بەرنامەکاو نەورۊزوو ٢٠٢٤ کە ئێساڵ ٥٧ ناوەندانە بە گردی و سەدان یاگێنە مەبارەک کریۊ، ئاشکرا کریێ. کۊنگرەو گلێرگەی دیموکرات (کەجەدە)ی، جمیەوو ژەنە ئازاڎا (تەژەئا)، پارتی دیموکراتیکوو هەرێمەکا (دەبەپە) و پارتوو یەکسانی و دیموکراسی گەلا (دەم پارتی) ناوەندوو کلتووریی دیجلە فوراتی، بەرنامەکاو تایبەت بە نەورۊزوو ٢٠٢٤یشا ئاشکرا کەردێ. هامسەرۊکوو کەجەدەی بەدران ئۊزتورک، هامسەرۊکەی گردینەو دەبەپەی چیدم کلچون ئوچارە، هامسەرۊکەی گردینەو دەم پارتی تولای حاتیمۊگولار و چالاکەو تەژەئای دیلان گوڤەنچە و چندین کەسۍ بەشدارۍ ئەرەیاونایەکەی بێنێ، کە بە زوانی کوردی هامسەرۊکوو کەجەدەی بەدران ئۊزتورکی واناوە.

ئەرەیاونایەکەی پێسنەن:

"نەورۊز کە پەی گەلاو میزۊپۊتامیای ئەوەڵوو وەهارین و مزانیی تازەبییەیۊن، جە کەسێتیی گەلوو کوریەنە فاڕیا پەی ئێروو مدرامانی، کە بە سەدان ساڵێن بەرڎەواما. گرد وەختێوەنە گەلوو کوردی وەراوەروو سەرڎەسە، ئەرەگیرکەر و قڕکەرا کۊشیان و قوربانیی گەورەش بەخشان. ڕابەروو گەلوو کوردی عەبدوڵا ئۊجالان بە واتەی وێش 'جەنگوو ئێمە هیچ وەختۍ وەراوەروو نەژاد، ئاین، مەزهەبی نەبییەن، جەنگوو ئێمە وەراوەروو نەزانی، ناحەقی، دماکەوتەیی و وەراوەروو گرد جۊرە فشار و زۊرڎاریێوە بییەن' جەنگوو کوردیش پێناسە کەرڎەن. جەنگوو گەلوو کوردی جەنگوو گردوو گەلاو دنیێن، هینوو گردوو چێرڎەسا و چەوسیاوەکان.

نەورۊز کە پەی گەلوو ئێمە بە ماناو پەیابییەی و ژیواێوە تازەین و ترووسکەو  دماڕوێوە ئازاڎین؛ لاو گردوو گەلاو  وەرکەوتوو دلێراسەیۊ، بییەن بە ڕوێو کە گردوو گەلاو دنیۍ دڵنیایی وێشا دلێنە ویناوە، خاوەنداریی چی ڕووەیە کەرا و مەبارەکش کەرا. نەورۊز هەمان وەختەنە بە ماناو کۊشیای گەردوونین وەراوەروو تێگەو دەوڵەتی فاشیستی، تاک پەرسی، نەژادپەرسی و زایەندپەرسینە.

چڵۊسکێوە کە بیێنە بە سیمبۊلوو کۊشیای، کۊشیای کاوەی ئاسنگەرین وەراوەروو زوحاکی زۊرڎاری. دماو سەدان ساڵا جە زیندانوو ئامەدی کە تاریکی و خراپەکاری و ئەشکەنجەش دلێنە بێ. ئیساتۍ ئینا دەسوو مەزڵوم دۊغانینە و چڵۊسکەو ئازاڎیی، کە زەکیە ئالکانۍ و راشان دەمیراڵۍ بەرزەشا کەرڎۊ، ڕاو بیەیشا نیشانەو گەلوو کوردی دێنە، نەورۊزش کەرد بە نەورۊز و گەلوو کوردیچش کەرڎەن بە گەلوو نەورۊزی.

نەورۊزێوە کە بە باوڕ و مدرامانۊ مەبارەکش کەرمێ، پەی ئێمە کە چێروو فشاروو قڕکەرڎەینە هەنمێ، پەی ئازاڎیی کۊشیای ورگێروو گرنگییێوە تارێخیین. ئا زوڵمە کە بی بە بایسوو نەورۊزی پێسە میراتیێوە مدرامان تارێخەنە ئارۊیچەنە بەرڎەواما. دوژمنایەتی وەراوەروو شناسنامە، زوان، جوگرافیا، سروشت، ئاوی و کەشوو گەلوو کوردی ڕۊ بە ڕۊ زیاتەر بۊ. وەراوەروو گرد جۊرە سیاسەتێوە قڕکەرڎەینە، هەڵوێستوو گەلوو کوردی ڕۊ بەڕۊ وێش فاڕان پەی  مدرامانێوە شکۊداری. مەیدانوو نەورۊزی مەیدانیوە فرە گرنگوو ئی مدرامانە  شکۊدارەینە. گەلوو کوردی کە مدرامانەکا کەرۊ بە گۊنگرەو گەلا و ئیرادەیش نیشانە مدۊ، نەورۊزوو ئێساڵی فاڕۊ پەی کامپینوو 'ئازاڎیی جەستەیی پەی عەبدوڵا ئۊجالانی، چارەسەری سیاسیی پەی پەرسەو کوردی'.

