'حیچ هێزێوە ۋەراۋەر بە ژەنۍ ئازاڎۍ مەتاوۆ سەرگنۆ'
گەریلاکاو یەژا ستاری: حیچ هێزێوە ۋەراۋەر بە ژەنۍ ئازاڎۍ مەتاوۆ سەرگنۆ. پۍ ئێژاکەردەی و ۋەرفراوانکەردەی ئازاڎیی، مشۊم گرڎ ژەنێوە پۍ ئازاڎیی کۊشیۆنە.
گەریلاکاو یەژا ستاری جە مەڕەکا جەنگینە ٨و ئاداریشا جە ڕابەروو گەلوو کوردی عەبدوڵا ئۆجالانی و گرڎوو ژەنا پیرۆزکەرد.
گەریلاکاو یەژا ستاری جە مەڕەکا جەنگینە بە جۆش و خرۆشۆ پێشوازیشا جە ٨و ئاداری کەرد و واتشا: "کۊشیای ژەنۍ کە بە فکر و ئایدۆلۆجیاو ڕابەر ئاپۆیۆ ملۆڕاوە، ئارۆنە جە گرڎ یاگێنە کاریگەریش وەشکەردەن. ٨و ئاداری ڕۆو جەهانی ژەنا کرێکاری، پۍ گرڎوو ژەنا ڕۊو ئازاڎییا؛ وەڵۍ گردینە؛ جە ڕابەر ئاپۆی هامڕاو حەقەتینوو ژەنۍ، جە گەشمەرڎا ئاخێزی، جە ئەڎا قارەمانەکا کە پۍ ئازاڎیی ڕابەر ئاپۆی ئینۍ ئیشکگیری دادپەرەوەرینە، جە هەر هامڕێوە ژەنۍ کە جە مەڕەکا جەنگینە و جە کوردسانەنە دژوو هێزوو دەوڵەتا ئەرەگیری جەنگ کەرا، جە هامڕایا ژەنۍ کە جە زینڎانەکانە سەرەشا نەنامنارە و جە گرڎوو ژەنا جەهانی پیرۆز کەرمۍ.
٨و ئاداری ڕۊو جەهانی ژەنا کرێکاری بە ئایدۆلۆجیاو 'ژەنۍ، ژیۋای، ئازاڎیی' ڕابەر ئاپۆیۆ مۆدێلێوە ژیۋای تازەیش خوڵقنا. ئی ئایدۆلۆجیا جە تەماموو جەهانینە پێسەنە ئاخێزێوە ژەنا، گرڎوو ژەنا دنیێ و گلێرگەکێش جە دەوروو ئازاڎیینە کوۍ کەردێوە. عەقڵیەتوو دەوڵەت نەتەوەی گردوو بەها مرۆڤایتیەکا پاشێل کەرۆ پەی بە کۆیلەکەردەو ژەنا بە شێوێوە سەرانسەری هجووم و سەروو کۊشایای کەرۆ. بە ڕێبازوو جەنگی تایبەتی جە دژوو ژەنا و گەنجا، میدیا هونەری و وێژەی بەرکارمارۆ پی جۊرە ڕێبازوو تاونایۆ و دژایەتیکەردەی قوڵتەر مکەرۊوە. هێزوو سەرەوەری پیای کە دلۍ سیستموو گێچەڵەو ۋێشەنە دلۍ کۆمەڵینە هیچ سنورێوە جەنگی مەشناسۆ، بە بەکارئاردەی گرڎ جۆرە تەکنیکێوە گەرەکشا قڕکەردەی ئەنجام بڎۆ.
گەریلا هجومەکا دلێنەبەرۆ
بە تایبەت سیستموو دەوڵەتوو تورکی فاشیستی و دەسەڵاڎداری، جە دژوو ڕابەر ئاپۆی و جمیەروو پەکەکەی کە وەرگیری جە بەهاکا کوردی و کوردسانی کەرۆ، بە گرڎ جۊرێوە هجووم کەرۆ. ماوەو چوارساڵان دژوو گەریلای جە کەشەکا کوردسانینە گرڎ جۆرە چەکێوە کوشندە و کیمیاۋیی بەکار مارۆ. بەڵام گەریلا گرڎوو هجوومەکا دوژمنی، بە ئیراڎێوە پۆڵاینۆ ماڕۆنە.
مشۊم ژەنی پۍ ئازاڎیی کۊشیانە
جە گرڎ چالاکیێوەنە بە سەرمەشقایەتی گەریلاکاو یەژا ستاری جارێوەتەر ئانە بەرگنۊوە کە ئیرادە و ویستوو ئینسانی متاوۆ گرڎ جۆرە هجومێوە شکس دۆ. پێسە گەریلاکاو یەژا ستاری کە بە ئایدۆلۆجیاو 'ئانۍ جەنگ کەرا ئازاڎۍ با، ئانۍ ئازاڎۍ با جوانۍ با، ئانۍ جوانۍ با وەشەسیۍ با ' ۋێشا پەڕکەردەن، وەعد مڎەیمۍ بە گرڎوو ژەنا جەهانی؛ هیچ هیزێوە جە ۋەرا ۋەروو ئا ژەنانە کە ئازاڎێنۍ، ۋێش مەگێرۆ. پۍ ئانەی ئازاڎیی ژەنۍ ئێژاتەر بۆ و جە گرڎوو مێڎانەکانە وەڵا بۆوە، مشۊم گرڎوو ژەنا بلا دلۍ خەتەکا ئازاڎیی."
