هامسەرۆکاو گرڎیی پارتوو یەکسانی و دیموکراسی گەلا (دەم پارتی) تولای هاتیمۆگیولاریە و تونجەر باقرخان بە ئەرەیاۋنېوە مبارەکبایشا جە ئیراڎەو کەرکوکیەکا کەرڎ، کە دماو ١٨ ساڵا جە هۊرچنیەو ئەنجومەنوو پارێزگاکانە نیشانەشادا.

ئەرەیاۋناکەو هامسەرۆکاو گرڎیی دەم پارتی پی جۆرەنە:

"هیواڎارېنمۍ هۊرچنیەی جە کەرکوکەنە، کە پۍ ۋەرکەوتوو دلېڕاسەی گرنگیېوە فرەش هەن، بۊ بە مایۍ دموکراسی، دادپەروەری و ئازاڎیی پۍ گەلاو مەنتیقەکەی. جە هۊرچنیەو ئەنجومەنوو پارێزگاکاو عێراقینە گرڎ لېوە چەمشا سەروو هۊرچنیەکاو کەرکوکی بۍ کە دوور جە گرڎ گرژی و پشېویۍ لوواڕاوە و جە سەروو پارتە سەرکەوتەکاوە وەڵۍ کۊت ئیراڎەو گەلاو کەرکوکین.

جە کەرکوکەنە بە تایبەتی دەوڵەتاو هەرێمی و فرەو هێزا تەری پۍ ئانەی ناسەقامگیری سیاسی ساز کەرا، بە گرڎ جۆرێوە دەسوەردایشا کەرڎ. بەڵام سەرەڕاو ئا دەسوەردایچە گەلاو کەرکوکی پا هۊرچنیەیە کە جە ٢٠٠٥ۆن پۍ یوۋەمجارین چا پارێزگانە ملۊڕاوە، ئیراڎەی دیموکراتیکی ۋېشا نیشانەدا و لووۍ سەروو سنووقەکاو دەنگدای. ئێمە مبارەک بایی جە گەلوو کوردی و گرڎوو گەلاو کەرکوکی و گرڎوو ئایینەکا کەرمۍ، کە بەشداریشا چا هۊرچنیەینە کەرڎوو سڵام جە ئیراڎەو و قوناعەتیشا کەرمۍ.

ئەقڵیەتوو نەتەوە-دەوڵەتی کە گەرەکشا جە ۋەرکەوتوو دلېڕاسەینە گلېرگەکا بە ستراتیجوو "پەرت کەرە و زاڵبە" حەرپاسە گەلا بە پاو ئشناسنامە و ئایینەکاشا جە یۆی بڕۊرە و پی جۆرە حۊڵ مڎۆ کە جە هەرێمەکەنە نا ئارامی ساز کەرۆ. جە دژوو ئا ئەقڵیەتەیە ئیراڎەو گەلاو کەرکوکی جە جوگرافیاو ۋەرکەوتوو دلېڕاسەینە بیەن بە هیوا و بڕوا. ئاواتەوازېنمۍ کە دماو ئی هۊرچنیەیە جە کەرکوک هوشیاری نەتەوەی دیموکراتیکی کە گرڎوو گەلا و ئایینەکا جە ۋېش گېرۆ بەقوەتتەر بۆ و  گرڎوو مەنتیقەکەیرە وەڵا کریۊوە.

مبارەکبایی جە گرڎوو پارتە سەرکۊتەکا بە تایبەتی یۊبیەی نیشتمانیی کوردسانی (یەنەکە)ی کەرمۍ کە هۊرچنیېوە شەفاف و دیموکراتیکشا ئەنجامدا. ئێمە مزانمۍ پېسە بە درێژایی تاریخی ڕووەشدان ئارۊیچمانە ئیراڎەو گەلوو کوردی پېوەرە ژیۋای گەلا بە بنەما گېرۆ. هیواڎارېنمۍ ئیدارەی تازە پەی ئانەی گەلاو کەرکوکی جە مېڎانۍ دیموکراتیکەنە بە ئشناسنامە و ئایینی ۋېشاوە بە شێوېوە ئازاڎ بژیوا، بە حەزەرۆ جماوە".