دێرسیمنە بە سەرمەشقایەتیی پلاتفۊرموو ڕەنجی و دیموکراسی، کە ژمارێوە فرە پارتۍ سیاسی و ڕێکوزێی مەدەنیۍ چەنە بەشڎارێنۍ ١وو ئایاری پیرۊز مەبارەک کریا. بە هەزاران کرێکارۍ کە هێلەکوو سەندیکاکاشا پۊرەبۍ بە بەرزکەرڎەیۊە لافیتەی و پلاکارڎی بارەو ١وو ئایاریوە بەرەو مەیڎانوو سەید ڕەزای، کە مەبارەکباییەکەش چەنە لوۍ ڕاوە ڕاپیمایشا کەرد.

ڕاپیمایەکەنە کە بە جۊشوخرۊشەوە ساز کریا، بە چوار زوانۍ پلاکارڎۍ "پەی مانیای یەکسانی کرێی یەکسانێ"، "١وو ئایاری جە دژوو جەنگی و چەوسنایۊ ڕەنجی "، "ئاشتی، دادپەروەری، ئازادی، سۊسیالیزم"ی بەرزۍ کریێوە.

ڕاپیماکەینە بە چەپڵەڕێزان و هەلهەلە دروشمەکاو "بژیوۊ یەکوو ئایاری" و "ئا ڕووە مۍ کە ئاکەپە باجوو کرڎەوەکاش مدۊ" وچیێوە. ڕاپیماکەینە ڕسمۍ سەرمەشقەکاو شۊڕشیچ بەرزۍ کریێوە. دوکاندارێچ بە چەپڵۍ و دروشمۍ پەشتیوانییشا لە ڕاپیماکەینە کەرد.

گەل بە جۊشوخرۊشی فرەوە لوۍ مەیڎانەکە. وەختۍ دەسەو پارتوو چەپی سەوزی ئامۍ دلێوە، چەپڵۍ و هەلهەلۍ مەیڎانەکەنە بەرزۍ بیێوە. هامسەرۊکوو کۊنگرەو گلێرگەی دیموکراتیک (کەجەدە)ی "بەردان ئۊزتورک" و قسەکەروو پارتوو چەپی سەوزی "جیدەم کلیچگون ئوچار"یچ جە دەستەکەنە بەشڎارۍ بێنۍ. مەبارەکباییەکەنە دروشمەکاو "ژەنی، ژیوای، ئازادی" و "١وو ئایاری سوورا و بەسووری مەنۊوە"ی وچیێوە. مەیڎانەکە حەر زوو پەڕ بی. ژمارێوە جە جبەروو مەیڎانەکەینە بەشڎاریشا جە ئاهەنگەکەینە کەرد و بە واتەیۊ گۊرانییە کورڎییا ورۍ پڕۍ.

س.ز