بەپاو زانیاری بەدەستوزیای، بڕیارەن بە ئی زووانە کتێبو "مبارزات محمودخان دزلی" ”مدرامان و کۆشای مەحمود خانو دزڵیێ“ کە جە نویستەی "کەیوان بەهرامی"ن، چاپ و وەڵا کریۆوە.
جە کتێبەکە کە بە زوانی فرارسی نویسان، نویسەر بەوردی باس جە ژیوای و مدرامان و کۆشای سەرکەردە و کەسایەتیی نامیی هەورامانی کوردستانی مەحمود خانو دزڵیێ مەکەرۆنە و لایەنە ئەوەشاریاکێ نامبریای ئاشکرێ مەکەرۆنە.

جە لایێ تەرەوە کتێبو "هۆرزانە"ی بەزوویی ڕەوانەو بازاروو کتێبی ببۆنە کە کتێبێوی ئەدەبی-ڕەخنەیی و تێئۆریکین سەرووشێعرەو ئارۆ هەورامانی.
 
هۆرزانە، زەنجیرە باسێ تێئۆریکی_ ڕەخنەیێ شێعرێ سەردەمیانێ هەورامیێ جە وێش مەگێرۆنە و نویسەرەکەش عادڵ موحەممەدپوور-ەن.
ئی کتێبە سێنزەهەمین بەرهەم و دماو تەرحێ و چەکەریای و چراوکەی چوارۆمین کتێبوو ڕەخنە و شیکاری نویسەرین کە حەوزەو شێعرەی هەورامیێنە منویسیۆ و پێشکەش بە کتێبخانەو هەورامانی مەکریۆنە.. دەراوێ سەرەکیێش شێعرەی ئازادٚە و غەزەڵەی ئارۆیانێنە. ئی کتێبە جە پەخشکاری"ئەوین"ی جە مەریوانەنە، چاپ و وەڵا کریۆوە.پەنج کاوێ(فصل)ێ و ۲۱ بەشێ جیاوازێ جەوێش بگێرۆنە و ٢٢٣ لاپەلێن. 
جە میانشەنە سەروو فەلسەفەو دەقە شێوازخێزنەکا، فۆرمی هونەری، تەجرۆبێ تازێ، هونەرسازێ دەقی، شیکاریی بۆتیقایی نموونێ هەر دوێ جۆرەکا: ئازادٚە و غەزەڵە باسێ فەننیێ کریاینێ و ڕادەی زوانیی، ویریی و ئەدەبیشان دیاری کریان.
کێبەکە جەلاو سندۆقو پاڵپەشتی نویسەراو هەورامانی (واران)ی جە شارو پاوەی چاپ بکریۆنە.