گەریلا بە مدرامانەکاش دژوو ئەرەگیرکاری و خیانەتی پارێزگاری وەنەو خاکوو کوردسانی مکەرۆ. پیویسا گەلوو پانیشتی زووتەرین وەختنە وێپارێزنای بە بنەما بگێرا، خاوەنداریی وەنەو گەریلای بکەرا و ڕا جە خیانەتی و ئەرەگیرکاری بگێرا.
گەلیوو کوردی و گردوو یا گەلا کە کوردسانەنە مژیوا، سەدان ساڵین ڕووبەڕوو ئەشکلەنجەو دەوڵەتی بیێنیوە، تا گەل نەبۆ بە ساعیبوو ئیرادەی قەراری قەوەتی، سیستمێوەشا وستەن وەڵێ کە گرد فشارێوەش گێرتەن وێش. دەزگا و ئەرەمەرزیێکێشا سەروو بنەماێوە بونیاتێ نیێنێ، کە گەل هیچ وەختیوە نەتاوۆ دژوو دەوڵەتی بمدرۆوە، وەربەسێ زۆرداری و زوڵمیشا بە دەسوو پیایاوە پەرە پنە مدا، پێسە گرد یانێوە چێروو وێساوە مازاوە، بە یاردەی تاتە، برا و پیایە دڵسۆزا سیستەموو دیکتاتۆری ژیوای مدانە قاڵب و ئانە کە گەرەکشانە فۆرمەلەش مکەرا.
گلێرگێوی بە مۆدێلوو پرۆتۆ-دەوڵەتیوە عەقڵێتوو دەسەڵاتداریوە ئەرەمەرزیان، ستەموو جەنگوو نەتەوەپەرسییش دەس پەنە کەردەن و زیهنیەتوو سەردەسەییش بنەیانەکانە ئەرەمەرزنان. عومرێوی گولانەوە فێروو ئینسانەکا مکریۆ و ئی سیستمە پێسەو وەربەسێوە ورنەشنیایوەی وەردەموو ئینسانەکانە منریۆرە. سیستمێو چانە نەخشییان و ئەرەمجیان، کە کەس نمەتاوۆ هورش بشانۆوە. دەوڵەت تا بتاوۆ بە پاو بەرژەوەندییەکاو وێش کاردایوەش بۆ، باڵادەسیی وێش بە هەمیشەیی بکەرۆ، سەرمڕ پەنەوازییش بە بنەیانیوی پرۆتۆ-دەوڵەتی هەن. بەڵام پەنەوازییەکاو بنەیانەی، کەسایەتی و گلێرگە بە دەوڵەتیوە نییەنێ. ڕاسیینە بەبێ دەوڵەتی ئینسان متاوۆ جە هەر بارودۆخێوەنە ئارامتەر و ژیواێوی بەحورمەت بژیوۆ. ماناو ژیوای ئانێنە وەختیو گلێرگە بە ئیرادەو وێسەوە بژیوۆ، جا وەختەیچەنە متاوۆ وەروو حەقیقەتوو وێش بگنۆ. جە بێدەوڵەتیینە گرد چێوێ ئەگەروو دەسەبەربییەیش هەن، بڤەڵام ئی حەقیقەتە پەی دەوڵەتی پاسنە نییەن. حەر وەختێو دەوڵەت نەتاواش دەسەڵاتداریی وێش سەروو گەلیوە بسەپنۆ، ئیتر نمەتاوۆ بەردەوامیی بە وێس بدۆ. بەبێ گەلی هیچ نییەن و مەحکووما بە شکستی، چێگە چەنی بییەی هیچ مانیوە بەرنمەوزیۆ پێسە چەنی بییەیش هیچ مانیوە نمەدۆ، نەبییەیچش هیچ مانێوەش نییەنە.
