''ڕاپیماو گۊرەی ئازاڎیی'' کە پەی ئازاڎیی جەسڎەیی رابەروو گەلوو کوردی عەبدوڵا ئۆجالانی و چارەسەری دیموکراتیکی پرسوو کوردی جە ١و شوباتیۆ وان و قەرسۆ دەسشپنەکەردەن ئارۆ میاوۆ بە دمایی. سیاسەڎمەدارا و نوێنەرا رێکوزیا دیموکراتیکە مەدەنیەکا جە ساڵیاڎوو ٢٥ەمین پیلانگێڵنیی میان نەتەوەیینە جە کۊڵانەو عەلیگۆری مەنتیقەو پرسوسی رحاینە بەردەوام بێنۍ جە ڕاپیماکەیشا. تەسەور کریۆ کە بەشدارا ڕاپیماکەی دماتەر بلا پۍ دەگاو ئامارای کە ماوا و شۊنماو جە ئەڎابیەو رابەروو گەلوو کوردی عەبدوڵا ئۆجالانینە.

بەشدارا مەنتیقەکەی بە دروشمەکاو 'ئازاڎیی سەرۆکی ئازاڎیی گەلان'، "هەزار سڵامۍ جە ئیمراڵی"، "بە گیان بە ونی ئینایمۍ چنیت ئەی سەرۆک" و "بێ سەرۆکی ژیۋای مەبۆ" پێشوازیشا ۋنەکریا و چا کۆنفڕانسێوە رۆنامەوانی سازکریا.

پەرلەمانتاروو دەم پارتی عومەر ئۆجالان قسێش کەردۍ و واتش، "ئارۆ پۍ ئێمە ڕووێوە سیاوا. بەڕێز ئۆجالان بە پیلانگێڵنیێوە میان نەتەوەیی رادەسوو تورکیای کریاوە. ئێمە پەی ئامانجێوە کۊتیمۍ ڕا. ماوەو ٢٥ ساڵان بەڕێز ئۆجالان گۆشەگیریێوە تنش سەرەرە سەپیان و ٣ ساڵێن حیچ هەواڵێوەش مەزانیۊ. پێسە بەشدارا ڕاپیماو ئازاڎیی راسی ئێمە جە دووۍ قۆڵێوە پۍ ئازاڎیی وڵاتیما، گەلەکەیما و بەڕێز ئۆجالانی دەسما بە ڕاپیمای کەرد".

عومەر ئۆجالان ئەرەیاۋناش، کە ڕاپیمایشا جە ئارۆ بە دماوە گەورەتەر بۆ و واتش، "گەلەکەما ماچۆ کە بە حۊڵدای و جمایۊیۍ یۊگێرتانەی متاودۍ گۆشەگیری ماڕدۍ. مزانۆ کە هەروەختۍ بەڕێز ئۆجالان قسۍ کەرۆ ئاشتی چی وڵاتەنە چەسپیۆ".

بەشدارا ڕاپیماکەی دماو کۆنفڕانسە رۆنامەوانیەکەی بەرەو ئامارا کۊتۍ ڕا.