ئازاڎیی ڕێزدار عەبدوڵا ئۊجالانی، کە پارادایمەکاو دیموکراتیک، ئیکۊلۊژی و ئازاڎیی ژەنا پارێزنۊ گردوو جیهانینە وەڵا بییەنۊ و قبووڵ کریۊ، هەمان وەختەنە ئازاڎیی کورڎا و گردوو گەلا. ڕێزدار عەبدوڵا ئۊجالانی کە ئینا چێروو سیستموو ئەشکەنجەو ٢٥ ساڵەو ئیمراڵیینە، گرد چەمپەنەکەوتەێوە کە چەنیش ڕاو  ئاشتیێوە بەحورمەتیش نیشانە دێنە و ئانەش دیاریی کەرڎەنم کە پەی ئی چێوەیە گرد نۊعە وەرپەرسیێوە ورگێرۊ. بەڵام ئەرەبڕیایوە ڕەهای گۊشەگیریی ئەرەگیریان موازا پەیوەندییش بە دنیێوە بڕا.  وەروو ئینەیە بەدڵنیاییوە، بڕواداری و جەختکەرەیۊ مەیدانەکاو نەورۊزینە با بەمەیدانێوە، کە گۊشەگیرییش دلێنە پارچە کریۊ، ئازاڎیی بەڕێز ئۊجالانی دەسەبەر کریۊ، کە پارێزنەر و خەباتکارێوە ئاشتیی بە حورمەتا.

نەورۊز چندە مدرامان و ئازاڎی؛ یۊبییەین. هەرچوار پارچەو کوردستانینە  گرد یاگێوە جیهانینە داواێوە سەرەکییە و وەرمێوی بەنرخ، یۊبییەی نەتەوەیین. دلۍ جەنگی یەرەموو جیهانینە، کە وەرکەوتوو دلێڕاسەی جیهانینە واوەی دیزاین کریۊوە و چندین قەیرانۍ و نەهامەتیێش چەنەنێ؛ هەرمانەو گردیمانە چێروو ئی زۊرڎارییەینە یوۍ بیمۍ و وەراوەروو خیانەتی و هامکاریکەرڎەی نەیاراماوە هەڵوێست نیشانە بدەیمێ. ئی هەڵوێستە وەراوەروو گەلیماوە قەرزێوەن و مشۊم دەیمێش. وەعدوو یۊبییەی و ئازاڎیی مدەیمۍ بە گەلی و گردوو ئا قارەمانا کە عەلەمەو نەورۊزیشا یاونێنە ئی ڕوە.  

ڕاپیمای ئازاڎی کە مانگەو تشرینوو دووەمینە ساڵوەگێڵوو پیلانگێڵنیی میاننەتەوەیینە کریا، مانگەو تشرینوو دووەمینە تا گەملیک یاوا، جە ١ پەی ١٥ شوباتی گردوو شارەکاو کوردستانیرە گێڵا، پا قوەیە کە مەیدانەکاو  ٨وو ئادارینە ورش گێرتەن، نەورۊزنە پڕۊوە پەی قۊناغێوە تازەی. وەختێوەنە ئێمە بە ڕۊحوو مدرامانیوە بەرەو نەورۊز ملمێ، گرد شار، مەنتێقە، گەڕەکە و دەگایەکاو کوردستانینە گرد یاگێوەنە بە دروشموو 'ئەرەپڕە، وەختوو ئازاڎی و سەرکەوتەین' نەورۊزی مەبارەک کەرمێ. یوەمین ئاویروو نەورۊزی ١٥و ئادارینە دەپێ-نە کەرمێوە، کە وڵاتی کاوەی هامچەرخی مەزڵوم دۊغانین، کە تاریکایەتیی سەرڎەمیش بە یەرۍ دارۍ نەوتاویۍ ڕۊشن کەرڎۊ و پەی ڕاو گەلوو کوردی بی بە ڕۊشنایی. هەمان ڕۊنە سەروو بورجوو ئامەدی و کادیفەکالیە ئیزمیر، کە بیۍ بە بە سیمبوڵوو نەورۊزی، ئێر کەرمێوە. ڕوەکاو دماتەریچ شارەکاو وان، ئیلح، شڕناخ، ئەستەنبوڵ، ئیزمیر و مێرسینینە کۊشیای ئازاڎی و دیموکراسی گەش کەرمۍ و ٢١وو ئادارینە تاجە کەرمۍ سەرەما. پی بۊنەوە داوا وەنەو گردوو گەلوو کوردی و گەلاو وەرکەوتوو دلێراسەی کەرمۍ با بە پریشکۍ ئاویری جە نەورۊزوو ٢٠٢٤ینە.

وەخت وەختوو ماڕای گۊشەگیری و ژیوای ئازاڎوو ڕابەرێتیین.

وەخت وەختوو  یۊبییەی نەتەوەیی گەلوو کوردین.

وەخت وەختوو خاوەندارێتیی زوانوو ئەدۍ و شناسنامەی و چاندین.

وەخت وەختوو هەڵوێستین  دژوو ئەرەگیرکاری، پلانگێڵنی و قڕکەردی.

وەخت وەختوو کۊشیای هامبەشوو گەلان، کە مشۊم وەراوەروو ستەمیوە نیشانەش بدا.

وەخت وەختوو ئانەینە نەورۊزوو مدرامانی فاڕمۍ پەی نەورۊزوو ئازاڎیی.

نەورۊز مەبارەک بۊ

نەورۊز مەبارەک بۊ."