رەزا ئاڵتون ئەندام جە کۆنسەو ڕاۋەبەری کۆما جڤاکێن کوردستانی-کەجەکە، ئاشکراش کەرد: تورکیا ئینا ۋەردەمو قەیرانێ فرە قوڵ و قورسیەنە و هەر ڕۆچ هونیش چنە چکۆرە و قەیرانەکە قوڵتەر و قورستەریچ ببۆنە.
رەزا ئاڵتون ئەندام جە کۆنسەو ڕاۋەبەری کۆما جڤاکێن کوردستانی-کەجەکە، جە دیمانێۋنە چەنی ئاژانسەکەیامان (ANF)ی، باشس جە قەیران و ناکۆیەکانو تورکیای و ئەمەریکای کەردەن و ۋاتەنش:
ناکۆکی و قەیرانەکانو میانو تورکیای و ئەمەریکای، جە پڕوژەو " مەشقش بڎە-پەڕ چەکەش بکەرە"، (مەبەست مەشق کەردەی و پەڕ چەک کەردەی ئۆپۆزسیۆنی سوری-یەن کە نزیک بە ٥۰۰ ملیۆن دۆلارێش پەی خەرج کریا و سەرش نەگێرت و تورکیا تاقمە چەتەکێش پنە بەهێزێ و چەکدارێ کەردێ) دەستش پنە کەرد. ئەردۆغان هەوڵش دا سود جە دەرفەتانێ وەربگێرۆنە کە جە ناوچەکەنە ئامێبێنێ ئارا، تا جە ڕاشانەۋە باڵادەستی وێش جە وەرکەوتی دلین (ڕۆژهەڵاتی ناوین) بسەپنۆنە.
ئاڵتون ئاشکراش کەرد: داۋاکێ تورکیای و ئەمریکای یەکانگیرێ نمەبانێۋە. ئەگەر ئەمەریکا داۋاکانو تورکیای قبوڵ بکەرۆنە، مشیۆم بەناچاری دەستبەردارو سیاسەتەکانو وێش جە وەرکەوتی دلین ببۆنە. چونکە تورکیا داۋا جە ئەمەریکای مەکەرۆنە تا جایگاو وێش پارێزۆنۆنە و جمیەر (تەڤگەر)ی ئازادی کوردی دلێنەبەرۆنە. یانی با ئەمەریکا دەستوەردای جە ئێران و سوریای نەکەرۆنە و ئا کوردێ کە جە فاڕایەکانو وەرکەوتی دلینی باجی قورشان دان و ڕۆڵی گەورەشان بیەن دلێنەبریانە. ئەگەر ئەمەریکا ئانەیە قبوڵ بکەرۆنە، ئاوەختە بۆنە بە ئامرازێ هەرزان و سوک ۋەرو دەستو تورکیایەنە. ئا داۋاچە جە وەختێوەنە جە ئەمەریکای مەکریۆنە، کە ئەمەریکا تاکە هێزی هەژەموونگەران کە جە هەرێمەکەنە دەستۋەردای مەکەرۆنە و باڵادەستەن. هەڵبەتە جە ۋەراۋەرەنە داۋا جە تورکیای مەکریۆنە تا بە پاو سیاسەتەکانو ئەمەریکای جە هەرێمەکەنە بژڵێۋێۆۋە. یانی سەبارەت بە ڕووسیای، ئێرانی و سوریا جە هەرێمەکەنە پەیڕەو جە سیاسەتو ئەمەریکای بکەرە و دژش مەمدرە.
رەزا ئاڵتۆن، دەستنیشانش کەرد: تورکیا بە بنەما گێرتەی دژایەتی-کەردەی ئەمەریکا و ئێرانی، پەیوەندیش چەنی ڕووسیا و ئێرانی دروست-کەردەن و پەیوەندیەکەی پێسەو هەڕەشێ بەکاربەڕۆنە. جە سەرەتا ئەنجامش جە پەیوەندیە هەڕەشەئامێزەکەیش هۆرنەگێرت، پۆکەی جارێتەر پەیوەندیەکەش بەهێزتەر کەرد تا بەڵکو ئەنجامێ بەدەست بوزۆنە. جە ئیسەنە پەیوەندیەکە بە یاگێ و ئاستی یاۋان ئەۋەگێڵایش پەی نییەن و بیەن بە بارێ قورس پەی تورکیای. ئیتر جە ئیسەنە بە بێ باجدای قورسی نمەتاونە واز جە پەیوەندیەکەیش چەنی ڕوسیا و ئێرانی باۋەرۆنە. هاموەخت تورکیا دڵنیا نییەن، ئەگەر ۋاز جەپەیوەندیەکەیش باوەرۆنە متاونە هامکاری ئەمەریکای و ئەوروپای بکەرۆنە. ئانێچە جەستەو تورکیاش بریندار کەردەن و هەر ڕۆچ هونیش چنە چکۆرە. ساڕێژکەردەی برینەکەیچ، نە جە بەرنامەو ئەمەریکای نە جە بەرنامەو ڕووسیا و ئێران-یەنە نییەن. جە تورکیا-چەنە، عەقڵیەتێ کە ساڕێژکەرو برینەکەی بۆنە، بیەیش نییەن.