لۆژیکوو دەوڵەت- تاتەی
دەوڵەت وێش بەرهەموو عەقڵی سەردەسەیین و ئەرەمەرزیایین، سیستموو دەسملەرەگێرتەی تالانکەردەی، دروێ، خەڵەتنای، ڕەنجوەری و ئەشکەنجە، یانێ گرد چێوێ خراپ دەوڵەتەنە هەن، پیسە مزانیۆیچ دەوڵەت هیچ نییەن. سیستمێوا کە وێش سەروو بەرهەمئاردەی و سەرچەمەو خەڵکی و هەرمانێ و تەنانەت گێرتەی ئینسانەکا بنیات منیۆ. دەوڵەت ئامرازوو چەوسنایوە و تەرسێن. سیستموو نکووڵیکەردەی و ئاسمیلەین. ئەرەمەرزیاێوە نییەن پەی بەرژەوەندیی گردینی. پەوکای گەل بە هیچ شێوێوە پێوسیش بە دەوڵەتی نییەن. ئینسانەکێ یاسا و ڕێسا داب و نەریتوو وێشا هەن. ئی نەریتێ سەروو بنەماو سەردەمەکاو وەڵێ ئەرەمەرزیێنێ، ئا یاسێ کە ئینسانەکا وێشا مبەرانە ڕاوە، بە پاو ئەگەر و بارودۆخوو وێشا جوابوو قۆرتەکاشا بداوە. حەر وەروو ئینەیچا گەل ئیرادە و دەسەڵاتوو وێش هەنش پەی راوەبەردەی وێش. بە یەکڕیزی و پیوەیی متاودێ قۆرتەکا حەل بکەردێ. بەڵام سیستەمێو بە شیوێوە بنیات نریان، کە ئا چەمکە کە خەڵک و گلێرگە بە بێ دەوڵەتی نمەتاوانە وێشا ببەرانە ڕاوە، مەژگوو خەڵکینە ورکنیان بییەن بە میتۆدێوی ئەرەمەرزیا. ڕاسیینە ئی سیستەمە بنەیانەیچەنە ئەرەمەرزیان، پەوکای دەوڵەت پێسەو تاتێوە لاو گلێرگەیوە تەماشە مکریۆ، کەمپەکاو دەوڵەتینە ئی نەریتە حەر جە زارۆڵەییوە، مونیۆ.
وێپارێزنای پێویسا چەنی قەوەت بکریۆ؟
پێسە سەریچۆ ئاماژەم پەنە کەردەن جەنگ ئامرازێوی دەسملەرەگێرتەین، تاڵانی، وێرانکەردەی و قڕکەردەین، کە دەوڵەتی نەخشەمتەن. جەنگکەردەێوەن کە گەل بە ئیرادەو وێش وێس مبەرۆنە ڕاوە و ورگێروو سەبەبی ڕەوای بۆ، نمەبۆ بە ئامرازوو جەنگی بشوبهنیۆ. دەوڵەتیچ تا بییەی وێش بپێکۆ، گرد جۆرە ڕێبازیوی جەنگی وەراوەروو گەلیوە بوزۆنە وەڵێ و بە ئامانجوو پێوەسکەردەی و کۆیلەکەردەی بەردەوامیی بە جەنگی مدۆ.
پەوکای گەلێ و گلێرگە پەی پارێزنای وێشا پەنەوازییسا بە جەنگی هەن، چونکوم جە بنکەو گلێرگاکانە ملکەچێ بێنی، قبووڵکەردەی کۆیلایەتی، بێدەنگی، قبووڵکەردەی هەراسانکەردەی، تاڵانی و دلێنەبەردەی ئاسان نییەن. ئەگەر کۆیلەیچ بۆ حەرگیز ئی ڕاسییە قبووڵ نمەکەرۆ و سرووشتوو ئیرادەکەیش بەرەو یاخیبییەێوە ڕاسواچانەی مبەرۆ. حەر وەروو ئینەیچا دەوڵەت گرد جۆرە شێوازێوی تایبەتی جەنگی دلێ خەڵکینە بنێ پنە موزۆ. پۆلیس ،سەرواز، میت، سیخوڕ و گرد جۆرە تەکنیکێوە، کە هەواڵگێریی جە وێش مگێرۆ ٢٤ سەعاتێ ئینا گلێرگێوەنە تا کۆنترۆڵش بکەرۆ، فشار وەش بکەرۆ قوەت بەکار بارۆ بکوشۆنەش.
پا سیستمە یاساییە کە مافوو ئانەیشە پنە مبەخشۆنە گرد چێوێوی بکەرۆ، حەرپاسە راو تەلەفزوێنی و ڕادوێنیوە و سۆشیاڵ میدیایوە دەس بوزۆ دلی گرد خانیوی گلێرگەی. بە پاو پێڕەوو یاسێ میاندەوڵەتیێ حەرچندە پڕۆسەو دەسملەرەگێرتەی دماییش ئامان، وەلێ هەڵای رابەروو گەلوو کوردی بە تندتەرین نۆع بەئەشکەنجەوە گیریان، ساڵەهان حەر کەسێو دژایەتیی ئینیشا بکەرۆ پاڵوو عەبدووڵلا ئۆجالانینە بمدرۆ وەرگێریی جە ئیرادەوی کوردایەتیی بکەرۆ و داواو سناسنامەو ئازادییش بکەرۆ، مگیریۆ و زیندانیی مکریۆ. زیاتەر جە ١٠ هەزار زیندانییا، کە تاکە تاوانشا داواو ئازادیینە، حەرچەندە ماوەو "سزادای"یشا تەمامیان و حەرچندە پەنەوازییەکاو ژیوایشا دابینێ نەکریێنێ مکوشیانە، وەراوەروو لۆجیکوو جەنگینە کە ئەدێوی ٧٠ و ٨٠ سالی مگێرانە، مافوو گرەد کەسیوا پەی وێپارێزنای جەنگ بکەرۆ.
