیشتیمانیی کوردستان (یەنەکە) ڕاگەیاندراوێکی بڵاوکردەوە و دەڵێت: "حکومدانەوەی شێروان شێروانی لادانە لە پرەنسیپەکانی ئازادی".
پاش ئەوەی دوو ساڵ خرایە زیندان، دوێنێ دادگای هەولێر سزای چوار زیندانی بەسەر شێروان شێروانی سەپاند، مەکتەبی ڕاگەیاندنی یەکێتی، دژی ئەم بڕیارە ڕاگەیاندراوێکی بڵاوکردەوە و بە پێشێلکردنی ئازادی ڕادەربڕین وەسفی دەکات.
بەگوێرەی ڕاگەیاندراوەکەی مەکتەبی ڕاگەیاندنی یەنەکە، ئەم بڕیارە ڕاپۆرتە نێودەوڵەتییەکان سەبارەت بە خراپی ڕەوشی ئازادی ڕادەربڕین لە هەرێمی کوردستان پشتڕاست دەکاتەوە و دەڵێت: " پاش ئەوەی دادگای کەتنی ھەولێر بۆ جاری دووەم ڕۆژنامەنووس شێروان شێروانی بە چوار ساڵ زیندانی حوکمدا، وادەکات جارێکی دیکە ڕێگا خۆش بکات بۆ ئەوەی سەدان نیشانەی پرسیار لەسەر ئازادیی وتن و ئازادی ڕەخنە و بڵاوکردنەوە لە کوردستان دروست بێت. سزادانەوەى شێروان شێروانى بۆ جارى دووەم وادەکات دیسانەوە ڕاپۆرتە نێودەوڵەتییەکان و ڕاپۆرتی ڕێکخراوە تایبەتەکان بە مافی مرۆڤ و رۆژنامەگەری وەك جارانی تر ژینگەی ئازادیی ھەرێمی کوردستان بە ترسناک لە قەڵەم بدەنەوە و لەوەشدا بوختانیان نەکردووە".
ڕاگەیاندراوەکەی یەنەکە جەخت دەکاتەوە دەبێت دادگاکان دووربخرێنەوە لە فشارە سیاسییەکان و دەڵێت: "ئومێدی هەموومان وابوو و وایە چیتر دادگاکان نەکەونە ژێر کاریگەریی و گوشاری فەزای سیاسیی و دەرچەیەک بھێڵنەوە بۆ وتن و ڕەخنە تا لەمە زیاتر ناو و ناوبانگی ئازادیی بڵاوکردنەوە لە ھەرێمەکەمان ناشیرینتر نەبێت".
لەکۆتایی ڕاگەیاندراوەکەدا ئاماژە بەوە دەکرێت، نوسین و بڵاوکردنەوەی تاوان نییە و نابێت کەس بەم هۆکارە بخرێتە زیندان و دەبێت ڕێز لە ئازادی ڕادەربڕین بگیرێت. پێویستە چالاکوان و ئەهلی قەڵەم ڕێزیان لێ بگیرێت نەوەک بخرێنە زیندان.
