سەڤیلای چەلەنکە و خالیدە تورکئۊغلۊوە، کاندیدەکاو ئامەدوو پارتوو چەپی سەوزی پەی ئاژانسەکەما جە بارەو ورچنیەیۊ قسێشا کەرڎۍ.

چەلەنکە واتش، کە کاروبارشا بە جۊشوخرۊش و بە جوانی و ڕەنگاوڕەنگی ملۊ ڕاوە و واتش، " تا شەوۍ ئۊفیسەکاو ورچنیەی کریێوەنۍ. جۊشوخرۊشێوە فرە هەن. ڕێکوزیایەکاو شاری هەرمانە کەرا، کوۍ باوە زۊر ئۊفیسۍ فرێما کەرڎێنێوە ، پەشتگیریی گەلی فرەن. گرڎ کەس بەشداری کەرۊ. قسێوە هەنە و گرڎ کەس ماچۊش ، " ورچنیەیۍ هەستیارا، ورچنیەیۍ قەدەرانەن، پەی کورڎی پێسنەن. مافەکاو گەلوو کورڎی دەسشا ملەرە گیریان، پەوکای ناڕەزایەتی بە دیموکراسی و بە دەنگدای بەر گنۊ. ئێمە چی ورچنیەینە سەرۍ گنمۍ و ژیوای سەرجەنۊ مەرزنمێراوە."

تورکئۊغلۊوە: ماوێوە کەم مەنەن پەی فاڕیای

خالیدە تورکئۊغلۊوە ئەرەیاوناش، یارای، هومێد و داواکاریی گەلی فرەن واتش، " بەشداریی جە کەرڎەیۊ ئۊفیسەکانە بیمۍ. کەرڎەیۊ ئۊفیسەکا بە ورپڕای، هەلهەلەدایوەنە و جۊشوخرۊش بۊ. هومێدوو دوکاندارەکا فرەن، ماچوو " چەقووە یاوێنە سەروو پێشەی". گەرەکشانە ڕژێمی تاکەکەسی دمایی پەنە بارا. پەوکای وێما خاس ڕێک وستەنۊ.

گەنجۍ ژیوایۍ خاستەر و تازەشا گەرەکا. مۊڕاڵوو ژەنا بەرزا، بە هەلهەلەدایوەنەی خێرامایما کەرا، هومێدشا هەن، گەرەکشانە وەڵات دیموکرات بۊ، یەکسانی بۊ. ئێمە و فرەو کەسی بە باوەڕی جیاواز کوۍ بیێنمۍ. چەنی ژەنا، گەنجا، رەنجدەرا، دەگانشینا، دوکاندارەکا کوۍ بیێنمۍ. گەرەکشانە ئێمە پێسە پارتوو چەپی سەوزی دەنگێوە فرۍ بەدەس بارمۍ، پەوکای چێشما پەنە کری کەرمێش. ئیمۊڕاڵە بەقوتتەر بۊ، وەروو ئانەی ماوێوە فرەکەم پەی فاڕیای مەنەن. پەی ژەنا، گەنجا، کورڎی، عەلەوی و گرڎوو ئایین و کولتوورە جیاوازەکا با بە داراو ژیواێوە خاستەری، سەرۍ گنمۍ."

س.ز