سەڵاحەدین دەمیرتاش جە هەژمارو ۋێشەنە جە دیجیتاڵ میدیانە باسش جە ئەنجامدای گلێرۆبیەکەی کەرد و سوپاسو سەرداکەی ئۆزگور ئۆزەلیش کەرڎ. جەختش کەردۆ جە گلێرۆبیەکەینە مژارە کۆمەڵایەتییەکۍ و قەیرانە ئابوورییەکۍ و ویستو دیموکراسی و دادپەروەری و چڼین مژارۍ تەرۍ تاوتوێ کریۍ. دەمیرتاش ئەرەیاۋناش جە گلېرۆبیەکەینە داواو دادپەروەری و ئاشتی و یۆبیەیۍ کۆمەڵایەتیی قەوەتی وزیان ڕووە.

دەمیرتاش ئەرەیاۋناش عەیامێوەن تورکیانە سیاسەت یاوان بە چەقبەستەی و دۆڵەت بە ڕەفتاری نادەستووری ڕاوەبەر مکریۆ، واتش: "ئەگەر گەرەکشانە ئا پرۆسە بۍ دی سەرۆککۆمار ڕەجەب تەیب ئەردۆگان پێسە "ئاسایبیەیۆ، نەرمبیەی" وەسفش مکەرۆ، تاکە چێو ئانەنە پەنەوازا جە مېڎانەکەنە ڕێز جە سەروەریی یاسای بگێرۆ. هەتا ئینە نۍ دی، کەناڵە سیاسییەکۍ نمەکریاوە و زەمینەو ئاسایبیەیۆ نمۍ دی".

دەمیرتاش تەئکیدش کەرڎۆ جە گلێرۆبیەکەینە چنی ئۆزەلی، جە پەرسو نادادپەروەری داهاتیوە تا پەرسو کوردی، جە مافی سرووشتییوە تا پەرسو ژەنۍ و زاوڵا و جوانا، گفتوگۆشا سەر کریان. هەرپاسە دەسنیشانش کەرڎ کە مشۆم ئا کەسۍ جە چوارچێوەو دۆزەکا کۆبانێ و گەزینە گیریێنۍ، ئازاڎۍ بکریا.

دەمیرتاش ئاماژەش پانەیچ کەرڎ دەس جە سیاسەتی دیموکراتیکی هۆرمەگێرا و ۋەرپرسیاری ۋێشا پەی ئاشتی کۆمەڵایەتی جابەجێ مکەرا. دەمیرتاش ئەرەیاۋناش نەواخنو گلێرۆبیەکەیشا جە ڕاو پارێزنەرەکاشۆ میاونۆ بە مېیانو گرڎیی دەم پارتی.