فەدا جە ۋەرا ۋەروو دەس سەرەرە گېرتەی شارەوانی جولەمێرگینە کاروەدایش نیشانەدا و ئەرەیاۋناش کە ئەر گرڎ کەسۍ ناڕەزایی نیشانە نەڎۆ، ئانە دەسەڵات پاشەکشە مەکەرۊ. فەدا ماچۊ: "گرڎوو هېز و ڕېکوستەکا جە دژوو ئی کردەوە فاشیستیا کاروەدای نیشانە بڎا.
فیدراسیۆنی دیموکراتیکی عەلەوییەکا (فەدا) بەیاننامېوە نۋیسیاش وەڵاکەردۆ و ئەرەیاۋناش، هجوومەکۍ ڕژێموو فاشیستی ئاکەپە-مەهەپەی سەرەمڕە بەردەوامېنۍ. حکوومەت بە کردەوە دژە دیموکراسیەکا قەیوم پەی شارەوانییەکا گەلی دیاری مکەرۊ و ئەرەیاۋناش کە حکوومەت پی جۊرە بەردەواما جە سیاسەتوو کۊمکوژی دژوو عەلەوییەکا.
فەدا سەبارەت نیایرەو قەیومی پەی شارەوانی جولەمێرگی واتش: "بە پلەی یۊوەم گلېرگەی کوردی و عەلەویچ، بەشە کۊمەڵایەتییە چەوەسیاکا، هېزە شۆڕشگېڵن و دیموکراتیکەکا، پېسە شارو وانی، مشۊم ئیرادەو ۋێشا جە دژوو ئی کردەوە فاشیستییەو ئاکەپە- مەهەپەی نیشانە بڎا. هەمیشە جە تاریخەنە جە گرڎ شۊنېنە زاڵمەکۍ جە ۋەرا ۋەر بە کۊشېیاینە پاشەکشەشا کەردەن. ئېمە نیایرەو قەیومی قبوڵ مەکەرمۍ، داوا جە ۋەرپەرسا مکەرمۍ ڕېز جە ئیرادەو گەلی بگېرا."
