ئارۊ ڕۊو دووەشەممەی ١٩و حوزەیرانوو ٢٠٢٣، هەریۊ جە دیلان غەفوورێ پەرلەمانتارەو فراکسیۊنوو یەکێتی جە بازنەو کەرکووکینەو و یوسف محەممەد، پەرلەمانتاری وەڵینوو عێراقی و سەرۊکی وەڵینوو پەرلەمانوو هەرێموو کوردسانی، سکاڵێوەشا داڎگای فیدراڵیی عێراقینە تۊمارە کەرڎە. دیلان غەفوورە جە گێرتێوە ڤیدیۊیینە کە جە ماڵپەری ڕسمیی وێشنە وەڵاش کەرڎەبێوە ئەرەیاوناش کە "حەوت مانگێن مەشغووڵێ ئامادەکەرڎەی سەرقاڵی دۊسییەکەینێ پەی ئانەی بە بەڵگە سکاڵێوە 'قەوەتە' ئامادە کەرمێ، تا قەرارەکاو ئەنجوومەنوو باڵاو شۊڕشی ورڕووشکیاوەی و لوجنەو مەنتێقەو سەرنیشتوو سەرڎەموو ڕژێمی وەڵینوو بەعسی سەروو زەمینوزارەکاو کەرکووکی بە یەکجاری ورشنیۊوە".

ئا پەرلەمانتارێ ماچۊیچ: "داڎگای فیدڕاڵی سکاڵاکێش چەنە ورگێرتێنێ، جە ئایندەنە وەختوو ئەرەنیشتەی پەی قەراری سەروو دۊسییەکێ ئامادە کەرا. "

دیلان غەفوورە پەرلەمانتارەو شاروو کەرکووکی جە پەرلەمانوو عێراقینە، ئاشکراش کەرد: "جە سکاڵێکێنە زەرەروەنەکەوتا ئا قەراراو ڕژێمی وەڵێنیشا کەرڎێنێ بە نموونە و وەکالەتشا پەی کەرڎێنێوە تا داڎگاو فیدراڵیی عێراقی هاگاداروو لایەنی خراپوو قەرارەکا بۊ".

یاگێ واتەینە، ئارۊ هادی عامری سەرۊکوو لوجنەو جابەجاکەرڎەى ماددەو ١٤٠وو دەسووری، بە پاو نویسیاێوە کە ئاڕاستەو وەزارەتوو کشتوکاڵوو عێراقییش کەرڎەن، دلێسنە ئەرەیاونانش، کە تەماموو قەرارەکاو لوجنەو (هەرمانوکاروو سەرنیشتی) ورشنیانۊ و پانەیچە ئا زەمینێ لاو عەرەبە ئامایەکاوە ئەرەگیرێ کریێبێنێ، گێڵیاوە پەی کورڎەکا.   

بە پاو نویسیاکەی چێولای مشۊم، هەرمانە بە قەراروو ٢٩و ساڵەو ٢٠١٢ کریۊ، کە بە پاو قەرارەکەی تەماوو ئا قەرارا، کە سەرڎەموو حیزبوو بەعسینە دریێنێ، ورێشنیاوە کە تایبەتێنێ بە بەعەرەبکەرڎەی کەرکووکی و مەنتێقە کوردسانییەکاو بەروو هەرێموو کوردسانی، جە ڕاو سانایۊ زەمینی جە کوردی و بەخشایش بە عەرەبە ئامایا، جە ڕاو قەرارەکاو لوجنەو(هەرمانوکاروو سەرنیشتی)یوە.  

س.ز