ماوەو چند ڕوێوەن هێزەکاو پارێزنای گەل(هەپەگە)ی مەنتێقەکاو زاپ، مەتینای و خواکورکینە، دەسشا بە ئۊپراسیۊنێوە شۊڕشگێڵنی کەرڎەن پەی پاککەرڎەیۊ ئا مەنتێقا جە ئەرەگیراو دەوڵەتوو تورکی، جە ئەنجامەنە سوپاو تورکی ئەرەگیری گورزێوە کەمەرماڕش وەکەوتەن و بە دەیان سەروازێش کوشیۍ و بریندارۍ بیێنۍ، شكستەکاو ئا دەوڵەتەیە بیێنۍ بە بابەتوو ڕۊو میدیا جیهانی و هەرێمییەکا.

 ئەرشەد ساڵحی ئەنداموو پەرلەمانوو عێراقی و سەرۊکی وەڵینوو بەرەی تورکومانی جە میدیای دیجیتاڵییشنە سەروو پەلیانەی ڕسمیی تویتەر(X)وو وێشۊ هامخەمییش پەی کوشیایا ئا هێزە ئەرەگیرەیە بەروست و واتش: "بە سوپاسۊ یادوو سەروازە قارەمانەکاما کەرمێوە"  ئی قسۍ ساڵحییە بیێنە بابەتوو ڕۊو هاموەڵاتە عێراقییا و ساڵحیشا بە "خاین" نامۍ نیان، چونکوم هامخەمییش پەی سوپێوە بەروستەن، کە بە شێوە خاکوو عێراقی و هەرێموو کوردستانیش ئەرەگیر کەرڎەن.

 ئەرشەد ساڵحی چێروو فشاروو خەڵکینە پۊستەکەش لا بەرد، وەلۍ هاموەڵاتۍ ڕەخنەکێشا سەرش بەرڎەوامێنۍ و  چەمەڕای کەرا ئا کەیسە بریۊ دادگای فیدراڵیی عێراقی و سنوورێوە پەی ساڵحی و پارتەکەیش بنریۊرە، کە بیێنۍ شۊنکەوتەو ئەرەگیرە تورکا و هەرمانە پەی ئا دەوڵەتەیە کەرا عێراقەنە.