'حەتا ئازاڎیی جەستەیی ڕابەر عەبدوڵا ئۆجالانی کۊشیای کەرمۍ'
ژەناو تل ڕەفعەتی ئاماژەشا پانەی کەرڎ کە ئازاڎیی عەبدوڵا ئۆجالانی ئازاڎیی گەلین و داواشا جە پێکئامایەکا سەرنیشت و ۋەرکەوتوو سوریای کەرڎ پۍ ئازاڎیی جەستەیی ڕابەر ئۆجالانی کۊشیانە.
ژەناو تل ڕەفعەتی سەبارەڎ بە گۆشەگیریی ڕەهاو سەروو ڕابەروو گەلوو کوردی عەبدوڵا ئۆجالانی، قسېشا پۍ ئاژانسوو فوراتی کەرڎۍ.
ڕووەیدە عەلی کە جە بنەڕەتەنە خەڵکەو شاروو عەفرینی ئەرەگیرکریاینە، ماچۊ:"جەنگ و ئەرەگیرکەرڎەو شاروو عەفرینی درێژەپنەدەروو پیلانگێڵنی میان نەتەوەییا جە دژوو ڕابەروو گەلوو کوردی عەبدوڵا ئۆجالانی. گرڎوو جەهانی بە شێوازی جیاواز حۊڵوو دلېنەبەرڎەی ئیراڎە و مدرامانیما مڎا. دەوڵەتوو فاشیستوو تورکی گۆشەگیری قورس سەروو ڕابەر عەبدوڵا ئۆجالانی ئەنجام مڎۆ. زیاتەر جە ٣ ساڵان کەسوکار و پارێزنەرەکېش نەتاوانشا سەرش ۋنە بڎا. موینمۍ دەوڵەتوو تورکی بە هامکاری وڵاتا سەرمایەداری، بە شێوەی جۆراوجۆر رووبەڕوو ڕابەر ئۆجالانی بۊوە. ئێمە پېسە ژەنا هێز و ئیراڎەو ۋېما جە فکرەکاو ڕابەر ئۆجالانیۆ هۊرگېرتەن. ڕابەر ئۆجالان ژیۋای و ئازاڎیش بە ژەنا بەخشا."
ڕووەیدە جە دمادماینە واتش:"تا گۆشەگیریی سەروو ڕابەر ئۆجالانی دمایش پنە نۍ درێژە بە کۊشیایما مڎەیمۍ و داوا جە پێکئامایەکا سەرنیشت و ۋەرکەوتوو سوریای کەرمۍ یۆگېرا و خۊتانکەرڎەی جە مدرامانوو ڕابەر ئۆجالانی کەرا. ژەناو عەرەبی بە مەڵامەتوو ڕوانگەکاو ڕابەر عەبدوڵا ئۆجالانیۆ ئازاڎۍ کریۍ."
یووەتەرە چا ژەنا عایشە محەمەڎەنەو جە بنەڕەتەنە خەڵکەو هەرێموو شەهباینە و واتش:"وەڵۍ ئانەی بە فکرەکاو ڕابەروو گەلوو کوردی عەبدوڵا ئۆجالانی ئاشنا بۆ، ژەنی جە گرڎوو مافەکاشا بێبەشۍ بېنۍ، بەتایبەتی جە گلېرگەی عەرەبینە، ژەنی چېروو گۆشەگیرینە بېنۍ. پېسە ۋېم دماو ئانەی چی جمیەرەیە نزیکە بیانیوە و جە بەشێوە جە کۆبیەیۊکانە بەشداریم کەرڎ، بەشێوە جە کتێبەکاو ڕابەر ئۆجالانیم ۋەنېوە، پېم بەرکۊت کە مشۊم ژەنا ۋېشا بېزاوە.
جە سایەو هزر و فەلسەفەو ڕابەر ئۆجالانینە، ژەناو عەرەبی ۋېڕاگری کەرا و ۋېشا ڕزگار کەرڎەن. ژەنی واتا گرڎوو گلېرگەی و ئێمە پېسە ژەناو عەرەبی داواو ئازاڎیی ۋېما کەرمۍ."
