هەبەدەهە، ئەنداموو کۆمیتەو ناوەندیی مەلەکەپەی و ئەنداموو مەجلیسوو گرڎیی هەبەدەهەی، باران سەرحەدش جە چوارەمین ساڵیاڎوو گەشمەرڎەبیەیشەنە بە حورمەتۆ یاڎ ئاردۆ و واتش: "ئێمە ئێروو ئاخێزی جە گرڎوو وڵاتەکەیمانە وەڵاکەرمۍ!"
کۆمیتەو ڕاوەبەری جمیەروو شۆڕشگێڵنیی یۊگێرتەو گەلا (هەبەدەهە)ی بۆنەو چوارەمین ساڵیاڎوو گەشمەرڎەبیەو ئەنداموو کۆمیتەو ناوەندیی مەلەکەپەی و ئەنداموو مەجلیسوو گرڎیی هەبەدەهەی، باران سەرحەدی، بەیاننامێوە نویسیاش وەڵاکەردۆ.
هەبەدەهە جە بەیاننامەکەنە ئەرەیاۋنانش، "چی پڕۆسەنە کە لوێنمۍ ٩ەمین ساڵەو کۊشیایۆ، سەرەو ڕێز و حورمەتی پۍ گەشمەرڎاما منامنمێرە کە ئێمەشا یاونا بە ئارۆی". جە ٨ ساڵی ۋیەردەنە دەیان مێڎانۍ کۊشیاینە خەباتما کەردەن و قوربانیۍ فرێچما بەخشێنۍ. یۆ چا هەڤاڵاما، کە دەوری سەرمەشقش بۍ جە پەرەپنەدای و وەڵۍ وستەی ئی جمیەرەینە، هەڤاڵ باران سەرحەدا، کە ٤ ساڵێن جە ڕوو فیزیکیەوە چەنەما بڕیانەرە.
جە ئەرەیاۋناکەینە ئامان، "فاشیزموو ئاکەپە-مەهەپەی بە تنتەرین شێوە درێژە بە هجوومەکاش مڎۆ، هجوومی ئەرەگیری پۍ سەروو ۋەرنیشتی، هجووم دژوو دەسکۊتەکا تەڤگەری ئازاڎیی کوردی، تاوانەکاو جەنگی و هتد. هەرچەنڎە گرڎوو دنیۍ جە ۋەرا ۋەروو ئا تاوانانە بێدەنگێنۍ". بەڵام جمیەروو شۆڕشگێڵنی یۊگێرتەی گەلا چی چوارچێوەنە پۍ ئازاڎیی گەلاو تورکیای و کوردسانی ئەرەمەرزیا، گرنگیێوە تاریخیش بیەن و بۆش، باران سەرحەد پەی بەیاگێ یاونای ئا ئەرکە تاریخیە کۊشیایش کەردەن.
بێ گومان حکوومەتوو فاشیستی ئاکەپە – مەهەپەی ئاگاڎارۍ ئەرک و ۋەرپرسیاریی، فەرماندە و سەرمەشقو جمیەری شۆڕشگێڵنی یۊگێرتەی، باران سەرحەدی بێنۍ، حەرپۊکەی دەس نیشان کریا و گەشمەرڎەشا کەرد. ئینەیچ سیاسەتێوە تایبەتوو دەوڵەتوو فاشیستین کە پێسە ڕێوە دژوو جمیەروو شۆڕشگێڵنی یۆگێرتەو گەلا جابەجێ کریۆ.
هامڕاما باران سەرحەد، بێجگە جە ئەرکە تاریخیەکەیش، یۆبۍ چا کەسا کە فرەتەرین هەرمانەش پۍ ڕیبازوو ئاخێزوو سۆسیالیزمی کەرد. حەرپاسە سەرمەشقوو خەتەو کۊشیای بۍ و حۊڵ دۍ هەلومەرجوو ئاخێزی گرڎوو مەنتیقەکانە خوڵقنۆ.
فاشیزموو ئاکەپە – مەهەپەی و چەتەکۍ ئیسەی زیاتەر متەرسا. کۊششکارا ئاخێزوو یۊگێرتەی گەلا جە هەر ساتێوەنە بۆ مڎا ملوو دەوڵەتوو تورکیرە. ئێمە ئی ئیرادەما جە باران، نوبار و ئولاشان، شاهینان و سینان، دەلالان، ئاینورۍ و جەرەنانیوە هۊرگێرمۍ. پێسە تۊفانێوە قەڎ مەمردمۍ تا دلێنەبەردەو دوژمنی. ئێمە حەقەشا ۋنە کەرمۍ و ئێروو ئاخێزی جە گرڎوو وڵاتەکەیمانە وەڵاکەرمێوە و ڕۆحوو هامڕا باران سەرحەدی جە کۊشیای ۋێمانە بە زینڎەیی مازمێوە!"
