لە کتێبخانەی گشتی شاری کەرکوک، سیمینارێکی تایبەت بەڕێوەچوو، سەبارەت بە هۆشیارکردنەوەی گەنجان و رۆڵی گەنجان لە مێژووی شۆرشەکان و چۆنیەتی پەرەپێدانی تواناکانیان، سیمینارەکە لەلایەن مامۆستا نەریمان ئەحمەدەوە پێشکەش کرا کە ئەم سیمینارە لەلایەن گروپی هۆشیاری گەنجانەوە ئامادەکرابوو، بۆ کچان و کورانی شارەکە.

ژمارەیەکی بەرچاو لە کچان و کورانی کەرکوک ئامادەی سیمینارەکە بوون، هەروەها لە سیمینارەکەدا گفتگۆ لە نێوان ئەو گەنجانە ئەنجامدرا و لەلایەن پێشکەشکاری سیمینارەکەوە وەڵامی پرسیاری ئامادەبووانی سیمینارەکە درایەوە.

سۆران سەردار بەرپرسی گروپی هۆشیاری گەنجان، سەبارەت بە سیمینارەکە و هۆکاری دیاریکردنی ئەم بابەتە، بۆ ئاژانسی هەواڵی فورات قسەی کرد و وتی: "ئێمە وەکو گروپی هۆشیاری گەنجان بە گرنگ و پێویستمان زانی سیمینارێکی لەم جۆرە پێشکەش بە گەنجانی شارەکە بکەین بۆ ئەوەی ئاستی هۆشیاریان بەرزتر بێت."

هەروەها سۆران سەردار وتیشی: "شاری کەرکوک لە مێژووی خۆیدا بەردەوام گۆرانکاری گەورەی بەخۆیەوە بینیوە، ئێمەش پیمان وایە پێویستە گەنجانی شارەکە زیاتر هۆشیار بن تا بتوانن پێشەنگایەتی بۆ هەموو گۆرانکارییەکان بکەن و شارەزایی زیاتریان هەبێت لە تەواوی بوارەکاندا بۆ خزمەتکردنی زیاتری شارەکەیان."

ز.ش