داڤید مینۆڤەس پۍ میدیا خەبەری قسێش کەردۍ و باسش جە گۆشەگیری سەروو ڕابەروو گەلوو کوردی عەبدوڵا ئۆجالانی کەرد و پۍ ئاشتی و دیموکراتیکی و ئازاڎیی عەبدوڵا ئۆجالانش بە گرنگ و بە بنەما هۊرگێرت.

حەرپاسە مینۆڤەس ئاماژەش پانەی کەرد عەبدوڵا ئۆجالان نەک تەنیا پۍ گەلاو هەرێمەکەی بەڵکم پۍ مێڎانی میان نەتەوەیچ پێسە ڕابەرێوە گەردوونی وینیۆ. حەرپاسە ئاماژەش پانەی دا دەوڵەتوو تورکی و هێزەکا ۋەرنیشتی ماوەو ٢٥ ساڵان مافەکاو عەبدوڵا ئۆجالانی پاشێل کەرا.

مینۆڤەس واتش: "ئاستەنگکەردەی و ڕاگیرتەی جە چەمپنەکۊتەی بنەیانە و پارێزنەراش چنی عەبدوڵا ئۆجالانی پاشێلکەردەی مافەکاو مرۆڤیا."

مینۆڤەس ئاماژەش پانەی کەرد ڕامان و فکروو عەبدوڵا ئۆجالانی متاوۆ چاند و گلێرگەی جیاوازی چێروو چەترەو دیموکراسینە کوۍ کەرۊوە و واتش: "کۆنفیدراڵیزموو دیموکراتیکی ئا سیستمەنە مەجال مڎۆ بە مرۆڤایەتی بە جەوهەروو ۋێشۆ بە شێوێوە یەکسان بژیۋۆ. پێسە ئانەی کوردەکۍ جە سەرنیشتوو ۋەرکەوتوو سوریاینە بەدەسشا ئاوردەن. متاوا ئانەی بوینا چا هەرێمانە ئەزموونوو کۆنفیدراڵیزمی دیموکراتیکی بە بێ کەم و کوڵی ملۆڕاوە و خەبات کەرۆ. ڕامانەکۍ ئۆجالانیشا پۍ ژیۋایۍ هامبەشی ئاشتیانەی و یەکسانی و ئازاڎیی بەکارئاردەن."