بە ئەرەیاۋنێوە دەرەنجاموو کۊبیەیۆ؛ کۆمیتەو دیپلۆماسی هامبەشوو پارت و ڕێکوزیا سیاسیەکا کوردسانی و کۆمیتەو کار و چالاکیەکا سەڎەو پەیمانوو لۆزانی و کەسایەتییە کوردسانییە سەربەخۆکا، ئاشکراکریا.

دەقوو ئەرەیاۋناکەی پی جۊرەنە:

" ناوەندوو کەنەکەینە جە برۆکسڵ بە ئاماڎەبیەی نوێنەرا پارت و ڕێکوزیا سیاسیەکا کوردسانی، کۆمیتەو دیپلۆماسی هامبەشی، ڕۊو ٢٣-٣-٢٠٢٤، ویس و حۆتەمین کۊبیەیۆ ۋێش چنی کۆمیتەو کار و چالاکیەکا سەڎەی پەیماننامەو لۆزانی و جەمۍ کەسایەتیۍ کوردسانی سەربەخۆی پێکئاورد. ۋەروو مەڵامەتوو ئاژەو کوردسانی ئی کۆبیەیۆ ۋەرفراوانە ئەنجام دریا. دەرەنجامەکۍ کۊبیەیۆکەی بە شێوێوە ۋەرفراوان وەڵۍ کریاوە. ۋەروو هەڕەشا و هجوومەکا دوژمنی سەروو کوردسانی بانگەوازیێوە بەپەلە پۍ ڕای گرڎیی وەڵاکەرمێوە.

دەوڵەتوو تورکی، جە پانیشتوو ۋەرنیشتوو کوردسانینە ئینا ئاماڎەکارینە پۍ ئەنجامدای ئۆپراسیۆنێوە گەورەی. ئەردۆغان و کاربەدەسا دەوڵەتوو تورکی جە گولانەتەرین فرەسەتەنە هەڕەشۍ جە کوردا کەرا و بە ئاشکرا ماچا ئۆپراسیۆنی گەورەی ئەرەگیری پێکمارمۍ. ئامانجوو دەوڵەتوو تورکی پۍ دلێنەبەردەی گرڎوو دەسکۆتەکا کوردین. پۍ ئانەی پی ئامانجەیشە بیاوۆ گرڎ ڕێوە گێرۊنە ۋەر. پۍ بەدەسئاردەی هامکاری، دەسشکەردەن بە هەڵەمەتێوە دیپلۆماسی. شاندەکێش هەر جارە و ئینۍ یاگێنە، جارێ ئینۍ ئەمریکانە، جارێ ئینۍ ڕوسیانە، جارۍ جە ئەورپا و جارێوە ئینۍ وڵاتا عەرەبیینە.

حەرپاسە جە لێوەتەرۆ چی مانگاو دماینە چنڎین جارۍ سەردای عێراقی و کوردسانی کەرا و یان شاند جە عێراقۆ کیانا پۍ ئەنقەرەی. ئامانجوو دەوڵەتوو تورکی چی کاراشەنە ئانانە کە دەوڵەتوو عێراقی و حکومەتوو هەرێموو کوردسانی بکەرۆ بە هامبەشوو کارە خراپەکاش. هەرچیش نامۍ بنیەیمۍ ئانەنە کە دەوڵەتوو تورکی دژوو گەلوو کوردی ئینا جەنگەنە. گەرەکشا حکومەتوو عێراقی وزۆ جەنگۆ جە دژوو گەلوو کوردی.

