ڕابەر ئاپۆ کە ٢٦ ساڵېن جە زینانو ئیمراڵینە ئینا گۆشەگیریێوە قورسەنە، چنی شاندو دەم پارتی و هەڤاڵە زینانیکریایەکاش بانگەوازو "ئاشتی و گلېرگەی دیموکراتیک"یش کەرد.

شاندو ئیمراڵی پارتو یەکسانی و دیموکراسیی گەلا (دەم پارتی) پەی جاری یەرەمی جە دوورگەو ئیمراڵینە چەمشا بە ڕابەر ئاپۆی کەوت. ئەحمەد تورک و پەروین بوڵدانە و سری سورەیا ئۆندەرە و تولای حاتەم ئۆغۆللاریە و تونجەر باقرخان و جەنگیز چیچەک و فایەق ئۆزگور ئەرۆڵ جە دیدارەکەنە ئاماڎۍ بێنۍ. هەرپاسە زینانیکریایا تەری، هەریۆ جە عومەر خەیری کۆنار و حامیلی یەڵدرم و وەیسی ئاکتاش ئاماڎۍ بێنۍ.

بانگەوازو ئاشتی و گلېرگەی دیموکراتیکی

ڕابەر ئاپۆ بانگەوازش پەی "ئاشتی و گلېرگەی دیموکراتیکی" کەرد. بانگەوازەکەو ڕابەر ئاپۆی پی جۆرەنە:

"بانگەوازو ئاشتی و گلېرگەی دیموکراتیکی

پەکەکە جە سەدەو ویسەمینە، جە سەدێوە هەرە تنوتیژی تاریخینە ئەرەمەرزیارە. ئا زەمینەی پەکەکەش دلېنە ئەرەمەرزیارە، زەمینەو دووۍ جەنگا جەهانی بۍ. سەردەمو سۆسیالیزمی بنیاڎنریای بۍ و جەنگی سەردی بۍ جە جەهانەنە. چی زەمینەنە نکۆڵیکەردەی جە حەقەتینو کوردا، قەڎەغەکەردەی ئازادییەکا، بە تایبەتیچ قەڎەغەکەردەی ئازادی ویرکەردەیۆ بۍ.

چا سەدەنە جە ڕوو تیۆری و بەرنامە و ستراتیج و تاکتیکیوە، کاریگەریی حەقەتینو سۆسیالیزمی بنیاڎنریای، سەرو ئی ئەرەمەرزنایە بۍ. جە ساڵەکا ١٩٩٠ینە، هۊرشێویایۆ سۆسیالیزمی بنیاڎنریای بە مەڵامەتی دلېینەو، شکسو نکۆڵیکەردەی جە شناسنامەی جە وڵاتەکەی و پێشکۊتەی ئازادی ویرکەردەیۆ، پاسشە کەرڎ پەکەکە ماناو ۋێش جە دەس بڎۆ و زیاڎ جە پەنەوازی ۋێش واوەی بکەرۊوە. پۊکەی پېسە ئەویشا تەری، پەکەکەیچ جە دمادماییەکا ۋێشەنە مژیوۆ و پەنەوازیش بە ۋۍ هۊرشێونایۆین.

پەیوەندییەکۍ کورد و تورکی؛ جە تاریخو هەزاران ساڵانە تورک و کورد پەی مەنەیۆ ۋێشا و ۋێپارێزنای ۋەرا ۋەر بە هێزە هەژموونگەراکا، هەمېشە بە پەنەوازش زانان دلۍ هامپەیمانیێوە دڵوازانەنە با.

چی دووە سەدە دماییەینە، مۆدێرنیتەی سەرمایەداریی ماڕای ئی هامپەیمانیەتیەیشە کەرڎ بە مەرامو ۋێش. ئا هێزۍ کۊتێبێنۍ چېرو کاریگەرییەکەیشۆ، هامشانو بنکە چینایەتییەکەیشا، خزمەتشا پی ئامانجیە کەرد. بە شرۆڤە تاکڕەهەندەکا کۆماری، ئی پرۆسە خێراتەر بی. ئەرکی سەرەکی ئانەنە، ئا پەیوەندییە تاریخیەو ئارۊی شکسش ئارڎەن، بە ڕۆحی برایەتی و یۊبیەی، بەبێ پەشتگۊش وستەی باوەڕیەکا، سەرجەنۆ ڕێک وزیۆوە.

