هامسەرۆکۆو گرڎینەو دەم پارتی تولای حاتەم ئۆغلاریە دماو چەمپنەکۆتەیش چنی پارتو ئایندەی قسێش کەردۍ و ئاماژەش پانەی دا کە پەنەوازا هەنگامەی دیموکراتیکیە بنریۆ. واتیچش: "بەیدۍ پێوەرە پەی ئاشتیێوە بە شکۆی ۋەرپرسیاری هرگێرمۍ."
هامسەرۆکاو گرڎی پارتو یەکسانی و دیموکراسی گەلا (دەم پارتی) تولای حاتەم ئۆغلاریە و تونجەر باقرخان چنی سەرۆکی گرڎینو پارتو ئایندەو تورکیای، ئەحمەد داودئۆغلۆی چمپنەکۆتەیشا کەرد و جە ناوەندو گرڎی پارتو ئایندەینە ئەرەیاۋنێوە هامبەششا دا.
جە سەرەتاو ئەرەیاۋناکەینە داود ئۆغلۆ قسێش کەردۍ و جەختش کەردۆ چانەی کە گفتوگۆو بەینو پارتەکا گرنگا و ئینەش وات: "بەتایبەت چی ڕووانە چەمپنەکۆتەی بەینو لایەنەکا گرنگا."
دماتەر حاتەم ئۆغلاریە قسێش کەردۍ و هەڵوێسش دژو سەپنای قەیومی نیشانەدا و باسش چانەیە کەرڎ کە سیستەمو قەیومی جە گرڎو تورکیاینە وەڵا بیەنۆ، ئی داوێشە جە پارتە سیاسیەکا کەرد: "بەیدۍ پێوەرە ئەرەکۆشمۍ و سیاسەتو قەیومی و سەپنای قەیومی جە ڕێخەنە بەرکێشمۍ. هیچ وەختۍ پەشیمانۍ نەبیمێوە جە ئەرەکۆشایما."
جە بەردەوامینە حاتەم ئۆغلاریە ئاماژەش پانەی دا پېسە دەم پارتی گرڎ کاتێ ئاماڎێنۍ پەی مەیسەرکەردەی ئاشتیێوە بە شکۆی جە وڵاتەنە و واتش: "ئی وڵاتە پەنەوازیش بە ئاشتی هەن. داوا جە گرڎو لایەنەکا مکەرمۍ بەیدۍ پێوەرە سەرو زەمینێوە دیموکراتیکی ئاشتی بنیاڎ بنیەیمۍ."
دماتەر داود ئۆغلۆ قسێش کەردێوە و جەختش جە گرنگی پەیوەندی و گفتوگۆو بەینو لایەنە سیاسییەکا کەردۆ و ئاماژەش پانەی دا گەشوینا بە قسەکاو باخچەلی و ئینەش وات: "پەی بناغەو گفتوگۆی چێوۍ عالا. پەشگیری جە قسەکاو باخچەلی مکەرو. چونکی جە ۋەرکۆتوو مېیامینینە شەپۆلێوە تازۍ کۆلۆنیالی ئینا ئارانە. جە قۆناغێوە پی جۆرەنە دەنگۍ عاقڵی و واقعی پەنەوازا. پۊکەی قسەکۍ باخچەلی ئەرێنیێنۍ. پېسە پارتو ئایندەی ئاماڎێنمۍ پەی چارەسەرکەردەی پرسو کوردی بەڕێوە دیموکراتیکیە. ئەزموونەکاما هامبەش بکەرمۍ."
