نوویسەر و پرۆفیسۆر د. عەباس وەلی ئاماژەش پانەی دا جەنگو ئیسرائیل-ئێرانی پلانە و پلانمجش ئەمریکان و واتش: "یۊگێرتەی هێزە کوردییەکا جە ۋەرکۊتوو کوردەسانی و وەشکەردەی هێزێوە هامبەشی سەروازی گرنگا.
جەنگو ئێران و ئیسرائیلی جە تاریخێوە نزیکۆ بیەیش هەن و پی دماییەیچە پی جەنگەو ئیساتۍ هۊرچەرخیا پەی وەرکۊتەی ڕاسەوخۆی سەروازی. حەرچڼە هامسەنگییە هەرێمییەکۍ جە دماو جەنگو ئیسرائیل-حەماسیوە کە جە ٧و تشرینی یووەمو ٢٠٢٣ێنە بەخێرای فاڕیۍ. هرووژمە ئاسمانییەکۍ ئیسرائیلی پەی سەرو خاکو ئێرانی و ۋەرپەرچدایۆ هرووژمەکا جە لایەنو ئێرانیوە ئانەی بەروزۆ کە ئیتر جەنگەکۍ پېوەس بە دیزاینکەردەیۆ ۋەرکۊتوو مېیامینی تەنانەت جە ئاستو جەنگی ڕاسەوخۆو دۊڵەتەکایچەنە ئاسایی بیەنۆ.
پسپۆرو ۋەرکۊتوو مېیامینی، پرۆفیسۆر. د. عەباس وەلی جە ڕاو ئاژانسیماوە هۊرسەنگنایش پەی پێشئامایەکا ئیساتۍ کەرد و ئاماژەش پانەی دا ئیسرائیل هەم پەی پارېزنای بەرژەوەندییەکا ۋێش و هەمیچ پېسە هێزێوە وەکالەتی بە ئامانجو بەرژوەندیییە هەرێمییەکا ئەمریکای جە ناوچەکەنە دەور گێڵنۆ.
د. عەباس وەلی ئاماژەش بە ئامانجە دیار و پەنهانەکا جەنگەکەی کەرد و واتش: "دیارتەرین ئامانجو جەنگەکەی پەی ناچارکەردەی ئێرانین دمایی بە چالاکییە ئەتۆمی و بەرنامە مووشەکییەکاش بارۊنە، یان جە دلېینەنە فاڕیای جە ڕژێمەنە وەش بکەرۆ."
د. عەباس وەلی ئاشکراش کەرد، ئێران سەرەڕاو ئانەی هەر جە سەرەتاوە زەرەری گۊرەش ۋەرکۊت، بەڵام وەرەنگاربیۆ و جەنگێوە مووشەکی کاریگەرش جە دژو ئیسرائیلی دەسپنەکەرڎ و واتش: "ئی ئاژەیچە فشارەکێش سەرو ئیسرائیلی زیاتەرۍ کەردێنۍ و لایەنە سیاسییەکۍ جەنگەکەیش قوڵتەرۍ کەردێنێوە."
د. عەباس وەلی سەرنجش وست سەرو دەسوەردایە گریمانەییەکا ئەمریکای و واتش، ئەر ئۆپراسیۆنی زەمینی ڕاسەوخۆو ئەمریکای جە جەنگەکەنە کەما، بەڵام دەسوەردای ئاسمانی پەی سەرو بەرنامە ئەتۆمییەکا ئێرانی جە لایەنو ئەمریکایۆ ئەگەرێوە کراوەن و جە ڕۆژڤەنە بۆ.
د. عەباس وەلی سەرنجش وست سەرو سیاسەتەکا دۆناڵد ترامپو سەرۆکو ئەمریکای و دەسنیشانش کەرڎ ترامپ متاوۆ بە سەرکۊتەی چی جەنگەنە هەوڵو قەرەبووکەردەیۆ لاوازییەکاش جە سیاسەتو دلېینەینە بکەرۆوە.
جەنگەکە و ۋەرکۊتوو کوردەسانی
د. عەباس وەلی جە درێژەو هۊرسەنگناکەیشەنە سەرنجش وست سەرو کاریگەریییەکا جەنگەکەی سەرو ۋەرکۊتوو کوردەسانی و ئاماژەش پانەی دا فاڕای گریمانەکریاو ڕژێمی متاوۆ دەرفەتێوە پەی کوردا وەش بکەرۆ.
وەلی باسش چانەیە کەرد کە پەنەوازا پارتە سیاسییە کوردییەکۍ جە چوارچێوەو بەرنامە و ڕاوجای سەروازیی یۊگێرتەنە یۆگێرا. د. عەباس وەلی ئاشکراشکەرڎ ئی ئاماڎەکارییە هەم پەی ئانەینە دماو فاڕای ڕژێمی جە ئیدارەو گریمانەکریاینە خاوەنو قسۍ با و هەمیچ پەی ئانەی جە دژو شەپۆلە فشارە گریمانکریایەکانە مرداوە، گرنگیی و کاریگەریێوە فرەش هەن.
نوویسەر و پرۆفیسۆر. د. عەباس وەلی ئاماژەش پانەیە کەرد، سەرو لایەنە کوردییەکا پەنەوازا کە گرڎو ناکۆکییەکا ۋێشا وزا لاوە و وتارێوە دیموکراسیی و نەتەوەیی وەش بکەرا. د. عەباس وەلی جە دمادماینە واتش کورد جە سەیەو ئا بەرنامە یۊگێرتەینە، متاوا بانۍ بە یۆ جە کارەکتەرە بەهێزەکا سەردەمو تازەو ئێرانی.