ڕەزا ئاڵتون، هۆکار و سەرهۆردای قەیرانی فرە قوڵ و قورسو تورکیا-ئەمەریکای پەی سیستمو نوو جیهانی و قەیرانەکانو وەرکەوتی دلینی مەگێڵنۆۋە و ماچۆنە: ئیتر پێسەو ۋیردەی پەی سیستمی جیهانی تورکیا یاگێ متمانەی نییەن. ئانێچە ئانڎەی تەر قەیرانەکەی قورستەر و قوڵتەر بکەرۆۋە. ڕاستی ناکۆکی و قەیرانەکەی ئینەن، بەڵام جە ڕواڵەتەنە دەستگیرکەردەی قەشێ-ۋی هەن و ئانە بە دەستپنەکەرو قەیرانەکەی مەۋینێۆنە. جە ئیسەنە جە ئاستێ کە هەرگیز جە ۋیەردەنە نمونش نەبیەن، دەستۋەردای جە تورکیانە مەکریۆنە. وەڵێ گێرچێۋێنە دەستۋەردای ئابوری فرە قورس هەن. بەڵام دەستۋەرداکەی هەر ئابوری نییەن و دەستۋەردایێ فەراتەرەن. جە ۋیەردەنە تا ڕادێ دەستۋەردای کریێنە، بەڵام دەستۋەردایەکە هەرگیز پێسەو ئیسەی نەبیەبێ بە هەڵۋێستیۋی ڕۆشن و ئاشکرا. گەمارۆی ئابوری سەپیان ملو تورکیایەرە و ۋەستەرەی لیرەی تورکی جەی چوارچێۋەنە ڕووەشان دێنە. گەمارۆکە بە ئازاد- کەردەی یان نەکەردەی قەشەکەی پەیوەست کریان، بەڵام هەر کەسێۋی ئاقڵ مەزانۆنە گەمارۆکە فەراتەرەن جە قەشێۋی و قەشەکە کریان بە بەهانە پەی سزادای و سنوردارکەردەی تورکیای و کێشەکە فرە جە قەشەکەی گەورەتەر و قوڵتەر و قورستەرەن.
رەزا ئاڵتون ئەندام جە کۆنسەو ڕاۋەبەری کۆما جڤاکێن کوردستانی-کەجەکە، ۋاتش: تورکیا گەرەکشەن بەبێ چارەسەری دۆزو کوردی و ئەتنیک و باوەریەکان و دیموکراتی-بییەی، چوون ۋیەردە سیستمی جیهانی پەی پارێزنای سیستەمەکەو وێش یانی دەوڵەت-نەتەوە بەکاربەرۆنە و سەپنۆنەش. بەڵام ئیتر ئانە جە بەرنامەو سیستم و مۆدەرنیتەی کاپیتالیستی-یەنە جە وەرکەوتی دلین بیەیش نییەن و داۋاکاری پی جۆرە ئیتر قبوڵ نمەکریۆنە، کە ئانێچە یۆن جە هۆکارە سەرەکیەکانو قەیرانەکەی. جە ئیسەنە بە سەپنانی داۋا فاڕیای جە تورکیای مەکریۆنە، تورکیاچ قبوڵش نمەکەرۆنە. ئانێچە ئێمە بە کەردەیی (پڕاکتیکی) جە سوریانە دیمان. تورکیا جە گرد بوارێ بیەن بە دەوڵەتێۋی فاشیست و دژە کورد و سیاسەتش سەرو بنەما دژایەتی کەردەی کوردی مەبەرۆنە ڕاۋە. پەی دژایەتی کەردەی کوردی پەیوەندیش چەنی بازێ وڵاتێ و لایەنێ و تاقمێ بەتایبەتی ڕووسیا و ئێرانی دروست کەرد، کە دژێنێ چەنی بلۆک وڵاتانو ڕۆژئاۋای وئەمەریکای و وێش کەرد بە ناوەند پەی سیاسەتی هەرێمی و جیهانی و پەی جۆرە ڕاش پەی دەستەۋەردای و قەیرانەکان جە وڵاتەکەشەنە وەش و هەموار کەرد.
ئاڵتون جە دمایەنە ۋاتەنش: تورکیا جە جیاتی چارەسەری ڕاستەقینەی، بە سیاسەتی ڕۋانە گەرەکشەن برینەکانش تیمار بکەرۆنە و ئەنجامێ بەدەست بۋزۆنە. بەڵام ۋیەردە و ئەزموون نیشانەش دان کە تورکیا بە سیاسەتی ڕۋانە باجی قورسش جە دلێ وڵاتی و ڕۆژهەڵاتی ناۋینەنە دان و فرە جارێ سیاسەتەکێش شکستشان وارد و کارەساتشان خوڵقان. جەی بارەۋە عەفرین نمونەن، هەڵبەتە وەڵێ عەفرینیچ هەر پاسە بێ و تورکیا جە وەرکەوتی دلین و ناوچەکەنە مایە پووچ و تاپول بی.
درێژەش هەن.......
