تەڤگەروو ئازاڎیی جە ٢٥ساڵەو پیلانگێڵنیی ١٥ و شوباتینە بەبەشداری ژمارێوە کەسایەتیا سیاسی و مەدەنی چالاکی مانگرتەیشا جە واردەی ئەنجامدا و ئەرەیاۋنێوەش وەڵاکەردۆ.

ئەبوبەکر مەجید ئەنڎاموو کۆمیتەو ئازاڎیی عەبدوڵا ئۆجالانی بەنامۍ ئەنڎاما دەسەو تەڤگەروو ئازاڎیی و بەشدارا چالاکییەکەی جە ئەرەیاۋنێوەنە واتش:"ئارۆ ٢٥ساڵۍ سەروو گێرتەی و بڕفانای ڕابەروو گەلوو کوردی و گەلا جەهانی عەبدوڵا ئۆجالانیرە ویەرۆ، ئارۆ ئێمە پێسە جەمێوە کەسایەتیا جیاوازی جە شاروو سلێمانی دەسما بە چالاکی مانگرتەی جە واردەی کەردەن، پێسە هەڵوێسێوە شۆڕشگێڵنی ناڕەزایی و شەرمەسارکەردەی دژ پا پیلانگێڵنیەی دژ بە ئازاڎیوازا و گەلا جەهانی کریا".

ئا ئەنڎامەو کۆمیتەو ئازاڎیی عەبدووڵا ئۆجالانی، ئاماژەش پانەی کەرد کە سەرباروو فشار و ڕاگیریەکا چالاکیەکەشا ئەنجامدان و  ئەرەیاۋنایچش: کەسایەتی عەبدوڵا ئۆجالانی نوێنەروو گرڎ کەسێوە ئازاڎیوازی و دیموکراتیکی بۍ، حۊڵوو ئاڎی پۍ ڕزگارکەردەی گرڎوو گەلا ستەم ونە کریای بۍ، پۊکەی جە دماو گێرتەیشۆ گرڎ ساڵێوە ئێمە چالاکی مانگرتەی جە واردەی چی ڕووەنە ئەنجام مڎەیمۍ، چونکی ئی ڕووەیە بە ڕووێوە سیاو مزانمۍ پۍ گەلوو کوردی و گەلا تەری، ئەنجامدای ئی چالاکییە سەرەراو گرڎوو ئا فشارا بۍ کە سەرماوە بێنۍ، حەرچی گەرەکمابۍ جە یاگێوە گرڎی و بە ئاماڎەبیەی چنڎەها کەسۍاکە گەرەکشابۍ بەشدارۍ با چالاکییەکەی کەرمۍ، بەڵام داخەم مەشۆ ڕاما پنە نەڎریا. حەرپۊکەی چالاکییەکەما جە بیناو دەسەو تەڤگەروو ئازاڎینە کەرد".

ئەبوبەکر مەجید جە درێژەنە ئەرەیاۋناش: چێگۆ بانگەواز جە گرڎوو ئازاڎیوازا و کەسا دیموکراتیکی کەرمۍ کە تەنیا ڕا پۍ ڕزگاری و چارەسەری قۊرتەکا گەلوو کوردی و گەلا چەوەسیای و یۊگێرتەی و بەردەوامی خەباتی مەدەنییا، ئێمە بە خەبات و مدرامان دژوو گرڎوو ئا پیلانگێڵیا مردمێوە کە ۋەران ۋەروو گەلوو کوردی کریۆ و بێگومانێنمۍ کە ئی پارتە ئازاڎیوازە متاوۆ بیاوۆ بە ئامانجوو ۋێش و دمایی بە زووڵمی و ستەمی بارۆ."

جە دمادمایی ئەرەیاۋناکەینە گرڎوو بەشدارا مانگرتەکەی بە یەک دەنگ دروشمەکۍ 'بژیۋۆ ڕابەر ئاپۆ' و 'بێ سەرۆکی ژیۋای مەبۆ'یشا واتێوە.