جەمال دەمیر ئەنڎامو جەمەو پارێزنەرا وانی ئەرەیاۋناش، دەسەڵاڎدارا جە بوراو ئەمنیەتو ھورچنیەکانە گۊششا جە پېشنیارەکا ڕێکوزیاو ئاسایشو ئۊروپای نەگېرت و ۋاتش، "ئێمە بە شێۋېوە یاسایی دژوو گرڎ ئاژېوە نەرێنیی چەمەڕاکریای دەسوەردای کەرمۍ."
پارێزنەر جەمال دەمیر ئەنڎامو جەمەو پارێزنەرا وانی جە بارەو پەرسو ئەمنیەتو ھورچنیەکا ١٤ و ئایاری پۍ ئاژانسو هەواڵی فورات (ANF)ی قسېش کەرڎۍ.
دەمیر ئەرەیاۋناش، گلېرگەکە سەبارەڎ بە ئەمنیەتو ھورچنیەکا فرە هەستیاراو ۋاتش، "پېسە مزانیۊ، ڕێکوزیاو هامکاری و ئاسایشو ئۊروپا (OSCE)ی پێشنیارەکاش سەبارەڎ بە ئەمنیەتو ھورچنیەکا پۍ گرڎو ۋڵاتا ئەنڎامی کەرۊ بە گوزارشتە(ڕاپۆرت) و پێشکەششا کەرۊ. ساڵەو ٢٠١٨ ی پێشنیارەکۍ ۋېش ۋەڵاکەرڎۍ. ئانۍ پۍ ھورچنیەکا ١٤ و ئایاریچ گونجیا. ئا ستانداردۍ کە پێۋیسا جە ھورچنیەکانە ھەرمانەشا پنە کریۊ و ئا مژارۍ، کە با بە مەڵامەتو پەکوستەو پرۊسەو ھورچنیەکا مشۊ ڕاگریشا ۋنە کریۊ وزیېنۍ ڕوۋە. بەداخۊ ڕانماییەکۍ پۍ پرۊسەو ھورچنیەی ڕا بە چەمڎاریکەرڎەو هاموڵاتیا و یاسا میان نەتەوەییەکا مەڎا. ئینە جە گرڎو ھورچنیەکانە ئەنجام دریۊ."
ناڕەحەتیما هەن، بەڵام حۊلېوە فرە مڎەیمۍ
دەمیر ئەرەیاۋناش، جە ٢٠ ساڵی ۋیەرڎەنە وەردەوام جە تورکیا باس جە ئەمنیەتو ھورچنیەکا کریان و ۋاتش، "دلۍ گلېرگەی مەڎەنی، میدیا، لایەنە سیاسییەکانە سەبارەڎ بە ئەمنیەتو ھورچنیەکا ١٤ و ئایاری ناڕەحەتی هەن. حکومەت پا ڕا و جایا قسۍ و ڕانماییە ئەمنییەکا ئەمنیەتو ھورچنیەکا وزۊنە چېرو تەرسۍ. ئەوامیرەکۍ وەزارەتو دلېنەی پۍ پۊلیسی و سەروازا، کە پەیوەنڎییشا بە ھورچنیەکاوە هەن، قەبوڵ مەکریا. کۊمسیۊنو ھورچنیەکا و سەرۊکو سنوقەکا دەنگدای جە پارېزنا و ئەمنیەتو سنوقەکا دەنگدای وەرپەرسېنۍ. ئەگەر کەموکوڕیۍ ئاسایشی بۊ، ئانە سەرۊکو سنوقەکا دەنگدای متاۋا جەندرمە و پۆلیسی ئاگاڎار کەراوە، بەڵام رانمایی و ئەرەیاۋنېکۍ وەزیرو دلېینەی یاگۍ ناڕەحەتین. پۍ ئانەی خەڵک جە ڕۊو ھورچنیەکانە تاۋا بە ئیسراحەت و یەکسانی دەنگەکاشا بەکاربارا، ئێمەی پارێزنەرۍ و مافناسۍ بیمۍ بە چەمڎار. ئەگەر ئاژېوە جە دژوو یاسا و ڕانماییەکا کۊمسیۊنو ھورچنیەکا ڕوۋە دۊ ئێمە بە شێۋېوە یاسایی دەسوەردای کەرمۍ. ئێمە گرڎ چېۋۍ کەرمۍ پۍ دڵنیابیەی چانەی، کە ھورچنیەکۍ بە یەکسانی و بە ئازاڎیی ئەنجام دریا."
ھ . ش
