شەۋێ ۋیەردێ، کۆمسیۆنو باڵاو سەربەوێ هورۋچناکاو ئێراقی، ئەنجامو پرۆسەو ئەژمارای دەسی دەنگەکا دلێ سندوقەکاو هورۋچنا پارلەمانیەکەو ئێراقیش ئاشکرا کەرد.

بە پاو کۆمسیۆنی، پرۆسەکە کە دۋێ مانگێش خاینان، هیج فاڕیایێش سەرو ئەنجامو هورۋچناکەیەرە ناۋردەن کە ۋەڵتەر ئاشکرا کریابێ و کورسیەکێ لایەنەکا هەرێمو کوردستانی و کەرکوکی و پارێزگەکاو ئێراقی پێسەو وێشا مەنێنێۋە.
 
جە دمایین ئەنجامەنە ئاشکرا کریا بێ، هامپەیمانی سائرون کە سەر بە موقتەدا سەدر-یەن، بە ٥٤ کورسیێ پلەی یەکەمینش مسۆگەر کەردەن. جە هەرێمو کوردستانی، پارتی دیموکراتو کوردستان-ی ٢٥ کورسیێ، یەکیەتی نیشتمانی کوردستانی ١٧ کورسیێ، بزوتنەوەو گؤڕانی ٥ کورسیێ، نەوەی نوێ ٤ کورسیێ-شا مسۆگەرێ کەردێنێ.

دمای ئەژمارای دەسی دەنگەکا و ئاشکراکەردەی ئەنجامەکێشا، جە ئێسەنە چەمەڕا کریۆنە گفتوگۆکێ پەی ئەرەنیشتەی پارلەمانی نو و دروسکەردەی حکومەتی نوی دەس پنە بکەراۋە، کە بە هۆکارو ئەژمارای دەسی دەنگەکا سەردوسڕیشا کەوتەبێنە. بەڵام بە پاو ئانەیە کە هیچ لیست و قەوارێۋی سیاسی فرینەش مسۆگەر نەکەردەن، جەی دمایچ گفتوگۆ پەی دروسکەردەی حکومەتی ئێراقی سەخت و دژوارەن.

یاگێ ئاماژەیەنە، پارلەمانو ئێراقی ۳۲۸ نمایندێش هەنێ و کە ۸ شا بە کۆتا پەی شەبەک، ئێزیدی، کریستیان و سابئەی دەسنیشانێ کریێنێ و کورد ئیجارە ٦۰ کورسیێش جە پارلەمانەکەنە هەنێ، کە بەبەراۋرد چەنی ۋیەردەی کورسیەکێش فرە کەمشا کەردەن.

۱۲و ئایاری ۋیەرەدەی هورۋچنای پارلەمانی جە ئێراق بە شێۋازی ئەلەکترۆنی ئەنجام دریابێ، بەڵام بەهۆو تانە و سکاڵاو چنڎ لایەنێۋی کوردستانی و ئێراقی جە ئەنجامەکێش، کۆمسیۆن بڕیارش دابێ، ئەژماراکەی بە دەسی ئەنجام بڎریۆن. دەرەنجام دمای دۋێ مانگێ جە ئەژمارەکەی، شەۋێ ۋیەردێ پرۆسەکە کۆتاییش ئاما و ئانێچە هیچش جە ئەنجامەکەی نەفاڕا.