چالاکییەکاو ئێشکگێریی دادپەروەریینە پیلانگێڵنیی میاننەتەوەیی ١٥ شوباتی شەرمەزار کریا
ئێشکگێری دادپەروەری کە پەی ئازادیی جەستەیی ڕابەروو گەلوو کوردی عەبدوڵا ئۊجالانی بەرڎەواما، چالاکۍ پیلانگێڵنیی میاننەتەوەیی ١٥ شوباتی شەرمەزار کریا.
چالاکییەکاو ئێشکگێریی دادپەروەری قەوماو زیندانییا پەی ئازادیی جەستەیی ڕابەروو گەلوو کوردی عەبدوڵا ئۊجالانی و چارەسەری سیاسیی پەرسەو کوردی شارەکاو ئەدەنەی و وانی و ئامەدی و ئێلحی و ئەزمیرینە بەرڎەواما. چالاکییەکانە، واوەی چالاکۍ داواکارییەکێشا وستێوە ڕووە.
چالاکییەکانە پانکارتوو "گۊشەگیری تاوانی ئینسانیین" و درووشمەکاو "بۍ سەرۊکی ژیوای مەبۊ" و "بژیوۊ مدرامانوو زیندانی" و "زیندانیۍ سیاسیۍ شکۊو ئێمەنێ" بەرزۍ کریێوە.
چالاکییەکەو ئەزمیرینە، یوە جە پەشتیواناو ئێشکگێریی دادپەروەری مەلیکە ئاکانە واتش، کە ئازادی جەستەیی ڕابەروو گەلوو کوردی عەبدوڵا ئۊجالانیشا گەرەکا.
ئاکانە واتش: "پەنەوازا بەڕێز عەبدوڵا ئۊجالان چەمش بە پارێزنەراش و بنەیانەکەیش گنۊ، ئێمە ئاشتی و ئازادیما گەرەکا. گەرەکما نییا ئەدایاو کوردی و تورکی گیریا. با زیندانییە نەوەشەکۍ ئازادۍ کریا و گەرەکما نیا جەنازەکۍ زیندانۊ بەیاوە. با گۊشەگیری سەروو عەبدوڵا ئۊجالانی و زیندانییا لا بریۊ".
ئاکانە داواش کەرڎە پەی پەشتگیریی جە ئێشكگێریی دادپەروەری و واتش: "سەوای ١٥ شوباتین و ڕوۍ سیاوا. ئێمە پیلانگێڵنیی میاننەتەوەیی ١٥ شوباتی شەرمەزار کەرمێ. ئەگەر پارێزنەر و بنەیانەکۍ نەلا سەرۍ بەڕێز عەبدوڵا ئۊجالانی بدا، مانگێرتەی جە وارڎەی بەرڎەوام بۊ. گەرەکمانە چەمپەنەکەوتەی چەنی بەڕێز ئۊجالانی کریۊ".
