هجوومەکاو دەوڵەتی ئەرەگیروو تورکی پەی سەروو شارەکاو سەرنیشتی و وەرکەوتوو  سوریای لاو گەلیوە شەرمەزارۍ کریێ.

ڕحا

هجوومە عاسمانییەکاو  دەوڵەتوو تورکیای پەی سەروو سەرنیشتی و وەرکەوتوو سوریای بەشێوە شارەکانە شەرمەزارۍ کریێ. شاروو ڕحاینە وەرڎەموو بیناو پارتوو یەکسانی و دیموکراسیی گەلا دەم پارتیینە ئەرەیاوناێوە ئەرەیاونیا و جەماوەرێوە فرە، جە نوێنەراو ڕێکوزیایەکاو گلێرگەی مەدەنی دلێشەنە بەشدارۍ بێنێ. پۊلیس دەسش وست دلۍ چالاکییەکە و واتش؛ "من دەوڵەتنا و ڕا مەدەو مافوو دیموکراتیکی وێتا چۍ بەکار بارڎێ."

هامسەرۊکوو دەم پارتی ڕحای، بەکر قەرەکەچیلی کارڎایوەش نیشانە دا و واتش:" جە حەر یاگێوە دنیێنە جەنگ بۊ دژش مردمێوە، وەرکەوتوو دلێڕاسەینە جارێوە تەر ونی مجیۊ. داوا وەنەو گردوو ئا دەسەڵاتا کەرمۍ، کە بییەیشا سەروو بنەماو ونمتەیۊ بنیات منیا، ئی سیاسەتا مردندێ. پەنەوازا گردوو کێشەکا بە دیالۊگ چارەسەرۍ کریا و دایوسانای دەس پەنە کەرۊ. هەرپاسە ئیمرالیینە ناوەندوو چارەسەروو پەرسەو کوردین. جە ساڵاو ٢٠١٣-٢٠١٥ کۊبییەیوە بییەن و حیچ ونێوە نەمجییێنە . پەنەوازا شاندە فەرمییەکۍ دەمودەس بلا ئیمرالی."

مێردین

هەرپاسە جمیەروو ژەنە ئازادا تەژەئا، دەم پارتی و پارتوو هەرێمە دیموکراتیکەکا (بەدەپە) مێردیننە قسێشا کەرڎێ. پۊلیس گەرەکش بییەن ڕاگێری کەرۊ. جەماوەر بە دروشموو "بژیوۊ مدرامانوو وەرنیشتی" جوابوو پۊلیسیشا داوە و گرژی بەینوو جەماوەری و پۊلیسینە وەش بی. جە ئەنجامنە بارەگاو دەم پارتیینە قسۍ کریێ. عایشە بۊزانە، قسەکەرەو تەژەئای بەیاننامێوەنە واتش:" دەوڵەتوو تورکی دماو شکسەکاش زاپ، مەتینا، ئاڤاشین و خواکورکنە هجوومش کەرد سەروو شارەکاو سەرنیشت و وەرکەوتوو سوریای.

بۊزانە ئاماژەش پانەیە کەرد، کە ئەرەمەرزیا خزمەتگوزارییەکۍ هجوومەکانە کریێنۍ ئامانج و هجوومەکانە خەڵکێوە فرە کوشیێنێ". پەی ئاشتی و دماییئامای جەنگی و ئاڵۊزییەکا پێویسا گۊشەگیری سەروو بەڕێز عەبدوڵا ئۊجالانی ورگیریۊ، چارەسەروو پەرسەو کوردی ئینا لاو بەڕێز عەبدوڵا ئۊجالانیوە. پێویسا گردوو گەلەکەیما دژوو هجوومەکا یۊی گێرا.  چارەسەرکەرڎەی پەرسەو کوردی هومێدوو گەلاو وەرکەوتوو دلێڕاسەیچا. پەی ئینەیچە پیویسا تورکیا واز جە گلێرگەی و کۊکوشی گەلوو کوردی بارۊ و ڕا پەی ئاشتیی کەرۊوە. هجوومەکۍ پەی سەروو وەرنیشتی کێشەکا قووڵتەرۍ کەراوە. پەنەوازا دەمودەس ئی هجوومۍ دماییشا پەنە بێ."

وان

واننە وەرڎەموو بارەگاو دەم پارتیینە بە سەرمەشقایەتیی تەژەئای ئەرەیاوناێوە ونیاوە، دلێشنە دروشموو "بژیوۊ مدرامانوو وەرنیشتی" و "وەرنیشت شکۊو ئێمەن"ۍ وچیێوە، جەماوەرێوە فرە بەشدارییشا کۊبییەیوەکەنە کەرد. پۊلیس دەسش وست هەرمانەکۍ و بەناچاری بەرڎەموو بارەگاو پارتەکەینە بەیاننامە ونیاوە.  

گۊنول ئوزونای، هامسەرۊکوو دەم پارتی واننە بەیاننامەکەنە قسێش کەرڎۍ و واتش:" گەلوو کوردی ساڵانێوەن پەی زوان و شناسنامەیش کۊشیۊ. حکومەتی تورکییچ هجووم کەرۊ سەروو دەسکەوتەکاش. دەوڵەتوو تورکیای هجوومی کۊکوشی دژوو وەورنیشتی کەرۊ. ئێمە پێسە دەم پارتی جارێوە تەر بە جەنگ کێشەکە چارەسەر مەبۊ، پێویسا هێزە میاندەوڵەتییەکۍ ئی هجوومابوینا و دماییشا پەنە بارا. ئێمەیچ کۊشیایما پەی ئاشتی دژوو جەنگی بەرڎەوام بۊ."

موش

ڕێکوستەی دەم پارتی شاروو موشینە دژوو هجوومەکاو دەوڵەتوو تورکی پەی سەروو سەرنیشت و وەرکەوتوو  سووریای ناڕەزایەتیشا بەر وست. جەماوەرێوە فرە وەرڎەموو بارەگاو پارتەکەینە بەشدارۍ بەیاننامەکەی بێنێ. چیچەک توتوش، ڕاوەبەرەو دەم پارتی بەیاننامێوەنە واتش:" حکومەتوو ئاکەپە-مەهەپەی ڕۊ دماو ڕۊی سیاسەتەکاو جەنگی  هەستەر کەراوە و ئی عەقڵیەتە کە پا گێرۊرە سەروو جەنگی خەڵکی مەدەنی کەرۊ ئامانج، تورکیا دیسان وەرنیشتی بۊردومان کەرۊ و بە ئەنقەس مەنتێقە مەدەنییەکا کەرۊ ئامانج. بەیاننامەکە بە دروشموو "بژیوۊ مدرامانوو وەرنیشتی " دماییش ئاما.

سێرت

ڕێکوستەی دەم پارتی شاروو سێرتینە بەیاننامێوە ڕۊنامەوانییش وەڵا کەرڎۊ و هجوومەکاو دەوڵەتوو تورکیش پەی سەروو سەرنیشت و وەرکەوتوو سوریای شەرمەزارۍ کەرڎێ.

چالاکییەنە دروشموو "گەلوو وەرنیشتی تەنیا نییا" و "فشارەکۍ مەتاوا شکسما پەنەبارا"ی وچیێوە.