گلېرگەی دیموکراتیک، پەنەوازیێوە حاشاهۊرنەگیرا. پەکەکە، درێژتەرین و ۋەرفراوانتەرین جمېیەرو سەرهۊردای و تنوتیژیا جە تاریخو کۆمارینە. ۋەرو ئانەی ڕاو سیاسەتو دیموکراتیکی وزیابێرە، پەکەکە هێز و پەشتیوانیش هۊرگېرت.

دەوڵەت_نەتەوە جیاجیاکۍ، فیدراسیۆن، ۋېڕاوەبەری ئیداری و چارەسەرە کەلتوورییەکۍ کە دەرەنجامو پەنەوازی نەتەوەپەرسیی تنەنۍ، نمەتاوا بانۍ بە جوابدەرەوەو سۆسیۆلۆژیاو گلېرگەی تاریخی.

ڕێزگېرتەی جە شناسنامەکا، ئازادیی ویرکەردەیۆ، ڕێکوستەی دیموکراتیک، بنیاڎنیای کۆمەڵایەتی-ئابووری و سیاسی گرڎو پێکئامایەکا، تەنیا بە بیەو گلېرگەو و کایێوە سیاسیی دیموکراتیکی مێنە ئاراوە.

سەدەو دووەمو کۆماری، تەنیا ئا کاتە دیموکراتیزە مکریۆ، متاوۆ بۆ بە داراو یۊبیەی و مەنەیۊی هەمیشەیی. جگە جە دیموکراسی، حیچ ڕێوەتەر پەی بەدیئاردەی و جابەجێکەردەی سیستەمەکا، نیا ئارانەو ڕاش نمەشۆنە. ڕێککۊتەی دیموکراتیک، ڕاو ڕێبازێوە سەرەکی و بنەڕەتییا.

پەنەوازا زۋانو سەردەمو ئاشتی و گلېرگەی دیموکراتیکی بەپاو ئی حەقەتینیە وەڵۍ وزیۆ.

ئا بانگەوازەی ئېژا باخچەلی کەردش، ئا ئیرادەی کە ئېژا سەرۆککۆمار نیشانەش دا، هەڵوێسو ئەرێنی پارتەکا تەری، ئی پڕۆسەشە بنیاڎنیا، منیچ چی پرۆسەنە بانگەوازو چەک نیایرە مکەر و ۋەرپرسیاری تاریخی ئی بانگەوازیە گێرونە ئەستۆ.

تا پېسە ئا گلېرگە و پارتە هامچەرخا بەزۆرەملێ دمایشا پنە نامان، شمەیچ بە کەیفو وێتا  کۆنگرێوە بیندۍ و قەڕار دەیدۍ؛ پەنەوازا گرتا کوۍ بیدۍ و چەکەکاتا بنیەیدێرە و پەکەکە ۋێش هۊرشێونۆوە. سڵام جە گرڎو ئا کەسا مکەرو کە باوەڕیشا بە پێوەرە ژیواین و گۊش جە بانگەوازەکەیم مگێرا.

٢٥ و شوباتو ٢٠٢٥

عەبدوڵا ئۆجالان."

"پەنەوازا دڎان بە ڕەهەندی یاساییرە بنریۆ"

سری سورەیا ئۆندەر دماو کۆنگرە ڕۆنامەنووسییەکەی قسێش کەردۍ و ئەرەیاۋناش ڕابەر ئاپۆ بە شاندەکەیش واتەن: "بێگومان پەی ئانەی بەشێوەی پراکتیکی چەک بنریۆرە و پەکەکە ۋێش هۊرشێونۆوە، پەنەوازا دڎان بە ڕەهەندو سیاسەتو دیموکراتیکی و یاسایرە بنریۆ".