تا گەل بتاوۆ وێش بپارێزنۆ پەنەوازرێ ئامانجەکاو جەنگی دەس وزۆنە
گەر مافێوە بەزۆر دەسوو گەلینە بەرئامابۆ، فرە ڕەوان گەل وێس بپارێزنۆ و دژش بمدرۆوە و جەنگ بکەرۆ، وەروو ئانەی ڕوێوە مێ، تاتەت، ئەدات، واڵیت، برات و هامسەر و هامراکەت چنە هورمگێرۆوە و و هیچ هەواڵێوەیچشا نمەزانی و تا ئاخر جە یۆیتا مکەرۆ، دەوڵەت پانەیچەوە نمەمدرۆوە، خاک و یانە و تۆ مسۆچنۆ و تاڵانێشا، ئینیشا وەرەچەمتۆ مکەرۆ و ماچۆ'گرد چێو هینوو منەن' ئازادیت گێرۆوە. ڕابەروو گەلوو کوردی پێسەو ڕابەریوی ئ سیاسەتوو دەوڵەتا زانێ و پەوکای داواو ڕێکوستەی و وێپاریزنای گەلاش کەردە، چارەسەرش پێشکەش کەرد و ڕاو سەرەوردای و ڕزگاریی گەلاش کەردۆ، ڕابەریوا کە بە ڕێکوستەی، مافەکا و بنیاتنیای یەکریزی و ئەلتەرناتیڤی سەروازیی وێش و بنیاتنیای مۆدێلوو ئازادیی پەی گلێرگەکا واوەی مافوو ژیوای بەدەس مارۆوە. بە ڕێکوستەی گەلوو کوردی و وەشکەردەی سوپاو گەریلای و ڕێکوستەی پارێزنایە هەرێمییەکا، وێپارێزنای و پارێزنای ڕەواو گەلوو کوردسانیشا وەش کەرد.
گەریلا ڕێکوستەی وێمانە و وێپارێزنایش قەوەت کەرد
گەریلاکاو ئازادیی کوردستانی هێزێوا، کە ئایدۆلۆژیا و فەلسەفەو ڕابەروو گەلوو کوردی جە چوارچوەو تەڤگەروو پەکەکەینە، پاریزنای ڕەواو گەلی پیسەو پروپاگەندەی جەکداری مبەرۆنە ڕاوە، چونکوم تەڤگەریوا جە خەڵکی وەش بییەن، بنکەی سەرەکییچش گەلا و ڕۆلەو گەلەکەو وێشا. ئینە ستراتیژوو جەنگوو سوپاێوی گەلین، کە زیاتەر جە پەنجا ساڵان دلێ گەریلای و گەلینە بە هەزارا گەشمەردێش دێنێ و تا بێ گەورەتەر بۆ و وەڵێ مگنۆنە. پەکەکە کە پەشتی بە بناغیوی تۆکمەی مبەسۆنە حەرگیز نمەوڕیۆنە و دلێنە نمەشۆ، ئیساتێ مۆدێلوو تاکتیکوو جەنگیا پەی گردوو گەلاو دنیێ. جمیەرێوی سەرمەشقانەو ئینسانی کە بتاوۆ٩ ژیوایوی ئازاد و گلێرگێوی ئازاد و نۆدێلوو ژەنێ سەرمەشقێ ئازادێ وەش بکەرۆ سوپاو گەریلاینە، کە بە نزیکەیی گرد یاگێوی کوردسانی، تورکیا، عێراق، ئێران و سوریانە بەردەوامەنە بێ دووەدڵێ خەبات پەی ئازادیی بەشەکا مکەرۆ. سەرەڕاو ئانەیە کە دەوڵەتوو تورکی چا جەنگەنە کە ساڵانیوەن بەردەواما، ڕەنگای ملوێنێ جارێو دژوو سوپاو گەریلاکا دۆڕیابۆ، بەڵام پاش سەروو کاولکاری و تاڵانیی مگێرۆرە و بە گرد نۆعێ هجوومێ مکەرۆ و وەرەچەماو گردوو دنیێوە جەنگ دژوو سوپاو گەریلای مکەرۆ. دەوڵەتوو تورکی کە زیاتەر جە ٤ ساڵان بەردەواما، هیچ سەرنەکەوتەن و وەردەموو ئیرادەو گەریلایەنە مەڕیان، سەرەڕاو ئینەیچە گەرەکشا پا شکسە سەرەمڕا وەردەموو رای گردینینە بەهانێ پەی تاوانە جەنگییەکاو وێش بارۆوە، وەختیو باسەکە مێ سەروو کوردی و کوردسانی گرد کەس بێدەنگەن، بەتایبەتی پەدەکە و بنەیانەو بارزانی، کە فرەتەرین لەزەتش چنە موینا و پینەیوە نبمەمدراوە تا ئاخر خزمەتوو ئی دەسەڵاتە چەپەڵەیە مکەرا و تابکۆو خیانەتی تارێخەنە ئەوەخوای مکەراوە، گەورەتەرین تاوان و گوناحێ مکەرا.
