پایتەختوو عێراقییەنە، ژەنی عێراقیێ و ئێزدیێ بە بۆنەو فەرمانەو کۆکوشیی ساڵەو ٢٠١٤، یەرەمین کۆنفرانسوو وێشا مکەرا، کۆنفراسەکە بە وانایوەی پەیامەکا بە درووشموو "بە کۆشیای یۆگێرتانە، دژوو کۆکوشیی ژەنا، بە بە دەنگوو وێپارێزنای" بەردەوامییش هەن.

پەیاموو کوردە فەیلییا کۆنفرانسەکەنە نوێنەروو کوردە  فەیلییا نەوال وەهابێ واناوە.

وەهابە ئەرەیاوناش کە ئامادەبییەیشا کۆنفرانسەکەنە پەی پاڵپەشتیی گردوو ژەنە ئێزیدییان و واتش:  "ئێمە ئارۆ ئینایمێ چێگە پەی پەشتیوانیی وێما پەی گرەدوو ژەناو ئێزدی، کە ڕووبەڕوی کۆکوشی و تندوتیژی و چەوسنایوەی دڕندانەی بیێنێوە، نیشانە بدەیمێ. حەرپاسە پێویسا بیمێ بە دەنگێوی قەوەت هەوڵێ بدەیمێ ئا یاسا و سیاسەتا، کە تندوتیژی و جیاکاری درێژە پنە مدا، بفاڕمێ."

'بەیدێ پێوەرە بکۆشییەیمێ'

نەوال وەهابە میانەو وتارەکەیشەنە داواو کۆشیای هامبەشیش کەردە و واتش" قۆرتەکێ فرێنێ، بەڵام بە ئیرادەی هامبەشۆ متاومێ چێوەکا بفاڕمێ، پەنەوازا پیوەرە ژەن و پیا، رێکوستەیە حکومی و مەدەنییەکا پەی بنیاتنیای جیهانێوە، کە مافوو ژەناو ئێزدییش دلێنە پارێزیان و ئاسایشەنە بۆ کۆشیای بەرز بکەرمێوە. بەیدێ با پێوەرە، بیمێ بە دەنگێوی دژوو نادادپەروەری تا بەدەسئاوردەی ئامانجەکاما."

دمایی بە نامێ یەکینەکاو پارێزنای ژەناوە یەپەژە پەیامی ڤیدۆیی  سۆزدار دێریکێ ئەندامەو  فەرماندەیی گردینوو یەپەژەی وەڵا کریاوە.  

ئەندامەو  فەرماندەیی گردینوو یەپەژەی ئەوەڵ بە نامێ یەپەژەی و سەرجەموو هامرایاشۆ سڵامش ئاڕاسەو بەشداراو کۆنفرانسەکەی کەرد و واتش: "یەرەمین کۆنفرانسوو ژەناو عێراقی سەبارەت بە کۆکوشیی ژەناو ئێزدی ملۆ ڕاوە، ئێمە سالانێوە فرە ویەردەن کە پێسەو گەلی و ژەناو هەرێمەکەیما ڕووبەڕووێ فرە سەختی و  زەحمەتا بیێنمێوە.  ئا هجووم وکۆکوشیێ کە سیستموو دەسەڵاتداری و بەتایبەتی داعشی ماوەو ١٠ ساڵی ویەردەینە دژوو گردوو ژەنا کەردەنشا شەرمەزار و بەنەعلەت مکەرمێ. هەوڵێ مدەیمێ گەلاو هەرێمەکەی ژەنی و بەتایبەتی گەنجێ بواروو ڕێکوستەیوە قەوەت بکەرمێ، باوڕما چانەن ئەگەر ژەنی هامدەنگی و یۆگێرتەییشا فرە بۆ و پەرە بە ڕێکوستەیشا بدانە، بە دڵنیاییوە سەرێ مگنا ئەنجامەنە ئاشتیێوی، سەرەمڕ پەی گردوو دنیێ مێ وەرۆ."

هەرپاسە سۆزدار دێریکە داواو یەکڕیزی و یۆبییەی گردوو ژەناش کەردە و واتش: "ئانە کە زیاتەر مدرامان مکەرۆ و فرەتەرین خاوەنداریی وەنەو کولتوور و بییەی وێش مکەرۆ، بەڕاسی یەکڕیزیی ژەنان. ئێمە پێسەو یەپەژەی جە گرد وەختێو زیاتەر مدرامان مکەرمێ و ژەنا مپارێزنمێ. ماوەو دە ساڵی ویەردەینە ژەنێوە فرێ ژەناو ئێزدی یەکینەکاما دەسوو داعشیوە سانێوە و ڕزگارێشا کەردێ.

بانگەوازوو ئێمە پێسەو یەپەژەی پەی گردوو ژەنا ئانەنە، کە بەجددیی کۆشیای قەوەت دژوو گرد نۆعە هجوومێوی بەرز بکەرمێوە و بواچمێ بژیوۆ یۆبییەی ژەنا، دژوو حەرنۆعە ئەرەگیرکاریێوی، بژیوۆ مدرامانوو گەلا، بژیوۆ سەرک ئاپۆ، ژەنی، ژیوای، ئازادی."

یاگێ ئاماژەینە هەڵای کۆنفرانسەکە بە ئەوەوانای وتارەکا بەردەواما.