ناڕەزایەتی جە دژو دەسسەرەرەگێرتەی شارەوانی دێرسیمی بەردەواما. ئەرەنیشتێ شارەکەی واتشا، دێرسیم حەجگیز سەرەش نەنامنانەرە، حەجگیزیچ سەرە مەنامنۆرە.

ئەرەنیشتی شارەکەی ناڕەزایەتیشا وەرا وەر بە نیایرەو قەیومی بەربڕی. هەبوون ئاسلان پەی ئاژانسو هەواڵو فوراتی (ANF)ی قسێش کەرڎۍ و ئانەش وست ڕووە کە رژێمو قەیومی و دەس سەرەرەگێرتەی ئیرادەیشا قبوڵ نمەکەرا و واتش، "خەڵکو دێرسیمی حەجگیز سەرەش نەنامنانەرە. جە دژو سیاسەتو قەیومیچ سەرە مەنامنۆرە. تا یاوای بە ئەنجام ئێمە جە میڏانەکەنە بیمێ. ئێمە پوشتەو ئیراڎەو وێما وەرنمەرڎەیمێ. خەڵکو دێرسیمی ئینا سەرو پەیاوە".

نمەتاوا دەس سەرو ئیرادەیمارە بگێرا

عیسمەت یەڵدرم ئانەش دەسنیشان کەرد، کە ئا کەسا قبوڵ نمەکەرا کە دەسشا سەرو ئیرادەو گەلیرە گێرتەن و جەختش کەردۆ، "نمەبۆ دەس سەرو ئیرادەو گەلیرە بگیریۆ، ئێمە شارەوانییەکۍ وێما گەرەکێنێ".

نە دیموکراسییا و نە یاسایی

 زەینەب دەمیرە باسش چانەیە کەرد زانێنه کە قەیوم پەی دێرسیمی منیارە و واتش، "دەسەڵاتدارو ئاکەپە-مەهەپەی چنین ساڵێن جە دێرسیمەنە نە کورسی پەرلەمانی و نە شارەوانیش بەدەس ناردەن. ئا دۆخە پەی دەسەڵاتداراو ئاکەپەی دۆڕیای و شکسێ گەورەن. بە فشارو و ستەم هەوڵ مڎا ئیرادەو ئێمە بە نەبییەی بنیارە. دەستوری هەمیشەیی بە حیچ جۆرێ  هەرمانەش پنە نمەکریۆ. جە تورکیانە ئیتر چێوێ بە نامێ دیموکراسی و ئازادی بیەیش نییا. جە تورکیانە مشۆم ئیتر گرد مجیارە مێڎانەکا".

دێرسیم حەجگیز سەرەش نەنامنانەرە

 نازلی چەلیکۆزە ئەرەیاوناش، کە خەڵکو دێرسیمی جە دژو قەیومەکا ئیرادە و مڏرامانشا نیشانەدان و واتش، "نەوەکۍ سەید رەزای و رێوگارا نەریتو ٣٨ەکا یاساو قەیومی قبوڵ نمەکەرا. دێرسیم حەجگیز سەرەش شۆڕ نەکەردەن. گرد خاس ئانەیە مزانا. 'گەشت پەی دێرسیمی بۆنە، بەڵام سەرکەوتەی نمەبۆ'. ئێمە پا بنەمایێوە جمێوە. پێسەو رۆڵەکا دێرسیمی درێژە بە ئەرەکۆشای و مڏرامانیما مڎەیمی".

ئۆزگور کاراچ کودەتاو سەرو ئیرادەو گەلیش شەرمەزار کەرد و واتش، "فرە ئێش بەخشا کە هەوڵ مڎا بە قامچی یاسای بڕۍ چێوۍ فاڕانە. داخەم نمەشۆ ئا قسۍ جەبارەو ئاشتییۆ جە دەمو دەسەڵاتداراوە مەیانە جبەر راسێ نییەنێ".