پێویسا گەلوو پانیشتی بە خولقنای وێپارێزنای وێشاوە پارێزگاریی جە خاکیشا بکەرا
ساڵەو ٢٠٢١یوە شێفی فاشیست ئەردۆغان و خیانەتکاری پەدەکەی و بارزانی، کە خاکشا پێشکەشوو ئەرەگیرا کەردەن، خاک و جوگرافیاو کوردسانیشا فاڕان، پەدەکە چندین خاڵینە یاگێ وشکنایش نیێنێ، بە سەفەربەرکەردەی گردوو فرسەتەکاشۆ، بنکێ وبارەگێش وەشێ کەردێنێ، کە ڕامدۆ بە سیاسەتوو دەسملەرەگێرتەی تورکی و قەوەتش مکەرۆ. نزیکوو ئا مەیدانانە، کە گەتیلاش چەنەن قولێ و نوقتێش وەشێ کەردێنێ. چی ئی دەسەڵاتە پاسە بە خاسش مزانۆ، کە پێسە هەقە جە گەلەکەیش بکەرۆوە؟ چی فشار وەنەو خەڵکەکەیش مکەرۆ پیسەو کۆیلێوی وەردەموو دەوڵەتیونە بمدرا؟ بە بەهانێ پەشتگیریی پەکەکەیوە چندین دەگێ چۆڵێ کریێنێ و خەڵک گیریان و بوردومان و باخ و باخاتیشا کریان.
پەی مدرنای ئی تاڵانکارییە پ مشۆم پەشتگیریی گەریلای بکریۆ. وەروو ئانەیە پەدەکە ڕاو ویش پەی پانیشتوو کوردسانی دیارییە کەردێنە، بە ئاشکرا بازرگانی و مامەڵەش پۆوە مکەرۆ، پێسە بورەشیوی خاک و وەڵاتی ملۆنە دلێ سەورۆگاو تاریخیوە و گەریلایچ پیسەو تاقانە سوپیوی قرەمانێ کە خاکی و کوردسانی مپاریزنۆ، تارێخەنە مەنۆوە. پەنەوازا گەلوو پانیشتی هورش بچنا یا گێرتەی خاکەکەیشا یا پاڵوو فیداییەکاو کوردسانی گەریلایەنە مدرامان بکەرا و وەڵاتیشا بپارێزنا.
گەلوو پانیشتی بە هەزارا گەشمەردێش دێنێ، دژوو ڕژێموو سەدامی مدراوە، فرەو کەسوکاریشا دلینە شی و یانە و لانەسا تێک شی، بە کیمیاییوارانوو هەڵەبجەی نەمدرێ و ڕاشا بە دیکتاتۆرتی نەدا، ئیساتێنە پەدەکە و حکومەتوو بارزانی بە دەساو وێشا ئی خاکەیە پیس مکەرا کە خەڵک ونیش پەی مت. ئانێ خاکیشا جەدەس مدانە نمەتاوا کە بواجا' من مژیوو، ئاژەڵ و باخم هەن' بە لوای سەروو قەبرەو گەشمەرداسا نمەتاوانە ڕۆحوو گەشمەرداسا بە دۆعێ ئاسوودە بکەرا، بێدەنگی وەراوەروو خیانەتینە مەردەیا، پەوکایی مشۆم پانیشتیێ زوو دژوو ئی ئەرەگیرکەرا بمدراەو و پا ئیرادەوە ئازادییشا دەس وزانێوە. ئەگەر هەرکەسێو بە ئیرادەو وێس هەوا هوربلووشۆ، نەتاوۆ چەکێ بەرز بکەرۆوە، تەوەنیو بشانۆ، کەس نمەتاوۆ بپارێزنۆش، چونکوم گەلیوی یۆگێرتە جە حکومەتیوی قەوەتتەرارێ. کە دەنگێو بەرز مبۆوە یانێ چیوێوە هەن و سەرەورداێوی هەن، گەلوو پانیشتی حیچ چێوێوەشا نییەن کە چەنەش بتەرسا، ئانێ کە خاکوو وێشا مپارێزنا حەقوو وێشانە.
ئازادی هیچ وەختێوە نمەدریۆ، مشۆم بەدەسش باری. گەریلاکاو ئازادیی پەی بەدەسئاردەی ئازادی گردوو قوەیشا دان پی ڕێبازەیە، کۆشیای و جەنگوو حورمەتی نیشانێ ئینەینە.
