ۋەرپەرسێوە سەروازی ئەمەریکای بە ئاژانسوو فرانس پرێسیش ئەرەیاۋنا "جە بنکەو ئاسمانی عەین ئەسەدی بە فڕۆکەی بێفڕۆکەوان دژوو هامپەیمانا و هێزەکاو ئەمریکای هجوم ئەنجامدریان."

ئا ۋەرپەرسە ئاماژەش پانەیچ کەرڎەن، "هجومەکە حیچ زەرەرۍ گیانی و ماددیش ۋنە نەکۊتەنۆ."

هامشێوەو دەیان هجوما وەڵتەری، گرووپێوە بە نامۍ "ۋېڕاگری ئیسلامی عێراقی" چێروو ئەمرەو حەشدی شەعبینە هجوموو سەروو عەین ئەسەدیش گرتەن ئەستۆ.

جە سەرەتاو دەسپنەکەرڎەو جەنگوو ئیسرائیلی و حەماسیۆ، هجوم پۍ سەروو بنکە سەروازییەکا ئەمریکای و هامپەیمانی میان دەوڵەتی دژوو داعشی جە عێراق و سوریانە زیاڎشا کەرڎەن.

گرووپە هجومکەرەکۍ پەشتیوانی واشنتنی پۍ ئیسرائیلی بە بەهانۍ ماراوە.

پېسە جوابېوە پۍ هجومەکا، واشنتن چنڎین کەڕەتۍ هجومش کەرڎەن سەروو میلیشیاکاو سەر بە ئێرانی جە عێراقەنە.