سەرۆکو گرڎیی مەهەپەی دەوڵەت باخچەلی، دماو مەراسیمو چەک دلېنەبەردەی پەکەکەی ئەرەیاۋنێوەش وەڵاکەرڎۆ. باخچەلی ئاماژەش پانەی کەرڎ جە لێوە وڵات، جە لێوەتەرۆ ناوچەکە بەرەو سەردەمێوە تازەی و هومێڎ بەخشی هەنگامە منیۆ. باخچەلی باسش چانەیە کەرڎ، سەرو بنەماو 'بانگەوازو ئاشتی و گلېرگەو دیموکراتیک'ـی ٢٧و شوباتی جە ئیمڕاڵییوە، پەکەکە جە ٥-٧و ئایارو ٢٠٢٥ینە کۆنگرەو ١٢و ۋێش بینا و بیەو ڕێکوزیای ۋێش دمایی پنە ئارڎ و دمایش بە گرڎ ئەوەکۊشایې چەکڎاریی چێرو نامې پەکەکەینە ئارڎ، ئەرەیاۋناش کە چەکش نیارە و واتیچش، "هەروێش پېسە جە دماین پەیامی ڤیدیۆیشەنە بەرگنۆ، ڕابەری ئەرەمەرزنەرو پەکەکەی سەرو قسې ۋێش بې، قەولەکەش بەرڎ سەر و هەڕەشې و مەترسییە جەهانی و ناوچەییەکێش جە کاتو ۋێشەنە درک پنە کەردۍ."

'دەم پارتی سیاسەتێوە هامسەنگش پەیڕەوکەرد'

باخچەلی ئاماژەش پانەی کەرڎ، دەم پارتی بە هێڵێوە سیاسیی ۋەرپەرسانە، بە قسې و هۊرسەنگنای هامسەنگ جە ڕیزو واڵەو-برایەتی هەزار ساڵەیۆ مردا و واتش، "ئېژا سەرۆککۆمارما کە جە سەرەتاوە خاوەنداریش جە قەرارداری 'تورکیای بێ تیرۆری' کەرد و فاڕاش پەی سیاسەتێوە، کە تا کۆتای دۊڵەت و حکومەت خاوەنداریشا چی پرۆسەیە کەرڎ."

'ژیۋگەو ئاشتی و ئارامی سەرکۊت'

باخچەلی دەسنیشانش کەرڎ جە ئیسە بەدماوە ڕووەدایې گرنگ و تاریخی ڕووە مڎا، کە ڕێکوستەی گرووپ بە گرووپ چەک دلېنەبەرا، هامکات دمایی بە سەردەمێوە تاریکیچ مێنە و واتش: "هیواو بڕې لایەنې ئایدۆلۆژی و سیاسیی کە بە مەرامو زیڼەڕاگێرتەی ژیۋگەی پرۆڤۆکاسیۆنی پەرەشا بە نکۆڵیکەردەی و بەرهەمئاردەی دا، جە ۋەرا ۋەرو ژیۋگەی ئارامی و ئاشتینە شکسش وارد. بەڕاسی چ پەی تورکیای و چ پەی هەرێمەکەیچ ڕوانێوە فرە گرنگێنې. پۊکەی ئی ڕووەدایە ئەرێنییا و دڵو ئینسانی وەش مکەرۆ، بەڕاسی جە ئەڎابیەیۆین و یاگې ئاسوودەییا جە ویژدانو ئینسانینە. سوپاسو گرڎ کەسێ و بەتایبەت سەرۆککۆماری مکەرو کە بە ئامانجو 'تورکیایې بێ تیرۆر'ی ڕەنجشا دا، کۊششا کەرڎ، پاڵپەشتیشا کەرڎ، هیواڎارەنا ئی سەردەمە تازە بە خێر و مەسڵەحەتو میللەتە ئەزیزەکەیما مەڕیۆوە.