ۋەرەتاو دلۍ تەوقەو هەورینە مەنەنۆ. بەڵام گەرەکشا بڕەمۆ. جە حەقەتتەنە گەرەکش نیا کە چی وەختەنە بڕەمۆ. هەرچەنڎە ڕەحم و ۋێش ۋەرا ۋەر بە ئێمە کەمیچ مەکەرۆ، ئێمە دوعا کەرمۍ کە ئیسە نەبڕەمۆ. هەورەکۍ سەرشەرە ملا، سەرەتا ئێمە ۋێما میاونمۍ سەروو کەشێوە، دماتەر با بڕەمۆ، فرەش نەمەنەن.

گەریلاکاو ۋەروودەمیما زنارینە و مەدیا بە ملپێچێوە سەروازیۆ ملشانە، بەرەو سەختی ڕا کەرا. ئاڎۍ رابەرۍ ژیۋاینۍ. زنارینە خەڵکوو مێردینیەنە، مەدیایچ خەڵکوو کۆبانێنە. دووۍ رۆڵۍ گەلوو کوردسانی کە جە کەشەنە یاوێنۍ بە یۊی.

زنارینە جە تاشە تەوەنۍ وردەبۊوە. دیارا ئا تەوەنۍ مەعنێوەش پۍ ئاڎۍ هەنە. ئاخۆ پۍ چی چنەش وردەبۆوە. پێسە ئانەی دەس میاچەماشەرە بارۆ، پێسە ئانەی زامێوەش بارۊوە یاڎ، پێسە ئانەی کە چنی هامڕێوە گەشمەرڎەیش قسۍ کەرۆ. پەنهانی ۋێش پۍ ئا تەوەنۍ درکنۆ.

مەدیا ئینا وەڵێوە، هوروەزۆ سەروو تەوەنۍ تەرۍ و ریزە تەپێوە ئینۍ ۋەروودەمیمانە. ۋەروو ئانەی ئێمە ئینایمۍ بەرزتەرین یاگێنە. گەریلا تەپ و تاشە تەوەنەکێش وەش مسیا، حەزش جە ڕاکەردەین سەروو تەوەنەکارە، گۆرانیۍ ماچا، یاڎەوەریۍ ماراوە یاڎ.

هەردووە گەریلاکۍ منیشارە. تەماشەو ئا کەش و کۊیە، داروو تەوەنا، ریزە کەشەکە ۋەروودەمیشا کەرا. دیارە مانیێنۍ پۊکەی مردێنۍ. هەناسێوە ئاماوە ۋەرمارە، ئەگینا نەتاوێنا ۋێم بیاونوو بە گەریلای.

ئاسمان کەوە بۍ، ۋەرەتاو حۊڵ دۍ کە تیشکەکاش بە تەماموو دنیێرە وەڵا کەرۊوە.

پۍ ئانەی ئیسراحەتۍ کەروو چێروو تاشە تەوەنێرە نیشتەبێنارە. رەنگە کیشیای عاڵتەرین کار بۆ ئیسە، بەڵام ئینە زەحمەت بۍ، ئیسراحەتوو گەریلای جە ٥ دەیەقا زیاتەر نییا. لووای و ئامایۆ جە ئەرکێوەنە چنڎەیچ دژوار بۆ تەنیا ئیسراحەت و وچانێوە کوڵش بۆ.

ئاسمان کەوەن، بەڵام ئاسمان ۋێش ئاماڎەکەردەن پۍ وارانی. سیاوا هورش کەرد. ۋەروو ئانەی ئینایمۍ سەروو کەشەکاوە عال هەست بە دەنگوو سروشتی کەرمۍ.

هەردووە گەریلۍ شۊنەو یاڎەوەرییەکا کۊتێنۍ. سەرنجۍ دوور و درێژشا بەرەو زاپ هەن. رووەشا جە زاپینە، واتە ڕووەشا جە قەڵاو مدرامانینە..