هەپەگە شناسنامەو ٣ گەریلا گەشمەرڎاش ئاشکرا کەرد
هەپەگە بارەو گەریلا گەشمەرڎەکاوە واتش: "هامڕێمادژوار، کەنداڵ و ئێرنێستۊ تا دما هەناسەشا هەوڵێشا دۍ پەی ئارڎەیدیی ئامانجەکەیشا".
ناوەندوو ئەرەیاونای و چاپەمەنیی هەپەگەی شناسنامەو گەریلاکاو هەپەگە ی دژوار شەڕڤان، کەنداڵ جودی و ئێرنێستۊ چی گیڤارایش وەڵا کەرڎێوە، کە مانگە جیاجیاکاو ساڵەو ٢٠٢٣ مەتینانە گەشمەرڎۍ بیۍ و ئانەش وست ڕووە، کە ئا گەشمەرڎۍ بیۍ بە جەنگاوەرۍ سەرمەشقۍ کۊشیای ئازادی، کە سەروو خەتەو گیانبازیوە کریۊ.
دەقوو ئەرەیاونایەکەو هەپەگەی پێسنەن:
"مەتینانە کە دژوو دەوڵەتوو تورکی ئەرەگیری سەروو خەتەو گیانبازییوە کۊشیای کریۊ، جە هجوومەکاو دوژمنینە هامڕێما دژوار شەڕڤان ٢ تشرینوو یوەم/ئۊکتۊبەروو ٢٠٢٣، کەنداڵ جودی ٢٨ تشرینوو دووەم/ نۊڤەمبرو ٢٠٢٣ و ئێرنێستۊ چی گیڤارا ٣ کانوونوو یەکەم/ دیسەمبروو ٢٠٢٣ گەشمەرڎۍ بیۍ.
هامڕێما دژوار، کەنداڵ و ئێرنێستۊ تا گەلەکەما بۊ بە داراو ئایندێوە شکۊمەندانەی سڵشا وەنەو حیچ گیانبازی و قوربانیداێوە نەکەرڎۊ. پا هەڵوێستە پاگێرتانەیوەشاوە، پێسە جەنگاوەرە ئاپۊییا لوۍ دلۍ تارێخوو کۊشیایماوە و بیۍ بە نموونێوە پەی گردوو گەنجاو کوردی. هامڕێما دژوار، کەنداڵ و ئێرنێستۊ حیچ ئامانجێوە لاشاوە بەنرختەر جە ئازادیی گەلەکەیما نەبۍ. فرەو مەنتێقە و هەرێمانە، کە جەنگ دژوار بۍ، بەشدارییشا کەرد. بنەمای سەرەکییەشا ئانۍ بۍ کە ئامانجوو وێشا بارا دی. تا دماهەناسەشا سازششا سەروو ئا هەڵوێستەیشا نەکەرد. بۊنەو ئانەیوە جەنگاوەرۍ ئاپۊیی بێنۍ سەرەبەرزۍ بێنۍ و شانازییشا پۊوە کەرمۍ. پەنەوازییە جەنگاوەرییانە ئاپۊییانەکێشا بە کرڎەوە یاونۍ یاگۍ و پێسە پەنەوازی و بەتەمامەتی شۊڕشگێڵنانە ژیوۍ. پێسە جەنگاوەرە سەرمەشقا کۊشیایما سەروو خەتەو گیانبازییوە سەرەمڕ ڕاما ڕۊشنە کەراوە و با بە مەشخەڵەو ڕێما.
سەرەوەشی جە گەلی وەڵاتپارێزنوو کوردستانی و بەتایبەتی بنەیانەو هەر یەرە هامڕایاما دژوار، کەنداڵ و ئێرنێستۊ کە ئا دەورە ئەویندارانەو گەلیشا گەورە کەرد. وەعد ئەوەخوای کەرمێوە کە یادوو هامڕایاما بەزیندەیی بازمێوە و گوڕ بە کۊشیای بدەیمۍ.
زانیاری بارەو شناسنامەو هامڕایاما پێسنەن:
شناسنامێ: دژوار شەڕڤان
نامۍ و دمانامێ: محەمەد چەتین
یاگۍ پەیدابییەی: ئامەد
نامۍ ئەدێ- تاتەی: سانا- عەبدولسەلام
وەخت و یاگۍ گەشمەرڎەبییەی: ٢ی تشرینوو یوەموو ٢٠٢٣/ مەتینا
شناسنامێ: کەنداڵ جودی
نامۍ و دمانامێ: رزگار دەروێش
یاگۍ پەیدابییەی: دربێسی
نامۍ ئەدێ- تاتەی: فەرحا- بشار
وەخت و یاگۍ گەشمەرڎەبییەی: ٢٨ تشرینوو دووەموو ٢٠٢٣/ مەتینا
شناسنامێ: ئێرنێستۊ چی گیڤارا
نامۍ و دمانامێ: ژیان بیلگە
یاگۍ پەیدابییەی: ئامەد
نامۍ ئەدێ- تاتەی: قومری - سلێمان
وەخت و یاگۍ گەشمەرڎەبییەی: ٣ی کانوونوو یوەموو ٢٠٢٣/ مەتینا
