بڕیارە هەفتەی داهاتوو نێرگس محەمەدی براوەی خەڵاتی نۆبڵی ئاشتی بە تۆمەتی ئاشکراکردنی دەستدرێژی بۆ سەر ژنانی زیندانی دادگایی بکرێت، ٣٦ ژنە زیندانی سیاسیش داوەدەکەن دانیشتنەکەی دادگا بە شێوەی کراوە و ئاشکرا بێت.
دوای ئەوەی نێرگس محەمەدی کە لە زیندانی ئێڤینی تارانە ئاشکرای کرد کە ژنانی زیندانی رووبەڕووی دەستدرێژی و گێچەڵی سێکسی دەبنەوە و ئامادەیە لەوبارەوە شایەتی بدات، لە سەر سکاڵای ئیتلاعات لە دژی دۆسیەیەک کرایەوە و بریارە رۆژی شەممە ٨ی حوزەیران دادگایی بکرێت.
نێرگس محمەدی داوای کردبوو، دانیشتنەکە بە شێوەی کراوە و بە بەشداری راگەیاندنەکان و چالاکوانانی ژنان و هەروەها قوربانیانی دەستدرێژی و گێچەڵ بەڕێوەبچێت.
بەمەبەستی پشتیوانی لەو چالاکوانە، ٣٦ ژنی زیندانی سیاسی لەوانە وەریشە مورادی، سپێدەقولیان، هەستی ئەمیری، ویدا رەبانی، سەکینە پەروانە، ئانیشا ئەسەدوڵاهی، مەحبوبە رەزایی، مریەم یەحیەوی، گوڵروخ ئیرایی و ناهید تەقەوی لەنامەیەکدا داوایان کردوە، کە دانیشتنی تایبەت بە دادگاییکردنی نێرگس محەمەدی بەشێوەی کراوە و بە بەشداری شایەتحاڵان و قوربانیانی ئازار و دەستدرێژی سێکسی لە زیندانەکان و هەروەها راگەیاندنە سەربەخۆکان بەڕێوەبچێت.
نێرگس محەمەدی کە ماوەی زیاتر لە سێ ساڵە لە زیندانە، بە هۆی چەند دۆسیەیەکەوە سزای ١٢ ساڵ زیندان، ١٥٤ قامچی و بێبەشبوونی لە چەندین مافی سیاسی و کۆمەڵایەتی بەسەردا سەپێندراوە. ناوبراو ساڵی رابردوو خەڵاتی نۆبڵی ئاشتی پێبەخشرا.
هـ . ب