دەوڵەتوو تورکی دژوو گرڎوو دەستکۊتەکا کوردی و دژوو دەسکۊتەکا هەرێموو کوردسانین. سەروو گردیشاوە ئەردۆغان و جەمۍ ۋەرپرسۍ دەوڵەتوو تورکی چنڎین جارۍ واتەنشا و ماچا 'ئا غەڵەتۍ جە سەرنیشتوو عێراقینە سەرمارە ویەردۍ، جە سەرنیشتوو سوریاینە مەکەرمێشا' پێویسا گرڎ کوردێوە عال جە ماناو ئی قسۍ بیاوۆنە. سیاسەتوو دەوڵەتوو تورکی پۍ دمایی ئاردەین بە دەسکۊتەکا پانیشتوو کوردسانی. پێویسا گرڎوو کوردا دژوو ئی سیاسەتەیە مرداوە. پێویسا کاربەدەسا پەدەکەی جە ۋەرا ۋەروو ئی مەترسیانە کە ئامانجش دلێنەبەردەی ستاتۆو هەرێموو کوردسانیا، هوشیار و هەستیارانە مامەڵە بکەرا.

جە لێوەتەرۆ ۋەرپەرسا دەوڵەتوو تورکی، ڕووانە هەڕەشۍ جە ۋەرپەرسا یۊبیەی نیشتیمانی کوردسانی (یەنەکە)ی کەرا و فشارێوە فرە وزا سەروو مەنتیقەو سلێمانی. ئی هەرەشۍ شیاوو قبوڵکەردەی نیەنۍ و پێویسا گرڎ وڵاتپارێزێوە دژوو ئی هەڕەشا مردۆوە.

سەروو ئی بنەمایۍ:

کۊبیەیۊکەنە سەرنجوو گرڎوو کوردسانیا و دۆسەکاشا بە شێوێوە بەپەلە وست سەروو هەڕەشا، هجووم و ئاماڎەکاریی ئۆپراسیۆنەکا دەوڵەتوو تورکی سەروو سەرنیشت و ۋەرنیشتوو کوردسانی و بانگەوازوو ئانەی کەرۆ کە گرڎوو هێزە کوردسانی و دۆسەکا کوردی جە ۋەرا ۋەروو ئی هجووما دەوڵەتوو تورکینە، دژایەتی ۋێشا بەربڕا.

کۊبیەیۆکە هەڵوێستەکاو یەنەکەیش جە ۋەرا ۋەروو ویستە ناڕەواکا دەوڵەتوو تورکینە، بە هەڵوێستێوە وڵاتپارێز و نەتەوەی موینۆ و فشار و هەڕەشەکا دەوڵەتوو تورکی ۋەرا ۋەر بە یەنەکەی شەرمەزار کەرۆ.

گلێرۊبیەکەی داوا جە 'گرڎوو پارت، ڕێکوزیا، دام و دەزگاکا کوردسان'ی کەرۆ بە ڕۆحیەتوو نەورۆزیۆ کوۍ باوە و یۊبیەی نەتەوەیی بەقوەتتەر کەرا و پێوەرە دژوو هجوومە ئەرەگیریەکا مرداوە.

کۊبیەیۆکە داوا جە حکومەتوو عێراقی کەرۊ و ماچۆ؛ دژوو هجووم و ئۆپراسیۆنەکا دەوڵەتوو تورکی جە عێراقەنە مردۆوە، بنکە و بارەگا سەروازییەکا سوپاو تورکی لابەرۆ و دمایی بە هجومە ئەرەگیریەکا دەوڵەتوو تورکی بارۆ.

کۊبیەیۊکەی داوا جە دەوڵەتوو تورکی کەرۆ؛ دەس چی هەڕەشە و هجووما هۊرگێرۊ و گێڵۊوە پۍ سەروو پرۆسەو دیالۆگی و ئاشتی و چارەسەری سیاسی.

کۊبیەیۊکەی، داوا جە ڕێکوزیاو نەتەوەیۊگێرتەکا، هێزە زلهێزەکاو جەهانی و ڕای گرڎیی جەهانی کەرۆ، جە ۋەرا ۋەروو هەڕەشا و هجوومەکا دەوڵەتوو تورکی پۍ سەروو کوردسانی مرداوە و پەشتگیری جە کۊشیای و تەڤگەری ئازاڎیی گەلوو کوردسانی بکەرا."