لوانی قۆڵو جەنگاوەرا قەسەدەی جە سیراتەلەنە کە ئینا سەرنیشتوو بەنداوو تشرینینە و چاکە مڏرامان بەهێزتەرا. کاتو سەردانی کەردەی بەرە و مەڕەکا چەمم کەوت بە فەرماندێوە قەسەدەی، ئاڏش ڕێبەر عەفرین بێ.

ڕێبەر بە ئەسڵ وێس عەفرینییا و چنی ئانەی کە وەڵتەر زامڏار بییە بێ گێڵاوە بەرەو مڏرامانی. کاتێوە فرە ئینا بەرەو مڏارامانو تشرینینە. پێسەو فەرماندێوە بەشداری چنین جەنگ و ئۆپراسیۆنی بییەن.

پێوەرە جە بەرە قورسەکانە سەرو  مڏرامانی قسێما کەردێ. ئاکاتە کەسێتی ڕێبەر عەفرین بە تایبەت پەیوەندی بە هێزی چنی جەنگاوەرا و ڕێبازو سەرکردایەتی بەرکەوت. کاتێ وینام، دەرفەتو ئانەیم پەی ڕەخسیا جە نزیکۆ پشناسوش. چنی ئانەی یوەمجارا یۆما ئشناسان زوو جە یۆترینی یاوایمێنە. پی تایبەتمەندییاوە جە کاتێوە کەمەنە ئشناسیا و وەش ویسیا.

ڕێبەر عەفرین بە هێزو مۆڕاڵ بۆنە بە سەرچەمێوە گۆرە پەی جەنگاوەرا. پێسەو فەرماندارێوە گرڏ کاتێ چەمش جە دۆخو جەنگاوەرا بییەن، پەشتگیریشا مکەرۆ. هەمیشە هەوڵ دێ بە ڕووە وەشەکێش مۆڕاڵ بەخشێنە. بە تایبەتی جە کاتە فرە سەختەکا جەنگینە بە قسەکاش و مڏرامانو جەنگاوەرا بە هێزتە مکەرۆ.

'بڕواشا هەر بەشو چن گولـێوە بێ'

جە کاتو گفتوگۆ کەردەینە باسو بەسەرهاتو کاتو مڏرامانیش پی جۆرە پەی گێڵنایمێوە: "جە بەرەکەنە بێنمێ. بڕێ جە جەنگاوەرایش جە مەڕەکێنە بێنێ. هەڤاڵێ واتشا چەتێ کەوتێ هرووژم کەردەی. پەی ئانەی تاوۆنە یاگێ چەتەکا وینونە و یاونە یاگێ وێم فاڕونە. کاتێ چەتێم وینێ واتم؛ 'ئایا چن چەتێ پەی ئێمە ئامێنێ'. ژمارەو ئاڏشا دە ئنە و ئێمە زیاتەر بێ. لایەنی کەم ٤ تڕۆمبێلێ زرێپۆشێشا بێنێ. جە ئاسمانەنە دەنگو فرۆکەی چەمدێری و جەنگی ئێ. وەڵێ ئانەی نزیکێ بیمێ دەستمان بە هرووژمکەردەی کەرد. گولـلەکێ سەرەتایما بڕێ چاریشاش پێکا و کوشتەو و زامڏارێش ونە کەوتۆ. جەنگەە درێژەش نەکێشا، بەڵام ئینە سەرنج ڕاکێش بێ. ژمارەو ئاڏشا جە ئێمە فرەتەر بێ، هەم جە ئاسمان هەم جە زەمینەنە پڕچەک بێنێ و جۆرەها کەرەستێ جەنگیێ و هرووژمێشا بێنێ، بەڵام دماو ئانەی کە چن گولـێوەما تەقنه، کیشیێوە. کاتێ ئامێ بڕواشا بەوێشا بێ، بەڵام کاتێ ڕەمێ با جۆرە نەبێ. هەریۆشا لێوەرە بڕەما".